Ebikaguzo Kuruga omu Basomi Baitu

Omulimo gw’okutebeza amakuru amarungi gulihwaho di?

Yesu akagamba: “Kandi amakuru ganu amarungi ag’Obukama, galitebezebwa omu nsi yoona nk’obwakaiso hali amahanga goona, kandi nubwo empero erihika.” (Mat. 24:14) Ekigambo ky’Oruyonaani “empero” ekirukukozesebwa omu rukarra runu hamu n’orukarra orwa 6 na 13 nikyo teʹlos. Nikimanyisa okuhwaho okw’ensi ya Sitaani ha bulemu bwa Haramagedoni. (Kus. 16:14, 16) Nahabweki, nitwija kugumizaamu nitutebeza amakuru amarungi kuhikya akasumi obulemu bwa Haramagedoni buli haihi kutandika. Kinu nikihinduramu ha nyetegereza ei twikaire tumanyire.

Enyumaho, tukaba tumanyire ngu nitwija kulekeraho kutebeza amakuru amarungi omuhito omwingi obu guraatandika n’okuhwerekerezebwa kwa Baburooni Orukuru. (Kus. 17:3, 5, 15, 16) Twaikirizaaga ngu hanyuma y’omuhito omwingi kutandika, Yahwe aliba atakyaha abantu omugisa ogw’okuhurra amakuru amarungi. (Is. 61:2) Ekindi, twateekerezaaga ngu abo abaraakiraho omuhito omwingi nubo abaayoolekere ngu nibaheereza Yahwe n’obwesigwa omuhito omwingi gutakatandikire. Twabalengesanizaaga n’Abayudaaya abaakizireho okuhwerekerezebwa kwa Yerusalemu omu 607 Y.A.K. Abantu banu bakaba batairweho ira emanyikirizo habwokuba baaramyaga Yahwe kandi banga obubi. (Ez. 5:11; 9:4) Baitu eki tikirukwikiraniza n’ebigambo bya Yesu ebirukusangwa omu Matayo 24:14, ebirukwoleka ngu abantu nibasobora kutunga omugisa ogw’okuhuliiriza amakuru amarungi kuhikira kimu omu kasumi obulemu bwa Haramagedoni obu buliba buli haihi kutandika.

Enyetegereza yaitu empyaka eya Matayo 24:14 neehindura enyetegereza ei twikaire tumanyire ha butumwa obuli nk’orubaale oburukubazibwaho omu Okusuukururwa 16:21. Okwekebiija okundi okw’ebyahandiikirwe kwolekere ngu ebyahandiikirwe binu bibiri nibikwatagana. Omu mulingo ki? Eky’okugarukamu nikisigikirra ha mulingo abantu beetwazaamu hali amakuru amarungi. Omukwenda Paulo akahandiika ngu hali “abo abarukujunwa,” amakuru amarungi kuli, “kuboya okw’obwomeezi.” Baitu hali abanyazigwa ba Ruhanga gali makuru mabi, rundi “kijunde eky’okufa.” (2 Kol. 2:15, 16) Nibanoba amakuru amarungi ag’Obukama habwokuba gooleka kyonyini ensi yabo eki eri, kandi eki nikyo ngu mbi, neeremwa Sitaani kandi niija kuhwerekerezebwa.—Yoh. 7:7; 1 Yoh. 2:17; 5:19.

Weetegereze ngu orubaale orw’akokurorraho omuhito gwarwo “mwingi muno.” Kinu nikisobora kumanyisa ngu omu kasumi ak’omuhito omwingi, omulimo gw’okutebeza gulibamu obutumwa oburukutuntuza kandi bulihikaho abantu baingi kukira na kara. Ekirirugamu, abantu baingi balimanya ibara lya Yahwe. (Ez. 39:7) N’omu kasumi ako hanyuma y’okuhwerekerezebwa kwa Baburooni Orukuru, abantu abamu balitwara obutumwa bwaitu nk’okuboya okw’obwomeezi? Nikisoboka. Obundi baliijuka rundi bamanye ngu kumara emyaka nyingi Abakaiso ba Yahwe baabazaahoga okuhwerekerezebwa okw’amadiini ag’ebisuba.

Kinu nikisisanaho n’ekyabaireho omu ihanga lya Misiri hanyuma y’Emihito Ikumi. Hanyuma ya Yahwe ‘kucwera baruhanga ba Misiri omusango,’ abantu be bakeeteranizibwaho ‘ekitebe ekyabanyaihanga’ abakaba batali Baisaleeri. (Kurug. 12:12, 37, 38) Abantu banu nibasobora kuba baacwiremu kugenda n’abantu ba Yahwe hanyuma y’okurora Emihito Ikumi Musa ei yarangire n’ehikirra.

Omuntu weena ow’alitandika kuheereza Yahwe hanyuma y’okuhwerekerezebwa kwa Baburooni Orukuru, naija kutunga omugisa ogw’okusagika bagenzi ba Kristo abaliba bakyali omu nsi. (Mat. 25:34-36, 40) Omugisa ogw’okubarwa nk’entaama nigwija kuhwaho obulemu bwa Haramagedoni butakatandikire, abaseeserweho amagita obu balitunga empeera yabo omu iguru.

Enyetegereza enu empyaka neeyooleka okugonza kwa Yahwe hamu n’embabazi ze. Ego, “tarukugonza omuntu weena ahwerekerre, baitu naagonza boona beegarukemu.”—2 Pet. 3:9.