Daga desãy mo hay diŋ ẽgre ɓo!

1. Maapo à wii jag naa ti mayse ti ngeel joŋre noga ti lakol là?

Á JOŊ see mo na joŋge de maaga kan ɓo maa ti lakol noga maa ti ngeel joŋre wii jag ɓo we ti fẽẽre maaga ndo de hã ɓil ti ɓaara là? Á joŋ hẽẽne mo yawlà? Á joŋ hẽẽne ne jar po yoo naa ngaɓa. Amaa wiigi jag sen kay naa maa ko ɗiggi jee ɓen wo de fẽẽre maaga á de hã ɓil ti ɓaara, lan se joŋ ga naa mo sii wããre maa de cõõren go ne hẽn gusi. Day maa po jee ɓen wii jag naa bay maa laa wer wããre po wa, amaa maa faage de naa. Sen ngel naa ga, werga jar bay de ko fẽẽre maaga naa hã ɓil ti ɓaara mo wa (Joŋre 28:22). De daŋ sen ɓuy naa diŋ ti “wur naw ma blam wo” no, wur maaga jar ngaɓa bay wo “ko [ . . . ] de coo jobo” wa, lan “wo de hãã”—2 Tim. 3:​1, 3.

2. Wer mayse ga naa da ga naa mo hay desãy là?

² Maapo ndo wii jag see ɓo ga: ‘Ndi joŋ joŋge hayga jobo wii jag ɓi we ti fẽẽre maaga ndi de hã ɓil ti ɓaara diŋ maa faare là?’ Desãy kay ndo yaŋ. Jobo maa desãy sõõ ɓil gus ga, ɗaw see ɓe de maaga à kẽɗ jag ɓe we lan de maaga á bay we go de bawge jag jiili ɓe ti fẽn maaga se wããn wa no (Jõõ. 16:32). Á mbe cwãy ga á bay gus maaga ndo mo hay desãy wa. Ndo joŋ joŋge maaga ndo mo hay desãy so là? Ndo yiŋ jag desãy na yiŋgi hayga jobo da we diŋ ga se faa mo ti fẽẽre maaga ndo de hã ɓil ti ɓaara là? Day hayga ndo yaŋ diŋ pããbe no, ndo joŋ joŋge maa kay weere ɓo wo maaga á mo wãã wo go ti hãge ɓil ɓaara desãy là? Naa ko wee ɗeŋ maaga naa joŋ ɗa.

À JOŊ DESÃY JOŊGE LÀ

3. Wer mayse ga desãy diŋ ẽgre, bay diŋ hugli wa là (2 Timote 2:​24, 25)?

³ Jar maaga wo desãy wo diŋ jar maa de ẽgre, á bay wo diŋ jar maa de hugli wa. Á wii ɗawge jiili maa ɗaw see jag re po maa de gayri. Desãy diŋ joŋre maa ɓil “le’ge nenterse” (Gal. 5:​22, 23). À hay joŋ joŋre de wããre maa jag Greg ga à koln go ga “desãy” diŋ maa wããge ti pir maa koore ga à koln go desãy. Ɗig ba mbo ti pir maa koore ga kol go desãy ɗa. Koh de maaga á mbe desãy laybla’, á de ẽgre debaŋ. Jar téebeere joŋ wo joŋge maaga saara mo kol desãy lan de ẽgre lay là? Naa kãã maa kolge doo sen ne de see naa noga de dage naa ga. Ɗeŋ ɓe po boŋ diŋ ga naa mo tos maa da’ nenterse Baa maaga á mo kay naa maaga naa mo kol desãy. Jar debaŋ maaga hay bay wo desãy wa kol wo go desãy, sen ngaɓ ga á mbe maa joŋge. Sedeewa Jeofa wo debaŋ naa wo nen desãy go de maaga jar kiɗ wo maa faage de ɓaara noga kẽɗ wo jag ɓaara mono. Sen joŋ nen maaga jar mo ɗig ti sedeewa Jeofa wo de woore (Jaŋ 2 Timote 2:​24, 25). Ndo kol desãy go yoo joŋre ɓo maa de wooren wo na kolge là?

