‘Mwerindege, Murolege!’

1. Kiki Yesu ekiyagambiire abegeswa be ekirukukwata h’akasumi akaha mpero, kandi kutererra ki okuyahaire abegeswa be?

OMU biro bike Yesu atakafiire, abegeswa be bbana bakamukaguza bati: “Tugambire binu nambere birihikirirra, nakokurorraho akokuija kwawe okukaliba, nakensi enu okuhwaho?” (Mat. 24:3) Nikizooka ngu abegeswa abo bakaba nibagonza kumanya nidi Yerusalemu na yekaru yayo byakuhwerekereziibwe. Omu kubagarukamu, Yesu atagarukire ha kubazaaho ha kuhwerekerra kwa Yerusalemu na yekaru kyonka, baitu akabazaaho n’okuhwerekerra okw’ensi enu eiturumu kasumi kanu, akagamba ati: “Ha kiro eki nobukakuba akasumi ako busaho abimanyireho, nobubakuba bamaraika abanyakuli omu iguru, nobwakuba Omwana, baitu Isenyowe wenka.” Hanyuma Yesu akabatererra kwikara ‘nibarora’ kandi ‘niberinda.’​—Mar. 13:32-37.

2. Habwaki kyali kikuru Abakristaayo ab’omu kyasa eky’okubanza kwikara bali bulindaara?

² Abakristaayo Abayudaaya ab’omu kyasa eky’okubanza bakaba basemeriire kwikara bali bulindaara kusobora kujuna obwomeezi bwabo. Yesu akagambira abahondezi be ebintu ebyakubakonyire kumanya nidi Yerusalemu na yekaru byakuhwerekereziibwe nukwo basobole kwikara bali bulindaara kusobora kujuna obwomeezi bwabo. Akabagambira ati: “Baitu obumulikarora Yerusalemu amahe gagyehinguliriize, nubwo mumanye ngu okuhwerekerra kwayo kumalize okuhika.” Omu kasumi ako, bakaba basemeriire kworobera okutererra kwa Yesu kandi batandike ‘kwiruka kugenda omu nsozi.’ (Luk. 21:20, 21) Abo abayorobiire okutererra kunu bakakira, Abarooma obubahwerekeriize Yerusalemu.

3. Biki ebiturukugenda kubazaaho omu kicweka kinu?

³ Kasumi kanu, nitwikara omu biro ebya ha mpero eby’ensi enu embi. Nahabweki, naitwe tusemeriire kwikara niturora kandi tuli bulindaara. Omu kicweka kinu, nitugenda kubazaaho nk’oku tusobora kwikara twine entekereza ey’ehikire obu niturora ebintu omu nsi nibibaho, omulingo tusobora kwerinda itwenka, n’omulingo tusobora kukozesa kurungi obwire obusigaireyo.

BA N’ENTEKEREZA EY’EHIKIRE OBWORUKUBA NORORA EBINTU NIBIBAHO OMU NSI

4. Habwaki tusemeriire kugonza muno kurora ebintu ebirukubaho omu nsi kasumi kanu nibihikiiriza obunabbi bwa Baibuli?

⁴ Haroho ensonga enungi habwaki tugonza kurora ebintu ebirukubaho omu nsi nibihikiriza obunabbi obw’omu Baibuli. Ekyokurorraho, Yesu akatuha orukarra orw’ebintu eby’embaganiza ebyakutukonyiire kumanya ngu empero y’ensi ya Sitaani eiriire haihi. (Mat. 24:3-14) Omukwenda Petero akatwekambisa kuteeka omutima ha kuhikirra kw’obunabbi nukwo okwikiriza kwaitu kwikale kugumire. (2 Pet. 1:19-21) Ekitabu eky’okumalirra omu Baibuli kitandikisa ebigambo binu: “Okusuku’rwa kwa Yesu Kristo, Ruhanga okuyamuhaire okwoleka abairube ebihikiriire okubaho bwango.” (Kus. 1:1) Nahabweki nitugonza muno kumanya ebintu ebirukubaho omu nsi kasumi kanu n’okumanya nk’oku bisobora kuhikiriza obunabbi bwa Baibuli. Kandi nitusobora kuba twine ekihika eky’okubazaaho ebintu ebi n’abagenzi baitu.

