Dina Yagwa Omu Kabi

NORORA abo Dina abarukugenda kubungira? Nagenda kurora abaisiki abaikaraga omunsi eya Kanani. Ekintu kinu Ise Yakobo yakukisimiire? Okutukonyera kugarukamu ekikaguzo kinu kurungi, lengaho oijuke nkoku Iburahimu na Isaka baroraga abakazi b’omu nsi ya Kanani.

Iburahimu akagonza mutabani we Isaka kuswera omukazi kuruga omu Kanani? Nangwa, atakigonze. Kandi Isaka na Rebeka bakagonza Yakobo kuswera omukazi kuruga Kanani? Nangwa, batakigonze. N’omanya habwaki?

Habwokuba abantu abomu nsi ya Kanani baali nibaramya baruhanga ab’ebisuba. Bakaba batali barungi okuba nabo nk’abakazi rundi nk’abasaija omu maka. Kandi bakaba tibali barungi okuba nabo nk’enganjani. Hati norora ngu Yakobo tiyakusemerirwe okurora omuhara we kuba n’abaisiki b’Abakanani nk’abanywani be.

Mananu, Dina akagwa omu kabi. Norora omusaija Omukanani ow’omukisisani ekyo nkoku akurolerra muno Dina? Ibara lye nuwe Sekemu. Kiro kimu, Dina obuyaizire kubunga, Sekemu akatwara Dina n’okumuhambiriza kubyama nawe. Kinu kyali kibi muno habwokuba abantu abaswirengaine nibo bonka basemerire kubyama hamu. Ekintu eki Sekemu eki yakozire Dina kikarugwamu akabi kaingi.

Banyanya Dina obu bahuliire ekyabaireho, kikababihiza muno. Simoni na Levi bakabihirwa muno, bakakwata busitama zabu bagenda murubuga obu abantu baali batakubanihira. Bo n’abagenzi babo bakaita Sekemu hamu n’abasaija abandi boona. Yakobo akabihirwa muno habw’ekikorwa eki batabani be baakozire.

Akabi kanu koona kakatandika kata? Kakatandika habwokuba Dina akaganjana n’abantu abatarukworobera ebiragiro bya Ruhanga. Twakugondeze kuba n’abanywani nka banu, turaba nabo?