4. Saɓlaŋ Isag had mayse ne naa ti desãy là?

⁴ Wããre maa ɓil Bible ga wãã wo ti de el desãy mbaara deŋ. Naa wãã ba ti saɓlaŋ Isag ɗa. De maaga á hay Gerar ɓi sir jar Filistẽẽ wo mono, jar leege ɓen ndeb wo gutug maaga weere jõõre maa ni pan ɓen hay tee wo ne mo go. Nen maaga á hay dur maaga à hay yãã gutug sen wo ga mono, Isag ya’ de jar ni ɓe wo ti ngeel tigriŋ, tee gutug maa tigriŋ wo (Tĩĩ. 26:​12-18). Amaa jar Filistẽẽ wo ga bii maa ɓil gutug maa ti ngeel maa sen wo diŋ maa saara pa. De sen mbe ɓuy, Isag joŋ see ɓaara desãy (Tĩĩ. 26:​19-25). Mayse kay ne maaga á mo hay desãy koh de maaga jar Filistẽẽ kiɗ wo kwãy mbe de ɓe mo ne? Sen go tinoo tu ga á ko see saɓlaŋ pããre ɓe wo, da’ hadge see desãy maa ni Abraham, lan see “ɗiggi ma desãy tulus” maa ni Sara no—1 Pi. 3:​4-6; Tĩĩ. 21:​22-34.

5. Saɓlaŋ maa hõn ngaɓ go ga pããrebe maaga wo diŋ krétiyẽ mbaara de kããge maa had de el desãy ne weere ɓaaran wo là?

⁵ Nday pããrebe maaga nday krétiyẽ mono, hay wee de koge ga nday mbay de kããge maa had weere ɓay wo maa ko de el desãy. Naa maŋ saɓlaŋ Magsen ga kiŋgi 17 ɗa. Á yiŋ de jar maa da waŋ ti lakol lan ti siigi wããre Baa. Pããre ɓe had wo ne de gorge desãy maaga á mo joŋ desãy. Á wãã wo ga: “Magsen go patala de koge ga á go gus maaga jobo tĩĩ go de waŋ, amaa jobo maaga de ẽgre cwãy ɗaw see ɓe, oo eŋ.” Magsen kol diŋ jobo maaga desãy debaŋ.

6. Tosge kay naa maa ya’ wer desãy de peel ni na kayge là?

⁶ Naa joŋ joŋge hayga jobo kẽɗ jag naa we ne? Ba doo maaga jobo wãã ti Baa naan de baywoore, noga mbiɗ foo Bible. Naa mo wii ẽgre wo de koge re do Jeofa maaga naa mo joŋ desãy jag re se no. Day hayga naa ko we go blam hãã ga naa oo jag ren doo maaga naa hay da ne ga lay? Naa mbe de kããge maaga naa fer tosge ti wããre sen tigriŋ pa, lan ɗig ti ɗeŋ maaga naa joŋ peel ge na joŋge hayga tee re sen da’ naa we pa la. Jeofa hã ge nenterse ɓe maa bay ɗagn ne naa maaga mo ɗaw jag jiili naa, lan mo joŋ desãy.

7. Ɗawge verse maa po wo ti naa kay naa jag re maa de gayri wo na kayge là (Jag jõõ wo 15:​1, 18)?

⁷ Verse maa po wo ɓil Bible kay wo naa maaga naa mo ɗaw jag naa hayga á bay we gus ne naa maa wãã wããre desãy wa no. Nenterse Baa de kay naa maa ferge ɗig ti ti verse sen wo no (Jaŋ 14:26). Ko ba ɗa, wããre maa de woore wo ɓil kefder Jag jõõ wo, kay wo naa maaga naa mo hay desãy (Jaŋ Jag jõõ wo 15:​1, 18). Kefder sen ngaɓ ne naa ga wer mayse ga naa mo hay ɗaw see naa jag re maa de gayri wo là—Jõõ. 10:19; 17:27; 21:23; 25:15.

ƊIGGI WER WÃÃRE KAY NAA MAAGA NAA MO HAY DESÃY NA KAYGE LÀ

8. Wer mayse ga naa de kiɗ maa ko re maaga jobo wii jag naa ti hãge ɓil naa là?

⁸ Ɗiggi wer wããre kay naa (Jõõ. 19:11). Jobo maaga ɗig wer wããre ɗaw see ɓe de maaga à wãã we ga mopo maaga á go de bawge jag jiili ɓe ti ɓe bay doo maaga á de ɗiggi ga se de koge ɓe ne wa mono. Daŋge tum de maaga jar wii wer wããre mono, á bay wo sii re maaga saara wii wer wããren ti ɓe ne naa wa. Taŋgu maaga naa yiŋ jag mono, á de el maaga naa mo hay wããge ne see na ga maapo naa bay de ko fẽn maaga srog glog jee ɓen wii jag naa mo wa—Jõõ. 16:23.

