Yahwe Aha Ebiragiro

HANYUMA y’emyezi ebiri okuruga omu Misiri, Abaisareri bakahika ha Rusozi Sinai obundi orwetwa Holebu. Hanu nuho Yahwe yagambire na Musa naraba omukisaka ekikaba kiroho omurro. Abantu bakatera orukande hanu okumara akaanya.

Abantu obu baali bakyalindiriire, Musa akatemba ha rusozi. Obu yahikire ha mutwe gwarwo, Yahwe akagamba na Musa ngu Nagonza Abaisareri okumuhurra nukwo bafooke abantu be abembaganiza. Musa obu yasirimukire, akagambira Abaisareri eki Yahwe akaba agambire. Abantu bakagarukamu ngu bakaba nibaija kuhurra Yahwe, habwokuba nibenda kufooka abantu be abembaganiza.

Yahwe akakora ekintu eky’okutiinisa. Akafoora omutwe gw’orusozi kurugwamu omwika nokubaho okuhinda kwingi omu iguru okw’amaani. Nukwo kugamba n’abantu ati: ‘Ninyowe Yahwe Ruhanga wawe eyakwihire omu Misiri.’ Akaragira ati: ‘Otaliramya baruhanga abandi okwihaho nyowe.’

Ruhanga akaha Abaisareri ebiragiro ebindi mwenda. Abantu bakatiina muno, nukwo kugambira Musa bati: ‘Iwe baza naitwe, habwokuba nitutiina ngu obu Ruhanga arayeyongera kubaza naitwe, nitusobora n’okufa.’

Hanyuma Ruhanga akagambira Musa ati: ‘Ija kunu ha rusozi. Ninyija kukuha ebibbali by’amabale bibiri nambere mpandikire ebiragiro nukwo abantu bakuratire.’ Nukwo Musa kutemba ha rusozi akamarayo ebiro 40, emisana n’ekiro.

Ruhanga akaha abantu ebiragiro bingi muno na Musa akabihandiika. Ruhanga akaha Musa ebibbali bibiri, ebi Ruhanga akaba ahandikire Ebiragiro Ikumi ebi yagambiire abantu boona. Nibyetwa Ebiragiro Ikumi.

Ebiragiro Ikumi by’omugaso muno. Baitu n’ebiragiro ebindi ebi Ruhanga yahaire Abaisareri nabyo by’omugaso. Ekimu ha biragiro ebi nikyo eki: ‘Ogonzege Yahwe Ruhanga wawe n’omutima gwawe gwoona, n’amagezi gawe goona, n’obwomezi bwawe bwoona, n’amaani gawe goona.’ N’ekindi nikyo kinu: ‘Ogonzege mutaahi wawe nkoku oyegonza wenka.’ Yesu Kristo, Omwana wa Ruhanga, akagamba ngu binu ebiragiro ebibiri nibyo bikuru muno ebi Yahwe yahaire abantu be Abaisareri. Nitwija kwega ebintu bingi hali Omwana wa Ruhanga naha nyegesa ze.