Omulingo Osobora Kutandika Kubaza n’Omuntu Nokozesa Turakiti

Kuruga Janwali 2018, ekicweka nk’Oku Osobora Kubaza n’Omuntu kiizire nikiteekwa ha kyesweko eky’Akatabu Obwomeezi Bwaitu nk’Abakristaayo. Kibaire nikitwekambisa kuta omutima ha kubaza n’abantu omu kiikaro ky’okubaha buha eby’okusoma. Kusobora kukonyera abatebezi kubaza n’abantu, vidiyo ez’ekicweka nk’Oku Osobora Kubaza n’Omuntu zikaire nizooleka nk’oku tusobora kutandika kubaza n’omuntu nitukozesa Baibuli yonka. Baitu kinu nikimanyisa ngu titusemeriire kukozesa ebitabu obuturukuba nitutebeza enju ha nju? Nangwa! Ekyokurorraho, nitusobora kukozesa turakiti kutandika kubaza n’omuntu. Nitusobora kukozesa omulingo gunu ogwolekerwe hansi obuturukuba nitukozesa turakiti:

1. Kaguza ekikaguzo ekiri ha mutwe gwa turakiti.

2. Mwoleke ekyokugarukamu kuruga omu kyahandiikirwe rundi ebyahandiikirwe ebiri ha mutwe gw’orupapura rwa kabiri. Obwaraaba aine obwire, musomere kandi mubazeeho ebiri omunda ya turakiti.

3. Heereza ow’orukutebeza turakiti kandi omwekambise kusoma ebindi omu bwire bwe.

4. Otakagenzere, mwoleke ekikaguzo ekiri ha kicweka “Ekyokutekerezaaho” kandi mukole entekaniza ey’okukigarukamu n’okozesa Baibuli obw’oragarukayo.

Obworagarukayo, mubazeeho ekyokugarukamu kandi omulekere ekikaguzo ekindi ekimurabazaaho obwire obundi. Ekikaguzo nosobora kukiiha ha mukura gwaitu rundi omu kitabu ekibaziibweho enyuma ya turakiti. Ha bwire obusemeriire, mwanjurre akatabu, Amakuru Amarungi Kuruga Hali Ruhanga! rundi ekitabu ekindi kyona kuruga omu Bikwato Byaitu Ebitukozesa Kwegesa.