Hadge maaga naa da’ ra ɓil kefder maa ɓog wo ga Piyer yer ra mo no

1. Go mẽ’ taŋgu maaga apotre Piyer húu go mono, Jeofa joŋ joŋre de ɓe maa joŋ mayselà?

APOTRE Piyer hay go de koge ga se húu gi go la mbaŋ . Á joŋ joŋre ne Jeofa nen kiŋgi hwal hwal pur de woore: á hay wo seege de Yeso, hay wo sii wããre Baa ti ngeel maaga wããre hay bay go de siigi ni wa ɗa mono; lan se hay joŋ joŋre yoo jar maa peel tayge maa taŋgun wo no. Amaa joŋre maa ni Piyern hay bay go de tawge wa. Jeofa joŋ joŋre de Piyer maa yer kefder ɓog nen kiŋgi maa 62-64 ti wur maa ni naa no (W.M.N)—1 Piyer wo de 2 Piyer. Piyer hay de ɗiggi ga kefder se ɓogn kayge krétiyẽ yaŋ wo blam huúulí se—2 Pi. 1:​12-15.

2. Wer mayse ga à wãã ga kefder maa ni Piyern a wo ti wur ɓe là?

² Piyer yer kefder ɓen wo de maaga hẽẽreben hay wo yiŋgi de wer “re ma sar sar wo mono” (1 Pi. 1:​6, NWT). Jar debaycõõre hay day wo had hadge maa de baywoore yoo tayge maa ni Baa no, lan hay wo jor glog jar maa ni Baan wo joŋ joŋre maa de yeeɗe wo (2 Pi. 2:​1, 2, 14). Kretiyẽ maa Jerusalem de hay yiŋ wo de re sen maŋ ti “tawge ti fẽẽren” wo no—de maaga Soode Rom ɓlag wo sir Jerusalem wo go de ɗeŋ maaga jar Jwif joŋ wo joŋre de ɓe mono (1 Pi. 4:7). Sen go tinoo tu ga kefder Piyer hay kay kretiyẽ wo maa ko fẽn maaga á hay joŋ wo maa bag jag see ɓaara go see bon maaga á hay wo nen ɓe mono, lan see maaga hay age ra le nen naw maa peel mono.b

3. Wer mayse ga naa de frug nen kefder maaga Piyer yer ra de nenterse Baa là?

³ Koh de maaga Piyer hay yer ɓe kefder sen wo diŋ ne kretiyẽ maa taŋgun wo le mo laybla’ no, Jeofa joŋ ga á mo hay ɓil wããre sen ni. Wersen naa had fẽẽre wara ɓil ɓaara debaŋ (Rom. 15:4). Maaga naa ti tamsir maaga jor glog jar joŋ fẽẽre maa de baywoore wo mono, naa de yiŋgi de re maaga kol wo joŋre maa ni Jeofan go de gayri ne naa peele. De daŋ sen ɓuy pa mono, naa yiŋ gi de bon maa de hãã maaga de daŋ bon maaga hay taw ɗeŋ joŋre jar jwif wo go mono. Sen diŋ ɓo’ge sug maa de woore ga naa da’ ɓil kefder maa de ɓog maa ni Piyer wo no. Ɓo’ge sug sen wo la kay wo maa lagge gor wur maa ni Jeofa no, maa naa blum joŋge hẽẽne do jare, lan maa baa wùu da kããra ti holaŋ naa. Ɓo’ge sug sen kay jar maa peel tayge wo maaga á mo kay wo hẽẽreben lagge de ẽgre ti nenterse.

HAY TUM GORGE

4. Doo maaga à da’ ɓil 2 Piyer 3:​3, 4 ne mono, mayse fer hãge ɓil naa go gesiŋ là?

⁴ Naa diŋ yoo jar maaga bay wo kaŋ ɗiggi ti fẽẽre maaga Bible wãã ti naw maa peeln mo wa. Jar hee naa maa po ɗar wo naa werga naa go de wããge ti naw tawge tamsir ɓaale ngaɓa. Jar maa po wãã wo ga tamsir taw go ti boŋ ga (Jaŋ Piyer 2 Pi. 3:​3, 4). Hayga jee maaga naa joŋ joŋre de kẽẽ, jee maa ɓi feele naa, noga jee maaga naa sii wããre ne hẽn wãã we ga tamsir taw go ti boŋ ga no, sen hãy hãge ɓil naa. Piyer naa wer fẽn maaga kay naa ne naa.

