Jeofa yiŋ jag ti tosge naa wo na yiŋgi là

1-2. Day maa po naa wii jag see naa ti tosge naa wo ga hãylà?

NDO wii jag see ɓo we go ti boŋ ga Jeofa mbe na de yiŋ jag ti tosge ɓo wo yawla yaw? Hayga yaŋ no, ni se bay diŋ ndo boŋ wa. Hẽẽrebe po wo ngaɓa debaŋ wãã wo ga saara hay wiɗ jag see saara doo sen no lay, debaŋ ɓe de maaga á hay wo nen bon mono. Hayga naa yaŋ nen bon no, naa kãã maa da’ wer go de woore ne yiŋgi jag Jeofa ti tosge naa wo ga.

² Naa ko yaŋ la wer mayse ga naa mo hay go de bawge jag jiili naa ga Jeofa yiŋ jag ti tosge jar maaga wo de goŋge ɓe mo la (1 Jaŋ 5:15). Naa wãã yaŋ ti wiigi jag maa peeln wo la lay: Wer mayse ga de ngar ngeel maa po wo naa kal koge doo ga Jeofa bay yiŋ jag ti tosge naa wo wa là? Jeofa yiŋ jag ti tosge wo wara na yiŋgi là?

MAAPO JEOFA YIŊ JAG DOO MAAGA NAA HAY DA NO GA

3. Wer mayse ga Jeofa da ga naa mo tos se là?

³ Bible hã bawge go ne naa jag jiili ga Jeofa da naa debaŋ, lan ga naa de cõõre jag ɓe debaŋ lay (Aje 2:7; 1 Jaŋ 4:10). Wer sen ga se wii naa so ga naa mo wii kayge do se nen tosge mono (1 Pi. 5:​6, 7). Á da kay naa maaga naa mo lag see se mbaŋ, lan da ga naa mo dur bon maaga naa nen ɓaara wo de woore.

4. Naa ko koge ga Jeofa yiŋ jag ti tosge jar maaga goŋ wo ne mo là? (Ko foton lay).

⁴ Naa jaŋ tum ɓil Bible ga Jeofa hay yiŋ jag ti tosge jar maaga hay wo goŋge ɓe mono. Ndo yaŋ ɗiggi ti saɓlaŋ po boŋ? Doo saɓlaŋ Waŋ Dafid? Ti naw ɓen ɓuy se hay ti bon do jar hee ɓen wo no, day se hay wii kayge do Jeofa tum nen tosge. Ti wur po á kam Jeofa ga: “Manwuri [Jeofa], ndi de ɗe ndo: Á le ɓiŋ ɓi deparday! Kaŋ sug ɓo laa gẽẽge ɓi, de maga ndi de ɗe ndo mono!” (Siŋ wora 143:1) Jeofa yiŋ jag ti tosge Dafidn wo no, yãã ne go (1 Sam. 19:​10, 18-20; 2 Sam. 5:​17-25). Dafid hay mbe nen wããge de kaŋ ɗiggi ta’ ga: “Manwur [Jeofa] maŋ see jar maga ɗe wo ɗúu ɓe mo ɓuy lay.” Naa joŋ mbe go de bawge jag jiili naa doo sen no lay.​—Siŋ. 145:18.

5. Jar maaga hay wo goŋ Jeofa ɓaa hay wo da’ yiŋgi jag ti tosge ɓaara maa hõnla ɓuy yawlà? Hã saɓlaŋ boŋ ɗa. (Ko foton lay).

⁵ Maapo Jeofa yiŋ jag ti tosge naa wo doo maaga naa hay gorge ne ga. Á joŋ sen see apotre Pol. Apotre Pol hay wii Baa ga á mo naa “cege sen go ne [se] see.” Pol dog tosge ɓaale swa’ ti re bon sen tawa tu. Jeofa yiŋ mbe jag we ti tosge sen wo no? Ãã, amaa bay doo maaga Pol hay da ne wa. Nen maaga á hay joŋ mbe doo sen nono, Jeofa hã nen ẽgre maaga á hay de sãy ɓe ti maaga á mo joŋ joŋre ne se tum de deele​—2 Kor. 12:​7-10.