5. Kiki ekitusemeriire kwerinda, kandi kiki ekitusemeriire kukora? (Rora n’ebisisani.)

⁵ Obuturaaba nitubazaaho obunabbi bwa Baibuli, tusemeriire kwerinda kulengaho kutebesereza ebirabaho. Habwaki? Habwokuba titurukugonza kubazaaho ekintu kyona ekisobora kutabangura obumu omu kitebe. Ekyokurorraho, nitusobora kuhurra abebembezi b’ensi nibabazaaho omulingo basobora kumaraho obulemu omu kicweka ekimu n’omulingo basobora kuleetaho obusinge hamu n’obulinzi. Omu kiikaro ky’okutebesereza ngu ebigambo ebi nibihikiriza obunabbi oburukusangwa omu 1 Abasesalonika 5:3, nitwetaaga kwikara nitumanya obutumwa obuhyaka obuturukiibwe. Ebitubazaaho obu bisigikirra ha bintu ebiturukiibwe ekitebe kya Yahwe, tukonyera ekitebe kwikara omu bumu ‘n’omu kutekereza kumu.’​—1 Kol. 1:10; 4:6.

6. Masomo ki agatusobora kwega kuruga omu 2 Petero 3:11-13?

⁶ Soma 2 Petero 3:11-13. Omukwenda Petero n’atukonyera kwikara twine entekereza ey’ehikire obuturukuba nitubazaaho obunabbi obw’omu Baibuli. Atutererra kwikara ‘nitutegereza nitwegomba muno okwija kw’ekiro kya Yahwe.’ Habwaki? Habwokuba tikiri ngu nitugonza kumanya ‘ekiro n’esaaha’ Yahwe ekyalireteramu Haramagedoni, baitu habwokuba nitugonza kukozesa kurungi obwire obusigaireyo kukora ‘engeso zona ezirukwera n’okutiina Ruhanga.’ (Mat. 24:36; Luk. 12:40) Ekirukumanyisa ngu nitugonza kwetwaza omu mulingo oguhikire, n’okukigumya ngu ebintu byona ebiturukukorra Yahwe nibyoleka ngu nitumugonza muno. Kusobora kukora eki, tusemeriire kwerinda itwenka.

KWERINDA ITWENKA NIKIMANYISA KI?

7. Twoleka tuta ngu nitwerinda itwenka? (Luka 21:34)

⁷ Yesu atagarukire ha kugambira abegeswa be kwerinda hali ebintu ebirukubaho omu nsi kyonka, baitu nabo akabagambira kwerinda bonka. Ebigambo ebi nibyolekwa kurungi omu kutererwa okurukusangwa omu Luka 21:34. (Soma.) Wetegereze nk’oku Yesu yagambire: ‘Mwerindege inywenka.’ Omuntu obwayerinda wenka, aikara ali bulindaara kurora akabi koona akasobora kusiisa enkoragana ye na Yahwe, kandi akora kyona ekyarukusobora kukerinda. Obwakora eki, ayerindira omu kugonza kwa Ruhanga.​—Nfu. 22:3; Yud. 20, 21.

8. Omukwenda Paulo akatererra Abakristaayo kukora ki?

⁸ Omukwenda Paulo akatererra Abakristaayo kwerinda bonka. Ekyokurorraho, akagambira Abakristaayo ab’omu Efeso ati: “Nukwo mwerindege okumugenda nimwekenga, tikuli nkabadomadoma, baitu nkabamagezi.” (Bef. 5:15, 16) Sitaani aikara nalengaho kusiisa enkoragana yaitu na Yahwe, nahabweki Baibuli n’etutererra kwikara ‘nitumanya eki Yahwe ekyarukugonza’ nukwo tusobole kwerinda hali okutahirra kwa Sitaani kwona.​—Bef. 5:17.

