ISOMO 8

Ebyokurorraho Ebirukwegesa

Matayo 13:34, 35

EKY’OSEMERIIRE KUKORA: Yongera kusemeza omulingo orukwegesaamu kuraba omu kukozesa ebyokurorraho ebyanguhire, ebirukusikiiriza, kandi ebirayegesa ensonga enkuru.

OMULINGO OGW’OKUKIKORAMU:

Kozesa ebyokurorraho ebyanguhire kwetegereza. Nka Yesu, kozesa ebintu ebitaito kusoborra ebintu eby’amaani, kandi kozesa ebintu ebyanguhire kusoborra ebintu ebigumire. Kweriinda kugumanganiza ekyokurorraho kyawe, otongeramu ebintu ebitarukwetagisa. Kigumye ngu ebintu ebiri omu kyokurorraho kyawe nibisagikira kimu ensonga orukwegesaaho nukwo abarukukuhuliiriza batahuguka habw’okulemwa kwetegereza ekyokurorraho kyawe.

Faayo kwetegereza. Wetegereze ebintu ebikwetoroire, soma ebitabu kuruga hali omwiru omwesigwa, kandi huliiriza abegesa abarungi obubaraaba nibegesa. Obworatunga ebyokurorraho eby’osobora kukozesa kwongera kusemeza omulingo orukwegesaamu, bihandiike kandi obyahule omu fairo.
Tekerezaaho abarukukuhuliiriza. Kozesa ebyokurorraho ebirukukwata ha bintu abarukukuhuliiriza bamanyire kandi ebibagonza. Baitu oyegendereze kurora ngu ebyokurorraho byawe tibyaswaza kandi tibyabiihiza abarukukuhuliiriza.
Yegesa ensonga enkuru. Kozesa ebyokurorraho kusoborra ensonga enkuru hatali buli kimu kyona eky’orukubazaaho. Kigumye ngu abarukukuhuliiriza nibaija kwijuka ensonga ey’orayegesa hatali ekyokurorraho kyonka.