6. Wer mayse ga maapo naa kal koge doo ga Jeofa bay yiŋ jag ti tosge naa wo wa là?

⁶ Naa lay mono, maapo naa da’ yiŋgi jag ti tosge naa wo sar de maaga naa hay gorge mono. Naa go de koge cwãy ga Jeofa de ko ɗeŋ maa kay naa maa ti ngeel ɓe no. Á de kããge maa “joŋ mopo ne naa de daŋ maaga naa wiɗ ne noga naa ɗig ne mo pa” yaw (Efe. 3:20). Wer sen so, maapo yiŋgi jag ɓe ti tosge naa wo nduu diŋ ti wur maaga naa hay bay gorge ni wa, noga bay doo maaga naa hay da ne wa.

7. Wer mayse ga naa de coor fẽẽre maaga naa tos ti ɓaara là? Hã saɓlaŋ boŋ ɗa.

⁷ Naa de coor fẽẽre maaga naa tos ti ɓaara de maaga naa da’ wer we go ne dage Jeofa de woore no. Naa ko we saɓlaŋ hẽn naa Martẽŋ Poetzinger ɗa. Blam maaga hẽn naa Poetzinger da wãy ne kay tu, à baa ne, à ma’ jag ɓe ti daŋgay ti ngeel maaga jar ‘Nazi’ hay wo joŋ bon jar ni mono. Taŋgu mo kay, se wii Jeofa ga á mo joŋ ga se mo kal go siigi, maaga se mo fer liŋ see wãy se, lan se mo fer jag siigi wããre Baa no. Amaa naw blam hwal ti naa, mopo hay bay ngaɓge ne hẽn ga Jeofa go de bul faage ne hẽn maa kalge go wa. Á fer tosge tigriŋ ga: “Kam kam ɓo Jeofa, kay me maa ko fẽn maaga ndo da ga ndi mo joŋ ɗa la.” Á ya’ ɗiggi ti re maaga de daɗ hẽẽrebe maa lan wo ti daŋgay see ɓe ni mono. Jar hay ni ngaɓa ga wo go de car jiili wer naare ɓaara wo de weere ɓaara wo. Hẽn naa Poetzinger fer tosge ga: “Jeofa, suse’ ti joŋre sen ga ndo hã me do defay mono. Kay me maaga ndi mo coɓ nen hẽẽre ɓin wo no.” Se joŋ kiŋgi blam kaawa’ joŋge doo sen ne no!

8. Maaga naa le’ tosge we naa mo hay yõõ ti go ti mayse de woore wa là?

⁸ Naa mo hay tum de kaŋge ti naa ga Jeofa bag jag fẽn maaga se de ngaɓge ɓe ti wur maa ɓe no. Fẽn sen diŋ caage wer re maaga laa wo naa wara nen bon mono​—doo daɗge sir wo, leege maa de ẽgre wo, bii maŋge, ceege, lan húuli. Jeofa bag jag ɗiggi ɓen yaŋ go de Twaywaŋ ɓe no (Dan. 2:44; Naa. 21:​3, 4). Amaa hãã patala Jeofa mbe de men faage ne Manhúuli maa wãã re tamsir ɗab (Jaŋ 12:31; Naa. 12:9). Hayga Jeofa de hay ‘wùy re maa see jar téebeeren wo we go matala tu no, se de hay da wããge ga wããge re jar maa ni Manhúulin de seege de woore. Koh naa mo gor ba ga Jeofa mo bag jag ɗiggi ɓe wo go ɗa, se bay da wããge ga á go de men naa de see naa na wa. Naa ko we fẽẽre po wo maaga Jeofa kay naa de ɓaara mo ɗa.

