Naa had mayse see fẽẽre mbuɗgi maa ni Yeson wo là?

1. Wãã ti fẽn maaga srog glog Yeso joŋ fẽn mbuɗgi maa tanguŋ ɗa.

ƊIG mbo ti fẽn maaga hres de ancoo nen kiŋgi maa 29 B.B.Y., ti tĩĩgi wer joŋre siigi wããre Yeson ɗa. À hay ɗe Yeso, man ɓe Mari, lan jar maa wer ɓe maa po wo ti few dage wãy po wo Kana, sir po ga hay ti jeŋ Nazared. Mari hay go de koge ti feele jar da kããran wo no, day se hay kayge maa yãã waare jar wur sen lay. Amaa ti few sen, re sõõre po hay le’ da’ ɓi feele sen wo de jar da kããran wo no​—yiin pẽẽ.b Maa po ga wer maaga ngaɓa jar hay de daŋ maaga à hay ɗe ra le mono. Mari mbiɗ nen deparday ko weel ɓen day wãã ga: “Yii bay peel jar wa so hase.” (Jaŋ 2:1-3) Yeso joŋ joŋge là? Á joŋ fẽn po maaga hay joŋ ti boŋ ga​—á kol bii go diŋ “yii maa de cõõre.”​—Jaŋ 2:9, 10.

2-3. (a) Yeso joŋ diŋ fẽẽre mbuɗgi mayse wo là? Naa da’ mayse see fruggi nen wããre fẽẽre mbuɗgi maa ni Yeson wo là?

² Yeso joŋ fẽẽre mbuɗgi maa tigriŋ wo de maaga á hay gesiŋ la mono.c Á joŋ joŋre de ẽgre ɓen maa kay jar de daŋ ndar hwale. Naa ngaɓ fẽẽre mbuɗgi po ɓoge​—á hay re jar twar nen 5,000, blam 4,000 pa​— maa po ga tay wo ɓuy de daŋ jar 27,000 hayga naa kee naare wo de weere maaga hay wo ti ngeel ni we lay no. (Matiye 14:15-21; 15:32-38) Ti wur sen wo ɓog ɓuy, Yeso pẽẽ jar ceege wo go ni ngaɓa debaŋ. (Matiye 14:14; 15:30, 31) Ɗig ba ti maaga fẽẽre mbuɗgi sen ngris wo jar maaga Yeso pẽẽ ra go lan hã rege ne hara mo ɗa!

³ Fẽẽre mbuɗgi maa ni Yeson kay wo naa wara debaŋ. Nen hadge sen la, naa wãã yaŋ ti hadge maaga naa da’ see fẽẽre mbuɗgi sen wo mono. Blam, naa wãã yaŋ ti ferge ti gesiŋ wo de koge decoo maaga Yeso naa nen ɓaara go de joŋ fẽẽre mbuɗgi wo mono.

HADGE TI JEOFA WO DE YESO

4. Fẽẽre mbuɗgi maa ni Yeson ya’ wo hãge ɓil naa ciŋ ti woselà?

⁴ Fẽẽre mbuɗgi maa ni Yeson ya’ wo hãge ɓil naa ciŋ bay ti ɓe tawa wa, amaa ti Pan ɓe lay. Sen diŋ wer ga Jeofa diŋ kããge fẽẽre mbuɗgin wo no. Joŋre 10:38 wãã ne naa ga: “Baa hã nenterse ɓe ma bay ɗagn go ne Yeso. Nday yaŋ de ko ge lay ga á hay raŋ sir we joŋ jar de ele, pẽɗ jar maga Manhúulí de saɗ rage go, werga Baa de ɗaw ge ɓe doo.” Á mo hay nen ɓo ga fẽẽre maaga Yeso wãã ra, joŋ ra, lan fẽẽre mbuɗgi ɓen wo ɓuy, naa wo go diŋ nen ɗiggi Pan ɓe. (Jaŋ 14:9) Naa ko we hadge po wo swa’ ga naa da’ see fẽẽre mbuɗgi maaga Yeso joŋ ra mo ɗa.