9. Jedeyoŋ ngaɓ go ga se ɗig wer wããre lan se desãy de maaga jar Efrayim kiɗ wo kwãy de ɓe go na ngaɓge là?

⁹ Ɗig ti ɗeŋ maaga Jedeyoŋ fer wããre ne jar Efrahim wo de ɓe ɗa. Á heb wo ne de waŋ ga wer may ga á ɗe saara le maa age dur jar hee Israyeln wo go peel bol ga là. Re maa tigriŋ hay le wer le’ge kwãy ɓaaran de yoŋre ni yaw? Maapo ga ɓil ɓaara sõõ diŋ werga á hay wo maŋ ti see ɓaara ciŋ yaw? Jedeyoŋ ko ɗiggi ɓaara go, se raw fer wããre ne hara desãy. Bible wãã ga “De maga se fer wããre ne hara dosen no kay mono, ɓil ɓaara kal go fuggi ne hen ti—Kii. 8:​1-3.

10. Mayse kay naa maaga naa mo ko yiŋ jag ne jar maaga wiɗ wo jag naa ti fẽẽre maaga naa de hã ɓil ti ɓaara là (1 Piyer 3:15)?

¹⁰ Maapo ga kan naa maa ti ngeel joŋre noga maa ti lakol wii jag naa ga wer may ga naa hoo sug ti jag liŋgi maaga Bible wãã ra ti ɓaŋ seele naa wo mo là. Naa dur maa fer wããre ne hara ti fẽẽre maaga naa go de bawge jag jiili naa ti ɓaara, de hoo sug ti ɗiggi ɓaara maa ti fẽẽre sen wo lay (Jaŋ 1 Piyer 3:15). Á de el maaga naa mo maŋ wiigi jag ɓen doo fẽn maaga kay naa maa ko ɗiggi ɓe, ti maaga naa maŋn doo ga á de le’ naa le’ge ne no. Koh re maaga jee ɓen wii jag naa ti ɓe mo hay ba ẽlaybla, á de woore maaga naa mo yiŋ jag ne hẽn ti ɓe desãy, de woore lay. Yiŋgi jag naa kay ne maaga á mo fer ko ɗiggi ɓe. Koh wããre maaga á wãɗ mo hay ba koge diŋ wããre maa kluu noga maa ceege, maa naan diŋ ga naa mo fer ne hẽn ti ɓe ni de ele—Rom. 12:17.

11-12. (a) Naa ɗig go ti mayse taŋgu maaga naa yiŋ jag ti wiigi jag maa de gayri ɗa là? (ko foton lay) (b) Hã saɓlaŋ po maaga ngaɓ ga wiigi jag maaga jobo wii naa bul faage ti ndalge maa de woore.

¹¹ Hayga kan ɓo wii jag ɓo we ga wer mayse ga nday bay joŋ few wur biŋgi jobo wa la no, ni ndo wii jag see ɓo ga: maapo ga á bay ba wii jag see ɓe ga á mbe na de hã faage ne naa maaga naa mo joŋ hrag yawla wa? Noga á de ɗiggi ga fẽn maaga naa bay joŋ few wur biŋgi wa ɓlag holaŋ jar maa ti ngeel joŋre no? Maapo naa woo jiili kan naan yaŋ de wããge ne hẽn ga joŋre ɓe see jar maa ti ngeel joŋren de cõõre jag naa debaŋ, lan ga naa de sãy maaga jag jar maa ti ngeel joŋren mo hay de laage. Sen ɓo’ faage ndalge maa de woore yaŋ ti maaga wãã ti joŋge few wur biŋgi mono.

¹² Naa mbe de kããge maaga naa joŋ joŋre de ɗeŋ sen de maaga jobo wii jag naa we ti fẽn maa de gayri no pa. Maapo kan ɓo maa ti lakol wãã mo ga sedeewa Jeofa hay coo wo ɗiggi ɓaara ti maaga jee twar suu de kan ɓe jee twar, noga maa twãy de maa twãy mono. Á wãã sen na diŋ werga á bay laa wer ne ɗiggi sedeewa Jeofa wo ti sen wa yaw? Mbala werga kan ɓe po noga pan ɓe po suɗ de jee maaga twar noga twãy doo se no lay? Á de ɗiggi ga naa bay de sãy jar maaga suɗ wo de kããre ɓaara maa tenaare wo noga maa twerpiiri wo ti wa? Maapo naa nen hã bawge go ne hẽn jag jiili ga naa da wosela ɓuy, hoo sug ti jar ɓuy, lan de koge ga wosela ɓuy maŋ ɗiggi ɓen diŋ se de see ɓeb (1 Pi. 2:17). Naa joŋ yaŋ de kããge maa wãã fẽn maaga Bible wãã mono, lan ga hooge sug ti ɓe kay naa maaga naw naa mo hay de woore debaŋ, de fruygi lay na kayge là.