ƊEŊ MAAGA JEOFA YIŊ JAG TI TOSGE WO WARA

9. Jeofa kay naa na kayge de maaga naa yaŋ de sãy maŋ ɗiggi ti ti fẽn po là? Naa wer ɓe.

⁹ Á hã koge re ne naa. Jeofa wãã ga se hã koge re maaga naa de sãy ɓe ti maa far ɗiggi maa de woore wo yaŋ ne naa. Naa de sãy koge re maa ni Baan ti debaŋ ɓe de maaga naa le’ far ɗiggi maaga wo diŋ maa tum, doo maaga ndo mo da wãy wa noga da war wa, lan da wãy noga da ware (Jag. 1:5). Naa ko saɓlaŋ mãygeman naa po à ɗen ga Mariya ga hay bay de da war wa ɗa.c Á hay tum de fruygi ti maaga se hay diŋ piyoniye permanaŋ mono, se ya’ la yiŋ de weegeman naa po. Á wãã ga: “De maaga barge maa ti holaŋ wùr de ya’ge ciŋ see kããra me’ me’ mono, ɗiggi wùr ti kããra ya’ ciŋ lay. Ndi hay de koge ga ndi de hay maŋ ɗiggi go ɓoŋ. Ndi tos Jeofa ti re sen debaŋ. Ndi hay de sãy yaŋ maa ni Jeofan ti, amaa ndi hay de koge lay ga Jeofa ɗig go ti tu ɓi ga.” Á raw koge ga Jeofa yiŋ jag ne se ti tosge se no, hã koge re ne se. De ɗeŋ maa hõnlà? De maaga á kiɗ wer fẽẽre ɓil kefder naa wo mono, se da’ hadge po wo maaga kay wo ne maa da’ yaŋ ti fẽẽre maaga hay wo ɗiggi ɓe mono. Á joŋ joŋre de yaŋ maa ni man ɓen wo lay. Yaŋ sen kay wo Mariya maa ko nen re no. Wer sen so, se joŋ de kããge maa maŋ ɗiggi maa de woore.

10. Doo maaga à da’ ɓil Filip wo 4:13 mono, Jeofa joŋge mayse maa kay jar maaga goŋ wo ne mo là? Hã saɓlaŋ po ɗa.

¹⁰ Á hã ẽgre maa soɗ ren wo ne naa. Doo maaga á hay joŋ see apotre Pol ne lay mono, Jeofa hã ẽgre ne naa maa soɗ re maaga daɗ wo naa lay (Jaŋ Filip wo 4:13.) Ko maaga Jeofa kay hẽn naa po à ɗen ga Benjameŋ maa soɗ re maa de gayri ga hay daɗ wo ne mo ɗa. Ti jõõ ɓen daŋge ɓuy mono, Benjameŋ wo de jar maa liŋ ni ɓaaran wo ɓuy hay ɗee wo le go lagge ɓil Afrig ti ngeel maaga jar ɗee le go lagge ni doo durgi mono. Benjameŋ wãã ga: “Ndi tos Jeofa debaŋ maaga á mo hã ẽgre maa joŋ fẽn maaga coo jag ɓe me. Jeofa yiŋ jag me ti tosge ɓin wo de hã ɗiggi maa de suuli me, hã ẽgre me maaga ndi mo hay tum sii wããre Baa, lan hã kefder wo me maaga ndi mo hay tum de ẽgre ti nenterse.” Á wãã pa ga: “Maaga ndi jaŋ wããre ti sedeewa Jeofa maapo wo, lan maaga ndi ko ɗeŋ maaga Jeofa hay kay ra mono, sen kay me maaga ndi mo hay tum de deele.”

11-12. Jeofa joŋ joŋre de hẽẽre naa wo maa yiŋ jag ti tosge naa wo na joŋge là? (Ko foton lay).

¹¹ Á joŋ joŋre de feele maa ti nenterse no. De suŋ taŋgu maaga á hã tenen ɓe yaŋ go mono, Yeso tos debaŋ. Á kem Jeofa ga á mo maŋ jag re maaga à wãã ga se diŋ jee cer Baa go ne se see. Ti ngar maaga á hay kay ne, Jeofa raw ɓo’ jee peele ɓe, hẽn Yeso po le, maaga á mo coɓ ne (Lug 22:​42, 43). Jeofa kay mbe naa de ɗu maaga hẽn naa po ɗe naa le ti telefon, noga ndu ko naa lay. Naa ɓuy mbe de kããge maa wãã “wããre ma de woore” ne hẽẽre naa wo​—Jõõ. 12:25.