9. Nitusobora tuta kwetegereza Yahwe ekyarukugonza tukole?

⁹ Baibuli tetugambira ebintu byona ebisobora kusiisa enkoragana yaitu na Yahwe. Baitu nabwo twine kwikara nitukora encwamu n’obukiraaba ngu ensonga ezimu tizirukubazibwaho omu Byahandiikirwe. Kusobora kukora encwamu enungi, tusemeriire kwetegereza “Mukama waitu [Yahwe] ekyarukugonza.” Eki nitusobora kukikora kuraba omu kwesomesa Ekigambo kya Ruhanga butoosa n’okukyecumiitirizaaho. Obuturayeyongera kwetegereza Yahwe eky’arukugonza kandi tukakurakuraniza “amagezi ga Kristo,” nitwija kweyongera kurubata “nkabamagezi,” nobukiraaba ngu tiharoho ebiragiro eby’okutugambira eky’okukora. (1 Kol. 2:14-16) Ebizibu ebimu byanguhire kwetegerezebwa, baitu ebizibu ebindi tibyanguhire kurorwa.

10. Ngeso ki ezimu ezitusemeriire kwerinda?

¹⁰ Zimu ha ngeso ezitusemeriire kwetantara nizitwarramu kuzanisa enyehurra z’omuntu oututarukusisana nauwe obuhangwa, kunywa n’okulya ekihinguraine, kubaza ebigambo ebirukusaaliza abandi, otwaliiremu n’okurora eby’okwesemeza ebirumu okurwana, ebisisani eby’orwanju, hamu n’ebintu ebindi nk’ebyo. (Zab. 101:3) Omunyanzigwa waitu Sitaani, aikara naserra buli kagisa koona kusiisa enkoragana yaitu na Yahwe. (1 Pet. 5:8) Kakuba tutaikara bulindaara, Sitaani nasobora kubyara omu bitekerezo hamu n’omu mitima yaitu embibo y’ihali, obutalibwesigwa, omururu, enobi, emyehembo, hamu n’okwahura enzigu. (Bag. 5:19-21) Ha kubanza enyehurra zinu nizisobora kuba zitali z’amaani muno. Baitu kakuba tutarahuka kugira ekitwakoraho kuzeihamu, niziija kugumizaamu nizikura nk’ekimera eky’obutwa kandi zituletere ebizibu.​—Yak. 1:14, 15.

11. Kabi ki akatanguhire kwetegerezebwa akatusemeriire kwerinda, kandi habwaki?

¹¹ Akabi akamu akatanguhire kwetegereza, nukwo kunywana abanywani ababi. Tekerezaaho enyikara enu. N’osobora kuba n’okora n’omuntu ow’atali omu h’Abakaiso ba Yahwe. Habwokuba n’ogonza omuntu ogu atunge ekisisani ekirungi h’Abakaiso ba Yahwe, ocwamu kuba muntu ow’embabazi kandi ow’arukukonyera. Kandi obwire obumu nosobora kwikiriza kulya nauwe ekyanyamusana. Omu kaire kake, otandika kulya nauwe ekyanyamusana buli kiro. Obwire obumu atandika kubaza ebigambo ebirukuhemura, kandi ha kubanza n’osobora kutabitaho omutima. Hanyuma y’obwire, otandika kumanyiira ebigambo ebi kandi otandika kubirora nk’ebitali by’akabi. Kiro kimu, omukozi mugenzi wawe ogu akuraaliza kugenda kunywamu hanyuma y’omulimo kandi oikiriza. Ekirugamu, otandika kuteekereza nkauwe. Omu kaire kake, noija kutandiika kwetwaza nk’omukozi mugenzi wawe. Amananu gali, nitugonza kuba bantu ab’embabazi kandi abarukutekamu buli muntu wena ekitiinisa, baitu tusemeriire kukiijuka ngu nitwija kwetwaza nk’abo abatucwamu kumara nabo obwire. (1 Kol. 15:33) Kakuba twerinda itwenka nk’oku Yesu yatutereriire, nitwija kwerinda abanywani ababi abatarukworobera endengo za Yahwe. (2 Kol. 6:15) Nitwija kurora akabi kandi tuketantale.