13. Hayga jobo wãã we mo ga jar maaga hã ɓil ti Baa diŋ jar maaga bay wa de ko re wa no, ndo joŋ na joŋge là?

¹³ De maaga naa yiŋ we de jobo maaga ɗiggi ɓe de pẽẽre no, naa mo hay ɗig deparday tu ga naa go de ko ɗiggi ɓe wa (Tid 3:2). Ko ba ɗa, hayga kan ɓo maa ti lakol wãã we ga hã ɓil ti Baa diŋ jar maaga bay wo de ko re wa no, ndo joŋ joŋge ne? Ndo wãã mbo go deparday tu ga á hã ɓil ti hadge maaga jee táabay a le diŋ see mbaydaŋ, lan ga á joŋ go de ko wer hadge sen de woore yaw? Maapo ga á wãã diŋ fẽn maaga se laa laage koɗe. Nen maaga ndo de ya’ ndalge de kan ɓon ti ɓaŋ koge wer fẽẽre maa ti tamsir wo mono, ndo de hay men wiigi jag po ne hẽn maaga nday mo ndal ti ɓe wurpo. Maapo ndo kaŋ nen ɓe ti kefder maaga wãã wo ti fẽẽre maaga Baa joŋ ra ɓil sid jw.org. Blam mokay, maapo se da’ nen yaŋ maaga nday mo ndal ti artikle noga videyo po maaga á da’ wo ni. Sen diŋ cwãy, ferge wããre maa de hooge sug kay ne maaga á mo fer coo ɗiggi ɓe.

14. Nel joŋ joŋre de jw.org maa kay kan ɓe maaga hay ɗiggi ti sedeewa Jeofa wo de baywoore na joŋge là?

¹⁴ Weel po mbaw, à ɗen ga Nel, joŋ joŋre de sidweb maa ngaɓge ne jar ti fẽẽre maaga à wãɗ ti sedeewa Jeofa wo diŋ gete’e. Á wãã ga: “Kan ɓi po hay wããge me tum ga ndi bay hã ɓil ti siyaŋse wa werga ndi de kaŋ ɗiggi ti kefder maaga ɓil ɓe diŋ mbaa wo .” Werga kan ɓen hay bay menge ɓe ti boŋ naa wer ɓe ne hẽn wa mono, Nel kaŋ nen ɓe ti ngeel “La Bible et la Science” ɓil jw.org. Go blam mokay, Nel wo koge ga maapo kan sen joŋ de jaŋ kefder wo no, mbe patala de sãy maaga saara mo ndal ti maaga fẽẽre ɓuy a wo le genlà so. Maapo ga ndo mbo de kããge maa joŋge doo sen ne lay.

BAG WEE JAG SEE ƁAY GO DE JAR MAA ƁI FEELE ƁAY WO

15. Pããrebe kay wo weere ɓaara wo maa bag jag see go peel bol maa yiŋ jag ne kããre ɓaara maaga wii wo jag ɓaara ti hãge ɓil ɓaara na kayge là?

¹⁵ Pããrebe mo had wo weere ɓaara maaga á mo hay wo desãy, de maaga à wãã we ne hara ga fẽẽre maaga á hã wo ɓil ti ɓaara bay wo ti ngeel ɓe wa no (Jag 3:13). Pããrebe maa po bag wo jag weere ɓaaran wo ti goŋge Baa maa ɓi feele ɓaaran go peel bole. Á maŋ wo ndalge ti wããre maaga à wãã ge ra ti lakol laybla, ndal wo ti ɓe, ngaɓ wo ɗeŋ maaga à fer wããre ti ɓe ferge la, lan ngaɓ wo ɗeŋ maaga weere saara mo fer wo wããre de desãy lan de cõõre lay—Ko ngeel maa de gaɗge “Bagge jag see go peel bole kay feele ɓay no.”

