ISOMO 11
Omulingo Baibuli Esobora Kweyongera Kukugasira
Waragondezeeho kutandikaho omulimo ogw’amaani baitu okahurra gugumire muno? Kusobora kwanguhirwa, obundi ocwamu kugukora omu bicwekacweka. Nukwo kiri n’obukirukuhika ha kusoma Baibuli. N’osobora kwekaguza, ‘Ntandikire nkaha?’ Omu isomo linu, nitwija kubazaaho ebintu ebimu ebyanguhire eby’osobora kukora ebirakukonyera kwegondeza omu kusoma n’omu kwega Baibuli.
1. Habwaki tusemeriire kusoma Baibuli butoosa?
Omuntu ow’asoma Baibuli, rundi “ebiragiro bya [Yahwe],” butoosa, atunga okusemererwa kandi naija kuba musinguzi omu byona eby’akora. (Soma Zabuli 1:1-3.) Tandika n’osoma kumara edakiika nke buli kiro. Obworayeyongera kumanya ebiri omu Kigambo kya Ruhanga, noija kweyongera kwegondeza omu kukisoma.
2. Kiki ekirakukonyera kugasirwa omu kusoma Baibuli?
Kusobora kugasirwa omu kusoma Baibuli, n’osobora kubanza kusibamu kake kandi okatekerezaaho eby’osomere. Osemeriire kugisoma kandi ogyecumitirizeeho. (Yosuha 1:8) Obworaaba n’osoma, n’osobora kwekaguza ebikaguzo nka binu: ‘Kinu nikinyegesa ki hali Yahwe Ruhanga? Ninsobora nta kukiteeka omu nkora omu bwomeezi bwange? Ninsobora nta kukozesa enkarra zinu kukonyera abandi?’
3. N’osobora ota kutunga obwire obw’okusoma Baibuli?
Kikugumira kutunga obwire obw’okusoma Baibuli? Baingi hali itwe kitugumira. Baitu lengaho ‘kwegurra omwanya.’ (Abefeso 5:16) Kinu n’osobora kukikora kurabira omu kweteraho obwire obw’okusoma Baibuli buli kiro. Abantu abamu batunga obwire obw’okusoma Baibuli nyenkyakara muno. Abandi nyamusana, obundi nk’omu bwire bwabo obw’ekyamusana. Kandi abandi bagisoma rwebagyo batakabyamire. Notekereza bwire ki obusobora kuba burungi hali iwe?
YEGA EBIRUKUKIRAHO
Yega omulingo osobora kweyongera kwegondeza omu kusoma Baibuli. Rora omulingo osobora kwetakaniza kurungi nukwo ogasirwe muno omu kwesomesa Baibuli.
Nk’oku tusobora kwega kugonza kulya ebyokulya ebirukwahukana, nitusobora n’okwega kwegondeza omu kusoma Baibuli
4. Yega kwegondeza omu kusoma Baibuli
Nikisobora kukugumira kutandika kusoma Baibuli. Baitu nitusobora kutandika ‘kwegomba’ kugisoma, nk’oku omuntu ayega kugonza kulya ebyokulya ebyatakalyahoga. Musome 1 Petero 2:2, hanyuma mubazeeho ekikaguzo kinu:
Notekereza kakuba osoma Baibuli buli kiro, noija kweyongera kugonza kugisoma?
Mutekeho VIDIYO kurora omulingo abantu abamu batandikire kwegondeza omu kusoma Baibuli. Hanyuma mubazeeho ebikaguzo ebirukuhonderaho.
Kusigikirra ha vidiyo, bizibu ki ensinganto ebibaasingwire?
Kiki eky’abakonyire kugumira ha kigendererwa ky’abo eky’okusoma Baibuli?
Biki ebibakozere kusobora kwegondeza omu kusoma kwabo okwa Baibuli?
Amagezi agasobora kukukonyera kutandika:
Tunga Baibuli erukwesigwa, kandi ey’erukukozesa orulimi orwanguhire kwetegereza. Lengaho kusoma New World Translation obweraaba eri omu rulimi rwawe rundi omu rulimi orundi orw’okwetegereza.
Banza osome ebicweka bya Baibuli eby’orukukira kugonza. Kumanya eky’okukora, rora caati “Tandika Kusoma Baibuli.”
Handiika ebicweka eby’omazire kusoma. Kozesa caati “Manya Nambere Ogarukiire” ey’eri omu kitabu kinu.
Kozesa JW Library® app. N’osobora kugikozesa kusoma rundi kuhuliiriza Baibuli hoona nambere oli obu n’okozesa esimu rundi ekyoma ekindi ekya kalimagezi.
Kozesa Appendix eziri omu New World Translation. Zirumu maapu, caati, hamu na glossary ebisobora kukukonyera kwegondeza omu kusoma kwawe.
5. Tekaniza ebyorukugenda kwega
Musome Zabuli 119:34, hanyuma mubazeeho ekikaguzo kinu:
Habwaki kirungi kubanza kusaba otakasomere Baibuli rundi otakatekaniize ebyorukugenda kwega?
Nosobora ota kugasirwa muno buli murundi oyega Baibuli? Obworaaba n’otekaniza isomo omu kwega kunu, lengaho kuhondera amagezi ganu:
Soma obucweka obw’okubanza obw’isomo.
Soma ebyahandiikirwe ebyolekerwe, kandi olengeho kwetegereza omulingo birukukwatagana n’isomo eri.
Teeka emanyikirizo ha bigambo ebikuru ebirukugarukamu buli kikaguzo; kinu nikiija kukukonyera kwanguhirwa kuhingisaniza ebitekereezo ha isomo n’omwegesa waawe.
Obaire Okimanyire?
Abakaiso ba Yahwe bakozeseze empindura za Baibuli ezirukwahukana. Baitu tukira kugonza New World Translation of the Holy Scriptures habwokuba ehikire, n’eyetegerezebwa kurungi, kandi n’ekozesa ibara lya Ruhanga.—Rora ekicweka ekiri ha Mukura “Abakaiso ba Yahwe Baine Baibuli ey’Abo?”
ABANTU ABAMU BAGAMBA: “Kwega Baibuli kigumire muno. Nyowe obwire obu timbwine.”
Iwe n’otekereza ki?
OYEGERE KI?
Kusobora kugasirwa muno omu Baibuli, wetereho obwire obw’okugisoma, saba nukwo oyetegereze eby’orukugenda kusoma, kandi tekaniza buli murundi oraaba n’ogenda kwega.
Kweijukyamu
Kiki ekirakukonyera kugasirwa muno omu Baibuli?
Nidi obw’osobora kweteraho obwire obw’okusoma hamu n’obw’okwesomesa Baibuli?
Habwaki kirungi kutekaniza buli murundi obworukuba n’ogenda kwega?
SERULIIRIZA
Weijukye ebimu ha bintu ebisobora kukukonyera obworukuba n’osoma Baibuli.
“Omulingo Osobora Kugasirwa Muno omu Kusoma Baibuli” (Omunaara gw’Omulinzi Na. 1 2017)
Manya emiringo esatu ey’osobora kusomamu Baibuli.
Rora omulingo osobora kwegondeza omu kusoma Baibuli.
Tunga amagezi ag’okwesomesa kuruga h’abantu abamazire akasumi kaingi nibasoma Baibuli.