5. Mayse hay srog glog Yeso joŋ fẽẽre mbuɗgin wo là? (Matiye 20:30-34)

⁵ Taŋgu, Yeso wo de Pan ɓe da wo naa debaŋ. De maaga Yeso hay gesiŋ la mono, Yeso naa nen dage ɓe maa debaŋn go see jare. Á joŋ fẽẽre mbuɗgi maa kay jar maaga hay wo ti bone. Ti wur po, jar rewre po wo ɓog ngar wo jag ne Yeso ti ga á mo kay saara. (Jaŋ Matiye 20:30-34.) Á mo hay nen ɓo ga “á[ . . . ]ko wo decoo nen Yeso” day se pẽẽ ra go. Wããre maa jag greg ga “koge decoo” mono, wãã diŋ ti “weere ɓiiri”, kaŋ nen ga koge decoo maaga ɗig mo debaŋ. Koge decoo sen joŋ see ne Yeso doo ga weere ɓiiri ɓe hay go klew ge nono. Sen diŋ maa naa nen dage ɓe maa debaŋn go see jare. Se diŋ wersen so ga Yeso pẽẽ jar cíin wo go, lan hã rege ne jar maaga hay wo koŋne mono. (Matiye 15:32; Mark 1:41) Naa go de bawge jag jiili naa ga Jeofa, Baa maa “ko decoo jar debaŋ no”, lan Weel ɓen, da wo naa debaŋ, lan law wo ti naa de maaga naa de joŋ bon mono. (Lug 1:78; 1 Piyer 5:7) Á wo go de gorge bay yõõ ti maa caa wer bon maaga jar téebeere wo nen ɓe wara mo go.

6. Baa hã ẽgre maa hõn ne Yeso là?

⁶ Maa de ɓog no, Baa hã ẽgre ne Yeso maa ‘wũy re maa see jar téebeeren wo go ɓuy. De maaga Yeso hay joŋ fẽẽre mbuɗgi ɓen wo mono, se hay ngaɓge ga se de kããge maa ‘wũy re maa de raw ẽgre jar téebeeren wo mo ɓuy. Ko ba ɗa, á de kããge maa yãã naa go jag fẽẽre maaga a wo de re ne jar téebeere wo ti: ɓlagge maaga Adam ya’ ne naa de re maa wer ɓen wo doo ceege, lan húulí. (Matiye 9:1-6; Rom wo 5:12, 18, 19) Fẽẽre mbuɗgi ɓen hay ngaɓ wo go ga á hay de kããge maa pẽẽ wer ceege maa hõnla wo go ɓuy,lan maa bir húulí wo go. (Matiye 4:23; Jaŋ 11:43, 44) Á de kããge maa ko ngar leege maa de ẽgre, lan yãã jar maaga hay wo de sõõre ti wo go. (Mark 4:37-39; Lug 8:2) Ẽgre maaga Jeofa hã ne Yeso baw naa go jag jiili debaŋ!

7-8. (a) Fẽẽre mbuɗgi maa ni Yeson hã wo bawge go ne naa jag jiili ga hãylà? (b)  Ndo de gor fẽn mbuɗgi maa hõn debaŋ de daŋ lan wo ɓuy ɓil sir maa defayn là?

⁷ Maa de swa’ no, naa hay de kaŋ ɗiggi ga bosa’ maaga naa de gor rage bag wo jag go wer Twaywaŋ maa ni Baan cwãy cwãy. Fẽẽre mbuɗgi maaga Yeso joŋ ra de maaga á hay gesiŋ doo jee taabay la had wo naa ga á joŋ ge yaŋ de daŋ sen peel hãã werga á diŋ Waŋ maa ti Twaywaŋ maa ni Baa no. Naa ɗig ba mbe ti fẽn maaga naa joŋge de maaga Yeso kol we wãã wããre naa mo ɗa. Naa le’ ceege ga so, werga á caage wer ceegen wo go ɓuy, lan re maaga hay wo joŋ bon jar téebeere wo mo go ɓuy. (Esay 33:24; 35:5, 6; Naage nene 21:3, 4) Koŋne le’ naa ga so, lan fẽẽre maa doo leege maaga ɓlag fẽẽre, doo bii maŋge, joŋ wo ga so. (Esay 25:6; Mark 4:41) Naa yããge waare jar dage naa maa “ɓi tuu” maaga Baa fer ɗig ti ti ɓaara maa bir ra ge le go yaŋ de fruygi debaŋ. (Jaŋ 5:28, 29) Ndo de gor fẽn mbuɗgi ma hõn debaŋ de daŋ lan wo ɓuy là?

