Omulingo Musa Ogu Yakiziibwemu Akyali Nkerembe

DORA omwana omuto narra, kandi akwasire harunkumu rw’omukazi. Onu nuwe Musa. Nomanya omukazi ogu omurungi muno noha? Omu h’ababitokati ba Misiri, muhara wa Faraho.

Nyina wa Musa akamusereka okuhikya obu yahikiize emyezi esatu ey’obukuru habwokuba atagonze Abamisiri kumwita. Akamanya ngu nibaija kumuzoora nahabwekyo kinu nikyo yakozere kumukiza.

Akakora ekibaya ky’orufunjo, yakisiiga kurungi muno nukwo amaizi gatarabamu. Akamutamu, hanyuma yateeka ekibaya omu mateehe ha musa gw’Ekyambu ekya Nailo. Munyanya Musa Miryamu, akaba agambiirwe kwemerra haihi nukwo arole kiki ekirabaho.

Muhara wa Farawo akaija ha Kyambu kya Nailo kwooga. Yarora ekibaya mu mateehe. Nukwo yayesire omu h’abazana be: ‘Genda ondetere ekibaya kiri.’ Omubitokati obu yakisumurwire akarora omwana omurungi muno. Aho nuho Musa yatandikire kurra nukwo omubitokati yamukwatirwe ekisa. Atagonze abantu kumwita.

Miryamu akasembera haihi nkoku orukurora omu kisisani. Miryamu akakaguza muhara wa Faraho: ‘Ngende nkwetere omu h’abakazi b’Abaisareri aije akukonyere kukwonkeza omwana ogu?’

Omubitokati akamugarukamu ati: ‘Ego.’

Miryamu akairuka yagambira nyina. Obu nyina yaizire, omubitokati akamugambira ati: ‘Twara omwana onu omundolererre, nanyowe ndikuha empera.’

Nahabwekyo nyina wa Musa akatwara omwana ou yaayezaaliire. Musa obu yakuzire, nukwo kumutwarra muhara wa Faraho ayamukulize nk’omutabani we. Kunu nukwo Musa yaizire kukurra omu maka ga Faraho.