KOZESA KURUNGI OBWIRE BWAWE

12. Abegeswa ba Yesu bakaba baine kukora ki obu balindiriire okuhwerekerra kwa Yerusalemu hamu na yekaru?

¹² Yesu akaba nagonza abegeswa be kuba na bingi eby’okukora obu balindiriire okuhwerekerra kwa Yerusalemu hamu na yekaru. Yesu akabaha omulimo ogw’okukora. Akabaragira kutebeza amakuru amarungi “omu Yerusalemu, na Buyudaya bwona, nomu Samaliya, nokuhikya empero zensi.” (Eng. 1:6-8) Obu kabukaba bujunanizibwa bw’amaani Yesu obuyahaire abahondezi be! Bakakozesa kurungi obwire bwabo, kuraba omu kwemarra ha mulimo ogukaba gubahairwe.

13. Habwaki tusemeriire kukozesa kurungi obwire bwaitu? (Abakolosai 4:5)

¹³ Soma Abakolosai 4:5. Kusobora kwerinda itwenka, tusemeriire kutekerezaaho omulingo tukozesaamu obwire bwaitu. ‘Obutandu’ nibusobora kuhikaho buli omu haliitwe. (Mug. 9:11) Nitusobora kufa omu mulingo ogwa bwangu bwangu.

14-15. Nitusobora tuta kukozesa kurungi obwire bwaitu? (Abaheburaniya 6:11, 12) (Rora ekisisani.)

¹⁴ Nitusobora kukozesa kurungi obwire bwaitu, kuraba omu kukora Yahwe eby’agonza hamu n’okugumya enkoragana yaitu nauwe. (Yoh. 14:21) Tusemeriire ‘kuguma, okutatabaana, nitwekamba butoosa omu mirimo ya Mukama.’ (1 Kol. 15:58) Hanyuma empero obwerahika, keebe y’obwomeezi bwaitu rundi ey’ensi enu embi, titurukwija kweijukya ngu kakuba twakozere ekirukukiraho omu kuheereza Yahwe.​—Mat. 24:13; Bar. 14:8.

¹⁵ Kasumi kanu, Yesu nakyagumizaamu kwebembera abegeswa be omu mulimo ogw’okutebeza Obukama bwa Ruhanga omu nsi yoona. Ahikiriize ekiyayeragire. Kuraba omu kitebe kya Yahwe, Yesu natutendeka nk’oku tusobora kutebeza, kandi natuha ebikwato ebiturukwetaaga nukwo tusobole kutebeza amakuru amarungi. (Mat. 28:18-20) Tukora eki Yesu ekyarukutunihirramu kuraba omu kwekamba omu mulimo gwaitu ogw’okutebeza n’okwegesa, n’okwikara tuli bulindaara obu tulindiire Yahwe kuleetaho empero ey’obusinge bunu. Obuturateeka omu nkora obuhabuzi oburukusangwa omu Abaheburaniya 6:11, 12, nitwija kukwatira kimu okunihira kwaitu “okuhika ha mpero.”​—Soma.

16. Kiki ekitucweriiremu kimu kukora?

¹⁶ Yahwe akateekaho ekiro n’esaaha eyalireteraho empero y’ensi ya Sitaani. Ekiro eki obukirihika, Yahwe naija kuhikiriza obunabbi bwona obuyahandikisize omu Kigambo kye. Baitu obwire obumu nitusobora kutekereza ngu empero y’obusinge bunu ekereriirwe kuhika. Baitu, ekiro kya Yahwe tikirikerererwa! (Hab. 2:3) Leka tucweremu kimu kwikara ‘nitutegereza Yahwe,’ obu ‘nitulindirra Ruhanga ow’okujunwa kwaitu.’​—Mik. 7:7.