Ekihandiko Ha Kisiika

KIKI ekirukukorwa hanu? Abantu bakaba ha bugenyi bw’amaani. Omukama wa Baburoni ayesere abagenyi ab’ekitiinisa rukumi. Nibakozesa ebikopo bya zabbu na feeza ebyaihirwe omu yekaru ya Yahwe omu Yerusalemu. Baitu, mukaanya ako, hakazooka enkumu z’omukono gw’omuntu zitandika kuhandika ha kisiika. Abantu boona batiina muno.

Berisaza mwijukuru wa Nebukadeneza nuwe mukama hati. Ayamirra haiguru nti abamagezi be baleetebwe omunju nambere akaba ali. Abagambira ati: ‘Omuntu weena arasoma ekihandiko kinu, akansoborra amakuru gaakyo, arahebwa ebisembo bingi kandi abe omulemi omukuru owakasatu mu bukama bunu.’ Baitu tiharoho n’omu h’abasaija abamagezi ayasoboire kusoma ekihandiiko kyaha kisiika n’obukwakuba kusoborra amakuru gakyo.

Nyina omukama ahurra okutoka kandi aija omukisiika kinu eky’obugenyi. Agambira omukama ati: ‘Leka kweralikirra. Haroho omusaija omubukama bwawe anyakumanyire abaruhanga abarukwera. Swenkuru Nebukaduneza obwakaba ali mukama akamufoora mukuru wa bamagezibe boona. Ibaralye nuwe Danieri. Mumwete, naija kusoborra amakuru.’

Mubwangu Danieri bamuleeta. Hanyuma y’okwanga kuhebwa ebisembo byona, Danieri atandikira hakusoborra habwaki kara Yahwe yabaire aihire Nebukadeneza isenkuru Berusaza ha nteebe y’obukama. Danieri agamba: ‘Akaba ali w’emyehembo, nikyo kyaletiire Yahwe kumufubira.’

Danieri agambira Berisaza: ‘Iwe okamanya ebyamubaireho, baitu okyaina emyehembo nka Nebukadeneza. Olesere ebikopo n’ebibindi ebya yekaru ya Yahwe kandi wabinyweramu. Okugiize baruhanga abakozirwe omumiti n’omu mabale, baitu tohaire Ruhanga waitu ekitiinisa. Nikyo Ruhanga atumire omukono kuhandiika ebigambo binu.’

Danieri agamba ati: ‘Kinu nikyo ekihandikirwe, MENE, MENE, TEKELI, UFASINI.’

‘MENE nikimanyisa ngu Ruhanga abazire ebiro by’obukama bwawe kandi abumazireho. TEKELI nikimanyisa ngu olengerwe omu minzani, baitu ozokere otarukuhika. UFASINI nikimanyisa ngu obukama bwawe buhairwe Abamedi n’Abaperesi.’

Danieri nobu akaba nakyabaza, Abamedi n’Abaperesi bakaba batandikire okurumba Baburoni. Bakakwata orubuga kandi baita Berisaza. Ekihandiko kyaha kisiika kyahikirra ekiro ekyo! Baitu kiki ekikaba nikiija kuhika ha Baisareri hati? Nitwija kukizoora omumaiso aho, baitu katubanze twetegereze ekirahika ha Danieri.