⁸ De maaga á hay joŋ fẽẽre mbuɗgi wo mono, Yeso naa nen joŋre maaga naa mo hay bir jag ɓe ti ɓaara​—ferge ti gesiŋ wo de koge decoo jare. Naa ko maapo wo see ɓaara ɓoge, ti fẽn maaga á hay joŋ wo ti few dage wãy ɓi sir Kana mono.

YESO HAD NAA DE FERGE TI GESIŊ

9. Yeso joŋ mayse ti wur dage wãy po là? (Jaŋ 2:6-10)

⁹ Jaŋ Jaŋ 2:6-10. De maaga yii taw go ti fewn mono, á hay diŋ doole see Yeso maaga á mo joŋ mopo yawlà? Bay wa. Profesi po hay bay de wããge ga Mesin joŋ ge yii yaŋ de fẽn mbuɗgi po wa. Amaa ko ba mbo doo ga yii mo taw go ti wur dage wãy ɓo ɗa: á joŋ see ne ndo na joŋge là? Maa po ga jar maa da kããran wo de jar maa liŋ ni ɓaara hay wo ko decoo nen Yeso, day se ɗig ga se yãã ra go jag re sõõre se no. Wersen, se joŋ fẽn mbuɗgi doo maaga naa ko le ti tĩĩgi wer hadgen la nono. Á kol bii​—lidir 390 go yii maa de cõõre debaŋ. Maapo ga á hay kol yii sen wuŋ maaga tee ɓe mo gwan ni, nen maaga jar da kããran mo joŋ wo joŋre de ɓe blam, noga mo yee wo ne go maa da’ sungu ɓaara. Sen go tinoo tu ga á hay coo jag jar da kããran wo debaŋ!

10. Wer fẽẽre maa hõn wo de woore ga naa da’ ɓil Jaŋ 2 là? (Ko foton lay.)

¹⁰ Ko fẽẽre po de woore ga naa da’ ɓil Jaŋ 2 ɗa. Ndo mbo de koge ga hay baa cããgen wo de bii bay Yeso ti see ɓe wa ga yawlà? Maaga á mo wii ga se wa mono, Yeso wii ne jar maa joŋ joŋre ti ngeel few dage wãyn wo ga á mo baa wo cããgen wo go de bii. (Verse 6, 7) Day blam maaga á kol bii go yii mono, Yeso bay le de ɗaa yii ti see ɓe ne waŋ fewn wa. Amaa, á wii diŋ jar maa joŋ joŋre ti ngeel fewn wo no. (Verse 8) Yeso bay de ɗaa yii ooge pel jar deŋ wãã ge ga ‘Gus we mbay yii maaga ndi joŋ mo kay ɗa la!’ wa.

11. Fẽn mbuɗgi sen ni Yeson had naa ga hãylà?

¹¹ Naa had mayse see fẽn mbuɗgi maaga Yeso kol bii go yii là? Naa had ni diŋ ferge ti gesiŋ. Yeso maŋ ti see ɓe ciŋ ti fẽn mbuɗgi sen ga; á maŋ ti see ɓe ciŋ ti boŋ ti fẽẽre maaga se joŋ ra mo ga hase pa. Ba yaw mono, á joŋ ga raage ɗu mo hay diŋ maa Pan ɓe tum ti fẽẽre ngaɓa, de ferge ti gesiŋ. (Jaŋ 5:19, 30; 8:28) Hayga naa joŋ we doo Yeso de ferge ti gesiŋ lay no, naa maŋ ti see naa ciŋ ti fẽẽre maaga naa joŋ ra ga. Koh naa mo joŋ ba ti joŋre maa ni Jeofan diŋ may ne, naa mo maŋ ti see naa ciŋ wa; amaa diŋ ɗu Baa, jee maaga naa de goŋ ge ɓe mo no. (Jeremi 9:23, 24) Naa fer we raage ɗuu ɓen ne hẽne. De sen ɓuy, naa joŋ ba mayse yaŋ ga bay wii kayge do Jeofa là?​—1 Korente wo 1:26-31.

