Hulda Akahika ha Kigendererwa Kye

HA KIZINGA ekirukwetwa Sangir Besar ekirukusangwa omu Indonesia, haikarayo banyaanya itwe basatu. Emyaka nke enyuma, banyaanya itwe banu bakaba nibakorra hamu ha musa gw’enyanja. Bamanyirwe muno ha kizinga kinu habw’omulimo gw’okutebeza. Baitu omu kasumi ako, baali nibakora omulimo ogurukwahukana n’ogubaakiraga kukora.

Bakabanza baagenda omu maizi baihayo amabaale amakooto, baagaleeta ha musa gw’enyanja. Amabaale agamu gaali makooto muno, nigaingana n’omupiira gw’okusamba. Baikarraga ha butebe obubaizirwe omu miti, nibakozesa enyondo kuhonda amaabale nukwo baihemu obucweka obutaito oburukukiraho ihuli ly’enkoko. Baabuhimbiraga omu bbaketi nibabutwara nambere baikaraga. Hanyuma, baabuteekaga omu bideeya ebikooto nibabupakira ha roole ezabutwaraga kukozesebwa omu kukora enguudo.

Omu ha banyaanya itwe banu akaba nayetwa Hulda. Enyikara ye yamusobozesaaga kumara obwire bwingi nakora omulimo gunu kukira banyaanya itwe abandi. Yakozesaaga sente eziyatungaga kuhikyaho ab’omu ka ye ebyetaago. Baitu hati, akaba nagonza kugira sente eziyayahura habw’ekigendererwa ekindi. Akaba nagonza kugura tabbuleti nukwo asobole kukozesa JW Library^®. Hulda akaba akimanyire ngu vidiyo n’ebintu ebindi ebiroho bikaba nibiija kumukonyera kusemezaamu obuheereza bwe n’okweyongera kwetegereza kurungi Baibuli.

Hulda akacwamu kuzindukaga obwire obw’okutandika kukora butakahikire, nakora kumara esaaha ibiri habw’okwezi kumu n’ekicweka. Omu kasumi ako, akahonda amabaale agasobora kwijuza akaroole akataito. Hakumalirra akasobora kutunga sente ezirukumara kugura tabbuleti.

Hulda n’agamba ati: “N’obukiraaba ngu nkaba njwahire muno kandi ninsaasa habw’omulimo ogunkaba ninkora, obunatungire tabbuleti kandi nagikozesa omu buheereza n’okutekaniza ensorrokano, nkaba ntakyaijuka obujwahi obu bwona.” Hulda n’agamba ngu tabbuleti ekamukonyera oburwaire bwa Korona obubukaba bukyacwekereho habwokuba ensorrokano zoona zabaga ha byoma byakalimagezi. Nitusemererwa hamu na Hulda habw’okuhika ha kigendererwa kye.