¹² Naa ko saɓlaŋ mãygeman naa po à ɗen Miriyam ɗa. Naw blam húuli war ɓe mbage, Miriam hay gwa’ liŋ boŋ, hay ko see ɓe go nen lawge, go de yeege. Á hay bay men ro wa, lan hay de sãy wãã ɗiggi ɓe ne jobo ti. Á wãã ga: “Ẽgre ɓi hay bay maa ɗe jobo wa so, de sen mo kay ndi tos Jeofa. De maaga ndi de tosge jag ti ro mono, telefon ɓin raw raage. Á hay diŋ jee maa peel tiŋ-Baa po, bar ɓi maa ti nen ɓi.” Miriyam raw da’ kayge see jee maa peel tiŋ-Baa sen wo de wãy ɓe. Á hay go de bawge jag jiili ɓe ga hay ɓo’ hẽn naa sen le diŋ Jeofa.

13. Hã saɓlaŋ po maa ngaɓ ɗeŋ maaga Jeofa joŋ joŋre de jar maa ti tamsir wo maa yiŋ jag ti tosge naa wo ɗa.

¹³ Maapo se joŋ mbe joŋre de jar maaga bay wo goŋge ɓe wa lay. (Jõõ. 21:1) Day maapo Jeofa yiŋ jag ti tosge naa wo diŋ de joŋ joŋre de jar maa ti tamsir wo maa kay naa. Ko ba ɗa, á joŋ joŋre de Waŋ Artagserses maa hã faage ne Nehemi maaga á mo fer ɓi sir Jerusalem booge ɓe (Neh. 2:​3-6). Wara lay mono, Jeofa joŋ joŋre de jar maaga bay wo goŋge ɓe wa maaga á mo kay wo naa de maaga naa yaŋ de sãy kayge ti no.

14. Mayse coo jag ɓo ti re maaga hay da’ So hiŋ là? (Ko foton lay).

¹⁴ Mãygeman naa po à ɗen ga So Hiŋ ko ga Jeofa joŋ joŋre de dogta po maa kay se ge. Weel ɓe hay de ceege po wo ga ma’ wo nen ti ɓe go. Mbargan hay joŋ agsidaŋ po de hãã debaŋ, doo sen no kay saara de war ɓe men wo joŋre ɓaaran wo go maa soɗ mbarga no. Wer sen so, suŋgu taw go do ɓaara. Hiŋ ga se laa kããge maa soɗ re sen ga so. Se kal wãã re maa jiili ɓen ne Jeofa ga á mo kay se. Dogtan kal kiɗ ɗeŋ po maa kayge ɓe de jar maa liŋ ni ɓen wo ɓuy. Diŋ wer sen so ga gomna kal kay ra ge, kal hã tiŋ po maaga suŋgu ɓe poɗ yaŋ do ɓaara ne hara. Hiŋ wãã go blam ga: “Jeofa kay wùr jag re se no. Á diŋ ‘Je maga co’ sug tosge wo’ cwãy tu”​—Siŋ. 65:3.