12. De ɗeŋ maa hõn ga naa fer ti see na gesiŋ doo Yeso ne pa là? Ngaɓn de sablaŋ po.

¹² Ko ba ɗeŋ maa tigriŋ ga naa fer ti see naa gesiŋ doo Yeso ɗa pa. Ɗig ba ti re maa po mo ta’ la ɗa: Jee maa peel tiŋ Baa po ig deɓaŋ kay jee kay jar maa peel tiŋ Baa po, maaga á mo bag jag see ɓe go see siigi wããre ɓe maa taŋgu no. Wer kayge sen, hẽn naa sen la sii wããre maaga jor glog jar maa ti taygen ɓuy. Blam tayge ti sen mono, hẽn naa po ya’ ti jeŋ jee maa peel tiŋ-Baan day wãã ga: ‘Hẽn naa sen sii wããre de woore debaŋ lay ga?’ Jee maa peel tiŋ-Baa de yiŋ jag na ga hãy, ga ‘Ãã, werga ndi kay ne debaŋ’ yaw? Noga de ferge ti gesiŋ wãã ga: ‘Ãã, á joŋ ne de woore debaŋ; á fruy ɓil ɓi debaŋ?’ De maaga naa yaŋ fer ti see naa gesiŋ no, naa bay maa wããge ga á diŋ wer fẽẽre maaga naa joŋ ne jar lan ga á joŋ wo fẽẽre de woore na wa. Á fruy naa de maaga naa laa ga fẽẽre maaga naa joŋ ra coo wo jag Jeofa mono. (Tab ra de Matiye 6:2-4; Hebre wo 13:16) Cwãy tu, naa coo jag Baa, hayga naa yaŋ fer ti see naa gesiŋ doo Yeso ne lay no.​—1 Piyer 5:6.

YESO HAD NAA TI ƁAŊ KO GE DECOO JARE

13. Yeso hay ko mayse de maaga á wo de kalge ɓil Nayn mo là, day se joŋ mayse là? (Lug 7:11-15)

¹³ Jaŋ Lug 7:11-15. Naa ɗig pa ti fẽn maaga hres nen kiŋgi maa 31 ti wur siigi wããre Yeson mo ɗa. Á wo Nayn, prog po wo ɓil Galile, mbaŋ se Sunem ti ngeel maaga profet Elise hay bir mbarga wãy po go kiŋgi de daŋ 900 taŋgu ni mono. (2 Waŋre wo 4:32-37) De maaga Yeso kos jagjiŋ maa kalge wo ɓi leegen mo kay, ko la jar de seege de húulí sugi. Se diŋ fẽn maaga hã lawge ne jar debaŋ​—mbarga wãy dwuri po ni ne kay boŋ tu húu go. Amaa, wãyn bay nen lawge boŋ wa; ngaɓa maa ɓi sir hay see ɓe ni. Yeso baa ti jar seege de húulí no, day joŋ mopo maa de woore debaŋ ne man mbarga no​—á bir mbarga ɓen go! Se diŋ birgi húulí maa taŋgu yoo maa swa’a ga naa da’ ɓil kefder Wããre maa de cõõren wo mono.

14. Wer fẽẽre maa hõn wo de woore ga naa da’ ɓil Lug 7 la ne? (Ko foton lay.)

¹⁴ Ko fẽẽre po de woore ga naa da’ ɓil Lug 7 ɗa. Ndo mbo de koge ga Yeso “wo koge ɓe [ man mbarga no] mo kay” á raw “ko decoo nen ɓe debaŋ”? (Verse 13) Day, fẽn maaga á ko​—maa po ga roo wãy no, de maaga á de seege peel húulí mbarga ɓen mono​—raw hã lawge ne Yeso ti wãyn debaŋ. Á taw diŋ de koge decoo nen Yeso tawa ga. Amaa, á naa nen koge decoo ɓen go. Á wãã wããre ne hẽn de gẽẽge maa de woore, ga: “Ra wa.” Blam sen Yeso raw joŋ fẽn tigriŋ maa kay wãy no. Á fer mbargan le go tenene lan se “raw hãge ɓe ne man ɓe.”​—Verse  14, 15.