16-17. Bagge jag see go peel bol kay weere maa mbaw mbaw wo na kayge là?

¹⁶ Bagge jag see go peel bol kay maa jõõre wo maa sii wããre de ɗeŋ maa de woore ne jar tigriŋ wo. Sen kay ra maaga á mo hay wo go de bawge jag jiili ɓaara pa ga saara de da’ cwãy no. Ti ngeel rubrig “Les jeunes s’interrogent” ɓil jw.org mono, à da’ “Fiches de réflexion pour ados” ni. Á joŋ ra de ɗeŋ maaga á mo kay wo weere maa mbaw mbaw wo maaga á mo hay wo go de bawge jag jiili ɓaara ti hãge ɓil ɓaara. Á kay ra maaga á mo yiŋ wo jag diŋ de wããre maa ɓaara ti see ɓaara. À had kefder sen wo we ɓi feele no, se kay wosela ɓuy maaga á mo fer wããre ti hãge ɓil ɓen de ɗeŋ maa de woore, desãy lay.

¹⁷ Weel po mbaw ga à ɗen ga Matiye wãã ti maaga bagge jag see go peel bol kay wo se kayge la mono. Ti goŋge Baa maa ɓi feele ɓaara mono, Matiye wo de pããre ɓe frug wo nen wããre ti re maaga nduu wo ne ti lakol laybla’ mono. Á wãã ga: “Wùr ɗig ti wiigi jag po maaga maapo à wiigi jag ɓi ti ɓaara, lan kiɗ ɗeŋ maaga ndi yiŋ jag ti ɓaara de woore yiŋgi la see wããre maaga wùr frug nen ɓe mono. De maaga ndi yaŋ go de koge ga wer mayse ga ndi hã ɓil la no, ndi joŋ de kaŋ ɗiggi ti see ɓi. Ferge wããre ne jar desãy joŋ go do ɓi gusi.

18. Kolos wo 4:6 ngaɓ de el mayse là?

¹⁸ Á mbe cwãy ga à mo naa ba mbe wer wããre go de woore laybla no, jar ɓuy yãã ne ga. Amaa naa yaŋ wããge ɓe de ɗeŋ maa de woore, desãy lay no, sen kay naa yaŋ (Jaŋ Kolos wo 4:6). Wããge wããre ne jobo ti fẽẽre maaga naa de hã ɓil ti ɓaara diŋ doo maaga à ɓo’ baloŋ wo ne jobo nono. Maapo ndo ɓo’ ne wo ne hẽn desãy, noga kwũy. Naa ɓo’n we wo ne hẽn desãy no, se joŋ nen maaga se baa ti ɓe, see de hragn peele. Doo sen ne lay, hayga naa yaŋ wãã wããre de ɗeŋ maa de woore, de desãy no lay, maapo jar co’ sug naa yaŋ, ig wo yaŋ ndalge de naa. Á mbe cwãy ga jobo da we diŋ ga se mbiɗ foo naa noga feg ti naa no, naa bay maaga naa see wo de ndalgen de peel ni de ɓe wa (Jõõ. 26:4). Amaa jar maaga joŋ wo doo sen ne bay wo pur wa; ti cwãy ɓe, daŋge jar co’ge sug naa.

19. Mayse jor glog naa maa ngaɓge go ga naa desãy de maaga à wii jag naa we ti hãge ɓil naa là?

¹⁹ Kidolgi, de el maaga naa mo kiɗ ga naa mo kol desãy mbaara deŋ. Tos Jeofa ga á mo hã ẽgre ne ndo maaga ndo mo hay desãy de maaga jobo wii jag ɓo we diŋ maa faa ndo; noga maa kiɗ kwãy de ɓo no. Hay de koge ga ndo oo we desãy no, ɗiggi ɓay mo hay ba sar sar laybla’, ndalgen kol kwãy go ga. Maapo desãy ɓon lan yiŋgi jag ɓo maa de hooge sug jor glog ɓaara maaga á mo coo wo ɗiggi ɓaara ti naa. Noga se kay ra maa coo ɗiggi ɓaara ti cwãy maa ɓil Biblen wo pa. Hay “go de gragge ma fer wããre ne jar maga wiɗ wo [ndo] ma laɗ wer” fẽn maga ndo de kaŋ ɗiggi ɓo ti ɓe mono, “fern [ . . . ] ne hara desãy de hoorge sug ti ɓo” (1 Pi. 3:15). Nen daga desãy mo hay diŋ ẽgre ɓo!