Amaka Goona Gafurukira Misiri

YUSUFU akaba atakyasobora kusereka enyehurra ye ey’omunda. Akagambira abahereza be boona kurugaho. Obu yasigaire wenka n’abagenzi be, Yusufu akatandika okurra. Cumitiriza kinu okukitekwa kuba kyahunirize bagenzi be, habwokuba bali batarukumanya habwaki akaba narra. Hamperu, akabagambira ati: ‘Ninyowe Yusufu. Isenyowe akiri mwomezi?’

Bagenzi be boona baali bakyahunirire muno n’ekyokubaza kikababura. Bakatiina muno. Baitu Yusufu akabagambira ati: ‘Mwirre haihi.’ Obu bakikozire yabagambira ngu: ‘Ninyowe mugenzi wanyu Yusufu ou mwatunzire omu Misiri.’

Yusufu akeyongera kubaza nabo n’ekisa: ‘Mutetaho omusango ngu mukanguza hanu. Kyonka Ruhanga nuwe yantumire omu Misiri okukiza obwomezi bw’abantu. Faraho akanfoora omukuru omu Misiri yoona. Hati murahuke mugende hali Isenyowe kandi mumugambire aije aikale hanu.’

Hanyuma Yusufu yagwa bagenzi be mukifuba n’okubanywegera boona. Obu Faraho yahuliire ngu bagenzi ba Yusufu baizire, yaragira Yusufu ati: ‘Batwale amagali baleete ise hamu n’amaka ge baije baikale hanu. Ninyija okubaha ekicweka eky’orwezo omu Misiri.’

Kino nikyo bakozire. Hanu norora Yusufu nataangirra ise obu yahikire omu Misiri hamu n’amaka ge.

Abantu ab’omu nju ya Yakobo baali beyongerire kimu okuba abaingi. Hati bakaba bali 70 abafurukiire Misiri, otwaliiremu Yakobo n’abatabani hamu na baijukuru be. Baitu hakaba harumu n’abakazi babu n’abahereza babu. Boona bakatandika kwikarra kimu omu Misiri. Bakamanywa nk’Abaisareri habwokuba Ruhanga akahindura Ibara lya Yakobo okuba Isareri. Abaisareri bakafoka bantu bembaganiza muno nkoku turarora.