ISOMO 4

Kwanjura Kurungi Ebyahandiikirwe

Matayo 22:41-45

EKY’OSEMERIIRE KUKORA: Banza otekanize ebitekerezo by’abantu abarukukuhuliiriza otakabasomiire ekyahandiikirwe.

Tekerezaaho ensonga habwaki nosoma ekyahandiikirwe. Yanjura ekyahandiikirwe omu mulingo ogurasobozesa abarukukuhuliiriza kumanya ensonga habwaki nogenda kukisoma.

Manya enkarra ezetoroire ekyahandiikirwe eky’orukugonza kukozesa. Kigumye ngu omuntu ow’ojuliize nuwe yagambire kwo ebigambo ebi, kandi n’omuhindiiki wa Baibuli ow’ojuliize nuwe yahandikiire kwo ekitabu eki.
Yoleka obukuru bwa Baibuli. Obworaaba nobaza n’abantu abarukwikiririza omuli Ruhanga, kozesa ebigambo “Ekigambo kya Ruhanga” nukwo kyoleke ngu Baibuli erumu amagezi agarukukirayo oburungi.
Bakonyere kutunga ekihika eky’okumanya ebiri omu kyahandiikirwe. Kaguza ekikaguzo ekirukugarukwamu ekyahandiikirwe ekyo, bazaaho ekizibu ekiragonjorwa ekyahandiikirwe, rundi bazaaho omusingi ekyahandiikirwe eki kirabakonyera kwetegereza.

Tekerezaaho ebintu abarukukuhuliiriza bamanyire ha kyahandiikirwe na ha nsonga orukubazaaho. N’obworaaba nobazaaho ekyahandiikirwe abantu eki bamanyire, kibazeeho omu mulingo ogurukusikiiriza, kandi bakonyere kwega ekintu ekihyaka.