Ruhanga ahaire Yesu amaani ag’okumaraho ebizibu by’abantu byona. Yesu obuyakozere ebyamahano, akooleka ngu aine obusobozi obw’okumaraho ebizibu ebitutasobora kumaraho. Ekyokurorraho, aine amaani ag’okumaraho ebintu byona ebituleetera kubonabona nk’ekibi ekitwagwetiirwe, endwaire hamu n’okufa. (Mat. 9:​1-6; Bar. 5:​12, 18, 19) Ebyamahano ebiyakozere nibyoleka ngu n’asobora kukiza “endwara zona” n’okuhumbuura abafu. (Mat. 4:23; Yoh. 11:​43, 44) Ekindi, aine amaani ag’okuculeeza ihunga n’okubinga emyoyo embi. (Mar. 4:​37-39; Luk. 8:2) Kanikigarramu amaani kukimanya ngu Yahwe ahaire Omwana we amaani ag’okukora ebintu binu! Nitukigumya ngu emigisa yoona Ruhanga eyiyaturaganiize ey’eraaba omu Bukama bwe niija kuhikirra. Ebyamahano Yesu yakozere obwakaba ali omu nsi nibitwegesa ngu naija kukora ebirukukiraho nk’Omukama w’Obukama bwa Ruhanga. w23.04 3 ¶5-7

Obworaaba oli omu kitebe ekikooto, kandi noyehurra ngu iwe tibakira kukukoma, n’osobora kuhwamu amaani. Baitu otaleka kwikara n’olengaho kugarukamu. Teekaniza eby’okugarukamu bingi ha buli rusorrokano. Nukwo obubaraaba batakukomere hakutandika, n’osobora kugarukamu obwire obundi. Obworaaba n’otekaniza Omunaara gw’Omulinzi, tekerezaaho omulingo buli kacweka karukukwatagana n’omutwe gw’ekicweka eki. Obw’orakikora, noija kusobora kutunga eby’okugarukamu ebirungi. Ekindi, n’osobora kutekaniza kugarukamu obucweka oburukubazaaho enyegesa ezigumire kusoborra. Habwaki? Habwokuba abantu bake nibasobora kuhanika emikono ha bucweka obu. Kiki eky’osemeriire kukora kakuba okyetegereza ngu na hanyuma y’okurabaho ensorrokano nyingi tibakakukomere? Ensorrokano zitakatandikire, n’osobora kugambira ow’arukwebembera ekikaguzo ekiwakugondeze kugarukamu. w23.04 21-22 ¶9-10

Yusufu yateekaga omu nkora obuhabuzi bwa Yahwe, ekyamukonyiire kuba nyineeka omurungi. Emirundi esatu akatunga obuhabuzi oburukukwataho eka ye kuruga hali Ruhanga. Kandi buli murundi yabworoberaga ahonaaho n’obukyayetaagisaga kukora empindahinduka ez’amaani. (Mat. 1:20; 2:​13-15, 19-21) Habw’okuhondera oburagirizi bwa Ruhanga, Yusufu akalinda Malyamu, yamusagika kandi yamuhikyaho ebyetaago bye. Tekerezaaho omulingo ebikorwa bya Yusufu byaletiire Malyamu kweyongera kumugonza n’okumuteekamu ekitiinisa. Banyineeka nimusobora kwegera ha kyokurorraho kya Yusufu, kuraba omu kuserra obuhabuzi bwa Baibuli oburabakonyera omu maka ganyu. Obumuteeka omu nkora obuhabuzi bunu n’obukiba nikyetaagisa kukora empindahinduka ez’amaani kyoleka ngu nimugonza bakazi banyu, kandi mweyongera kugumya obuswere bwanyu. Munyaanya itwe kuruga Vanuatu, ow’amazire emyaka erukuhingura 20 omu buswere n’agamba ati: “Iba nyowe obwaserra obuhabuzi kuruga hali Yahwe kandi akabuteeka omu nkora, nyeyongera kumuteekamu ekitiinisa, mpurra nyine obulinzi kandi nsagika encwamu ze.” w23.05 21 ¶5