Ebikaguzo Kuruga Omu Basomi Baitu

Daudi obuyahandiikire ebigambo ebiri omu Zabuli 61:8, akagamba ngu yakukugiize ibara lya Ruhanga “ebiro byona.” Kinu kikamanyisa ngu tarukwija kufa?

Nangwa. Daudi ebiyahandiikire byali bihikire.

Tekerezaaho ebiyahandiikire omu rukarra oru hamu n’enkarra ezindi eziine ebigambo eburukusisana n’ebi: “Ndazinaga okukugiza ibara lyawe ebiro byona, mpikirizege obukyabukya ebirahiro byange.” “Ndakukugizaga, ai [Yahwe] Ruhanga wange, nomutima gwange gwona; kandi ndanyumizaga ibara lyawe ebiro nebiro.” “Kandi ndakukugizaga ibara lyawe ebiro nebiro.”​—Zab. 61:8; 86:12; 145:1, 2.

Daudi obuyahandiikire ebigambo ebi, atamanyise ngu talifa. Akaba akimanyire nk’oku Yahwe akaba agambire ngu okusiisa kw’abantu kwakurugiremu kufa, kandi na uwe wenka akaba aikirize ngu ali musiisi. (Kub. 3:3, 17-19; Zab. 51:4, 5) Akaba akimanyire ngu n’abasaija Ruhanga abayagonzaaga nka Iburahimu, Isaka, hamu na Yakobo bakafa. Kandi na uwe akaba akimanyire ngu yakuhikize obwire afe. (Zab. 37:25; 39:4) Baitu ebigambo bye ebirukusangwa omu Zabuli 61:8 bikooleka nk’oku akaba nagonza kandi acweriiremu kimu kukugiza Ruhanga ebiro nebiro, ekirukumanyisa ebiro byona Daudi obwakaba ali mwomeezi.​—2 Sam. 7:12.

Obwire obumu Daudi yahandiikaga ebintu ebiyarabamuga omu bwomeezi bwe nk’oku kyolekerwe omu bugambo oburukusangwa haiguru ya Zabuli esuura 18, 51, n’eya 52. Omu Zabuli 23, Daudi akasoborraho Yahwe nk’omuliisa ow’aha oburagirizi, obulinzi hamu n’okuhuumuza. Daudi na uwe akaba ali muliisa ayakoraga ebintu nk’ebi. Kinu kikaletera Daudi kugonza kuheereza Ruhanga ‘ebiro byona eby’obwomeezi bwe.’​—Zab. 23:6.

Ijuka ngu Yahwe nuwe yaterekeriize Daudi n’omwoyo ogurukwera kuhandiika ebintu ebi byona. Ebiyahandiikire byali birumu n’obunabbi obwakuhikiriziibwe omu kasumi ak’omu maiso. Ekyokurorraho, omu Zabuli 110, Daudi akahandiikaho akasumi nambere Mukama we ‘yakwikaliire ha mukono [gwa Ruhanga] ogwobulyo’ omu iguru kandi atunge obusobozi bwingi. Obwokukora ki? Obw’okuhwerekereza abanyanzigwa ba Ruhanga ‘n’okucwera amahanga emisango’ omu nsi. Masiya, ow’akaba ali mwijukuru wa Daudi, yakulemere kuruga omu iguru kandi yakubaire “nyakatagara ebiro byona.” (Zab. 110:1-6) Yesu akagamba ngu obunabbi oburukusangwa omu Zabuli 110 bukaba nibumukwataho kandi bwakuhikiriire omu kasumi ak’omu maiso.​—Mat. 22:41-45.

Ego, Yahwe akaterekereza Daudi n’omwoyo ogurukwera kuhandiika h’akasumi ke hamu na h’akasumi ak’omu maiso obwalihumburwa kandi akasobora kukugiza Yahwe ebiro n’ebiro. Nahabweki, Zabuli 37:10, 11, 29 n’ebazaaho akasumi nambere yahandikiirwe n’akasumi ak’omu maiso. Enkarra ezi zikahikirra omu kasumi ka Isaleri eyakara kandi niziija n’okuhikirra omu kasumi ak’omu maiso Yahwe obwarahikiriza emirago ye.​—Rora akacweka ka 8 omu kicweka “Oliba Nanyowe omu Rugonjo rwa Ruhanga” ekiri omu magaziini enu.

Zabuli 61:8 hamu n’enkarra ezindi eziine ebigambo nibyo bimu nizooleka nk’oku Daudi yagonzaaga kukugiza Yahwe omu Isaleri eyakara kuhikya obuyafiire. Kandi nizooleka kiki Daudi ekyalikora omu kasumi ak’omu maiso Yahwe obw’alimuhumbuura.