Entasi 12

DORA ebijuma ebi abasaija abo bahimbire. Dora omugimba gw’omuzabibu ogu bahimbire. Nikitwarra abasaija babiri kugwetwekera ha muti. Kandi dora ebijuma by’omutini hamu n’omukoma mahanga. Ebijuma binu byoona ebirungi birugire nkaha? Kuruga omunsi ya Kanani. Ijuka Kanani nuho Iburahimu, Isaka na Yakobo baikaraga. Habw’enjara ey’amaani eyagwire ekahambiriza Yakobo n’amaka ge kufurukira Misiri. Hanyuma y’emyaka 216, hati Musa ayebembiire Abaisareri kubagarrayo omu Kanani. Baali bahikire omukiikaro ekirukwetwa Kadesi ekiri omu irungu.

Abantu abaikaraga omu Kanani baali babi muno. Musa akatuma entasi 12 n’okubaragira ati: ‘Mwetegereze bantu baingaha abarukwikaramu, nceke rundi b’amaani. Mumanye itaka obu liraba ly’orwezo, mugumye ngu nimuleta ebijuma by’omu nsi egyo.’

Entasi obu zagarukire Kadesi, bagambira Musa: ‘Ensi nungi muno.’ Kugumya ekibagambire bakoleka Musa ebijuma. Baitu entasi 10 bakagamba bati: ‘Abantu baaho b’amaani muno kandi bakooto muno. Obuturalengaho kutwara ensi yabu, itwena nibaija kutwita batumaleho.’

Abaisareri bakatiina muno obu bahuliire ekyo; nukwo bagamba ngu ‘kyakukizire kakuba twaferire omu Misiri mukikaro ky’okufera omu irungu.’ Bakongeraho nibagamba bati: ‘Nitwija kwitirwa omubulemu, abakazi n’abaana baitu bahambwe. Nahabwekyo katwekomere omwebembezi ondi mukiikaro kya Musa tugarukeyo mu Misiri!’

Baitu entasi ibiri, bo baali nibesigira kimu Yahwe, kandi bakalengaho kuculeza abantu. Amabara gabu nigo Yosuha na Kalebu. Bakabagambira bati: ‘Mutatiina. Yahwe ali naitwe. Nikija kwanguha kutwara ensi.’ Baitu abantu batahurre. Abantu bakagonza n’okwita Yosuha na Kalebu.

Kinu kikabihiza muno Yahwe nukwo yagambira Musa ati: ‘Busaho muntu wena kuruga ha myaka 20 ey’obukuru alitaha omu nsi ya Kanani. Bakarora eby’amahano ebi nakozire omu Misiri n’omu irungu, baitu tibakunyesiga. Nahabwekyo nibaija kwandaara omu irungu kumara emyaka 40 okuhikya omuntu asembayo obwalifa. Yosuha na Kalebu bonka nibo balitaaha omunsi ya Kanani’