Yusufu Alengesa Bagenzi Be

YUSUFU akagonza kumanya bagenzi be 10 obu baraba bakyaine ihali n’obutaba n’ekisa. Akabagamba ati: ‘Muli ntasi. Mwizire okutata rundi ensi yaitu ngu teine mani.’

Bakagarukamu: ‘Nangwa tituli. Tuli basaija abesigwa. Itwena tuli baisemu. Tuli 12. Omugenzi waitu omu takyaroho, omuto muno asigaireyo omuka na’isitwe.’

Yusufu akesisaniza nkatarukubaikiriza. Akasigaza Semeoni ou yataire omunkomo, baitu yaleka abandi batwale ebyokulya n’okugarukayo. Akabagambira ngu: ‘Obu muligaruka, mwije na mugenzi wanyu omuto.’

Obu batahire omuka, Kanani, bagambira Yakobo byoona ebyababaireho. Yakobo akatuntura muno. Akatandika n’okucura muno ati, ‘Yusufu takyaroho nahati na Simeoni. Tindukwija kubaikiriza kutwara omwana wange omuto Benyamini.’ Ebyokulya obu byatandikire okubakehaho, Yakobo akaleka batwara Benyamini omu Misiri nukwo batunge ebyokulya.

Yusufu akaleeba bagenzi be nibaija. Yasemererwa muno okurora mugenzi we omuto Benyamini. Busaho nomu akaba namanyira kimu ngu omukuru onu nuwe Yusufu. Yusufu akakora ekintu ekyokulengesa bagenzi be banu 10.

Akaragira abahereza be kwijuza ensahu zaabu n’ebyokulya. Kandi bateeke ekikopo eky’efeeza ekya Yusufu omu nsahu eya Benyamini batabagambiire. Obu bamazire kugendaho kumara omwanya, Yusufu akatuma abairu be okubahondera. Obu babahikireho, abairu bakabakaguza: ‘Habwaki mwibire ekikopo kya mukama waitu eky’efeeza?’

Boona bakagarukamu bati: ‘Itwe titwibire kikopo. Ogu oworasanga n’ekikopo aitwe.’

Nukwo abairu bakaserra munsahu zoona baitu bakakisanga omunsahu eya Benyamini nkoku orukurora hanu. Abairu bakabagambira ngu: ‘Abandi nimusobora kweyongera n’orugendo rwanyu, baitu Benyamini aine kugarukayo n’aitwe.’ Kiki bagenzi be 10 eki bakozire?

Boona bakagarukayo na Benyamini munju ya Yusufu. Nukwo Yusufu kugambira bagenzi be ati: ‘Abandi nimusobora kutaaha, baitu Benyamini aine kusigara hanu nk’omwiru wange.’

Yuda nukwo kugamba ati: ‘Kakuba ngarukayo omuka ntaine omwana ogu, Isitwe naija kufa habwokuba amugonza muno. Hati nkwesengerize, leka nyowe ngume hanu nk’omwiru wawe, baitu oleke omwojo agarukeyo omuka.’

Yusufu akarora ngu bagenzi be baali bahindwireho muno ha ngeso zabu. Bakaba tibakyali b’itima n’obutagira kisa. Hati leka turole kiki Yusufu ekiyakozire.