DA’GE WER NE YIŊGI JAG JEOFA TI TOSGE WO, LAN YÃÃGE ƁE, WII WO HÃGE ƁILI

15. Mayse kay mãygeman naa po maaga á mo ko ga Jeofa de yiŋ jag ne hẽn ti tosge ɓen wo ɓuy là?

¹⁵ Yiŋgi jag ti tosge naan bay wo age go tinoo nen jar doo fẽn mbuɗgi hõ’ wa. Amaa yiŋgi jag maaga naa da’ ra diŋ maaga naa de sãy ɓaara ti maa lagge de deele peel Pan naa maa ciŋ no. Wer sen hay beg ɗeŋ maaga Jeofa yiŋ jag ne ndo ti tosge ɓon wo no. Mãygeman naa po à ɗen Yoko hay ɗig ga Jeofa bay yiŋ jag ne se ti tosge se wo wa, amaa se tĩĩ ɗaw fẽẽre maaga se hay wii ra do Jeofa ti ɓe. De ngar ngeel po ta’ se ko nen ti fẽẽre maaga se hay wii ra mono, se wo koge so ga Jeofa hay go de yiŋ jag ne se ti ɓaara daŋge ɓuy, koh ti maapo wo ga ti ɓe hay go de yõõge ti ɓaara. De ngar ngeel po taɗ taɗe, naa de maŋ wur maa ɗiggi ti ɗeŋ maaga Jeofa yiŋ jag ne naa ti tosge naa wo mono​—Siŋ. 66:​19, 20.

16. Naa naa nen hãge ɓil naan go nen tosge naa wo na naage là (Hebre wo 11:6)?

¹⁶ Naa ngaɓ go ga naa de hã ɓil ti Jeofa bay diŋ de tosge ɓe tawa wa, amaa, de yãã yiŋgi jag ɓe maa hõnla ɓuy ti tosge naan wo lay (Jaŋ Hebre wo 11:6.) Naa ko we saɓlaŋ Misel wo de wãy ɓe Krisi ɗa. Á hay da wo ga saara joŋ joŋre ti Betel. Misel wãã ga: “Wùr dog yerge yaŋ nen kiŋgi gãy laybla’ ɓuy, tos Jeofa ti ɓe debaŋ lay. Amaa, à ɗe wùr wo ni ti boŋ ga.” Misel wo de Krisi lag wo go de bawge jag jiili ɓaara ga Jeofa de ko ɗeŋ maaga se joŋ joŋre de saara mono. Á lag ɓaara tum joŋ fẽn maaga á hay wo de kããge maa joŋge ɓe, lag wo piyoniye permanaŋ ti ngeel maaga joŋre ni debaŋ mono, lan kay wo ti joŋre booge tiŋ maa ti tayge naa wo no. Wara Misel raŋ tiŋ-Baa wo de wãy ɓe. Misel wãã ga: “Jeofa hay bay tum yiŋ jag ne wùr ti tosge wùrn wo doo maaga ɓil wùr hay da no wa, amaa á hay mbe yiŋ jag ti ɓaara ane, ba de ɗeŋ maa tigriŋ wo de woore de daŋ maaga wùr hay gorge mo yaw.”

17-18. Doo maaga à da’ ɓil Siŋ wora 86:​6, 7 ne mono, naa mo hay de kaŋ ɗiggi ga hãylà?

¹⁷ Jaŋ Siŋ wora 86:​6, 7. Dafid jee ‘waa siŋ hay go de bawge jag jiili ɓe ga Jeofa laa tosge se wo, lan yiŋ jag ti ɓaara. Ndo de kããge maa joŋge doo se no lay. Saɓlaŋ maaga wo ɓil hadge sen la ngaɓ wo go ne naa ga Jeofa de kããge maa hã koge re ne naa, lan ẽgre maa dur ren wo lay. Maapo se joŋ joŋre de hẽẽre naa maa ti taygen wo, noga de jar maaga bay wo goŋge ɓe wa ɗa maa kay naa de ɗeŋ wer sar sare.

¹⁸ Koh de maaga Jeofa bay mbe yiŋ jag ti tosge naa wo tum doo maaga naa hay gorge ne wa laybla’ mono, naa de koge ga á yiŋ jag yaŋ mbe ne naa ti ɓaara. Á hã ne naa diŋ fẽn maaga naa de sãy ɓaara ti cwãy mono, lan ti wur ɓe lay. Wer sen so, hay tum tos Jeofa de kaŋ ɗiggi ta’ ga á co’ sug ɓo yaŋ, ga á hã fẽẽre maaga ndo de sãy ɓaara ti patala ɓaa yaŋ ne ndo, lan ti sir maa defayn mono, se “bul doo [ɓe] go, day [se] kãã maysela maga tenen ɓuy go doo ga ɓil da”​—Siŋ. 145:16.