15. Naa da’ hadge mayse wer fẽn mbuɗgi sen ni Yeso là?

¹⁵ Naa da’ mayse see fẽn mbuɗgi maaga Yeso bir weel wãy dwurn go mo là? Hadge maaga naa da’ see ɓe diŋ koge decoo jar maaga wo nen re húulí mono. Á mbe cwãy ga naa kãã maa bir jar go doo Yeso ne ga. Amaa, hayga naa yaŋ ko re maa see jar maaga re húulí de ndar rage doo Yeso no lay, naa kãã maa ko decoo ɓaara. Naa naa nen koge decoo ɓaaran go diŋ de wãã fẽn maaga kay ra yaŋ, lan de joŋ fẽn maaga naa de kããge maa joŋge ɓe ga kay ra yaŋ, lan ga coɓ ra yaŋ lay mono.d (Jag jõõ wo 17:17; 2 Korente wo 1:3, 4; 1 Piyer 3:8) Koh wããre maa me’ me’ wo de hãge fẽẽre maa me’me’ kay wo ra debaŋ.

16. Doo ga foton ngaɓ mo ta’ la ne mono, sablaŋ wãy maaga mbarga ɓe húu go had mayse mo là?

¹⁶ Naa ko we saɓlaŋ po ɗa. Kiŋgi go wara mbage, maygeman naa po hay ‘wa siŋ ti tiŋ-Baa, nen ɓe le’ ne wãy po ti de raage. Siŋn hay wããge diŋ ti kaŋge ɗiggi ti birgi húulí wo le go, day may wãy sen hay de húulí ti naw le go taŋgu me’e. De maaga á ko ne no kay tu, maygeman naan ya’ wo ti jeŋ ɓe deparday tu, ɓo’ do ne hẽn faale, lan se ɓo’ jag ‘waa siŋn go de ɓe. Wãyn wãã go blam hãã ga: “Ndi ko ga hẽẽrebe da wo ndi debaŋ.” Á fruy debaŋ ti maaga se hay wo ti taygeti wur sen mono. Á wãã pa ga: “á da’ kayge na diŋ ti tiŋ-Baa.” Naa go de bawge jag jiili naa ga fẽẽre maa me’me’ maaga naa joŋ ra maa naa nen koge decoo naan go see jar maaga “jiili ɓaara go de carge” coo wo jag Jeofa.​—Siŋ wora 34:19.

PROGRAM FRUGGI NEN WÃÃRE BAA MAA DE WOORE

17. Naa laa nen hadge sen la diŋ maylà?

¹⁷ Maaga naa frug nen wããre fẽẽre mbuɗgi maa ni Yeson wo we, se ya’ hãge ɓil naa ciŋ debaŋ. Á had wo naa ga Jeofa wo de Yeso da wo naa debaŋ, ga Yeso de kããge maa ‘wũy re maa see jar téebeeren wo ɓuy, lan ga naa kaŋ ɗiggi ti bosa’ maaga Twaywaŋ maa ɓen bag ge jag ɓaara go la mbaŋ mono. De maaga naa frug nen fẽẽre mbuɗgi sen wo mono, naa ɗig we ti ɗeŋ maaga naa bir jag Yeso yaŋ ti joŋre ɓen wo mono. Á bay ba de woore maaga ndo mo maŋ program fruggi nen Wããre Baa maaga ndo boŋ ɓo, noga maa ɓi feele ti fẽẽre mbuɗgi maa tigriŋ wo ga Yeso joŋ ra wa yawlà? Kiɗ hadge maa ɓil ɓaaran wo no, lan wãã ra ne jar tigriŋ wo lay. Joŋge doo sen ne kay, kay mo maa ndalge ti wããre maa de woore wo de jar maa tigriŋ wo!​—Rom wo 1:11, 12.

18. Hadge maa peeln la wãã yaŋ ti mayse wo là?

¹⁸ Go ti tawge ti siigi wããre ɓen mono, Yeso joŋ fẽn mbuɗgi maa blam taw ti birgi jar ɓe maa de swa’a ga de yerge mono. Amaa birgi maa sen la sara de maa lan wo no​—á hay bir diŋ bar ɓe maaga á dan debaŋ, ga hay go de húulí naw naa. Naa da’ hadge mayse wo see fẽn mbuɗgi sen là? Lan naa ya’ hãge ɓil naa ciŋ ti gorge birgi húulín na ya’ge là? Hadge maa peeln la wãã yaŋ ti wiigi jag sen wo lam no.