5. Mayse kay naa maa gor tawge tamsir se maa debalan desãy là (2 Piyer 3:​8, 9)?

⁵ Jar maa po ɗig wo ga Jeofa yõõ ti maa taw tamsir se wara de ɓlaggen mo ti’ go. Kefder maa ni Piyer kay wo naa werga á wãã wo ne naa ga Jeofa bay ko nawn wo doo maaga naa kon ne wa (Jaŋ 2 Piyer 3:​8, 9). Kiŋgi ndar nen Jeofa doo siili boŋ nono. Jeofa gor desãy; á bay de sãy maaga jobo boŋ mo bas go ti wa hase. Amaa de maaga wur maa ɓen a we no, á tawge tamsir sen mo ti’ la yaŋ go. Á diŋ raage ɗuu maaga naa mo sii wããren go ne jar ɓuy de wur se maaga gwa’ ne naa mẽ’ mono.

6. Naa joŋ joŋge maaga naa mo “ “hay tum de kaŋ ɗiggi” ti wur maa ni Jeofan là (2 Piyer 3:​11, 12)?

⁶ Piyer wãã ga naa mo “hay tum de kaŋ ɗiggi” ti age wur maa ni Jeofa no (Jaŋ 2 Piyer 3:​11, 12, [NWT]). De joŋge joŋge ne? Naa mo hay tum ɗiggi ti bosa’ maaga naa da’ ra yaŋ wo ti sir maa defayn mono. Ko ba see ɓo wo go ti sir maa defayn ɗa. Wo ti sir sen, ndo ɓo’ ẽgre de woore, ndo re rege maa de woore; ndo yãã waare jar ɓo maaga bir wo le go mono; ndo naa wer bagge jag profesi maa ɓil Bible ne jar maaga hay wo le go ɓaa ɓaa mono. De maaga ndo yaŋ ɗiggi ti fẽẽre sen wo no, se kay mo maaga ndo mo hay gorge desãy, lan maaga ndo mo hay go de bawge jag jiili ɓo ga naa go ti wur naw maa blam taw wo no. Naa “men see [naa] go yeege” wer jar maaga bay wo had cwãyn wa wa, werga Bible go de “sii[gi]” ɓe ne naa peel bole—2 Pi. 3:17.

NAA BLUM JOŊGE HẼẼNE DO JEE TÁABAY

7. Joŋge hẽẽne do jee táabay hãy naa hãyge là?

⁷ Werga naa go de koge ga wur maa ni Jeofan go de age so mono, naa dur go de ẽgre naa ɓuy maa sii wããren go ne jare. Amaa maapo ga hẽẽne joŋ naa de ngar ngeel maa po wo maa si wããren go. Wer maylà? Werga hẽẽne jar joŋ naa. Re sen hay da’ Piyer lay. De suŋ de maaga à baa Yeso mono, Piyer joŋ hẽẽne maa wããge ga se diŋ jee maa wer Yeso, day se wãã ba pa yaw ga se kon ga (Mat. 26:​69-75)! Amaa Kiŋgi blam pur, Piyer naa blum joŋge hẽẽne do jar no hãã nen maaga se wo yerge ga: “Joŋ we hẽẽne do jar téebeere wo wa has, men we see ɓay daɗ ge do hẽẽne wa lay” (1 Pi. 3:14). Wããre se ga Piyer wãã baw jag jiili naa go ga naa mbe de kããge maa ɗiigi go ne hẽẽne jee táabay ti.

8. Mayse kay naa maa naa blum joŋge hẽẽne do jee táabay là (1 Piyer 3:15)?

⁸ Mayse kay naa maa ɗiigi go ne hẽẽne jee táabay ti là? Piyer wãã ga: “Togoɗ we Kris Waŋkluu ɓay de jiili ɓay” (Jaŋ 1 Piyer 3:15). Sen da wããge ga naa mo hay fer ɗiggi ga Yeso Kris diŋ Waŋ naa, lan se de ẽgre debaŋ lay. Hayga hẽẽne yaŋ joŋ moge maa sii wããre ne jobo no, ɗig ti Waŋ naa Yeso. Ɗig doo ga á le ciŋ de wããre jar de jar peele ɓen wo ti jeŋ ɓe deŋ nono. Fer ɗiggi pa ga “ẽgre ma ciŋ de ma gesiŋ la ɓuy Baa go de hãge [ɓe ne hẽne]”, lan ga á joŋge yaŋ see naa tum “hãã go ti wur tawge tamsir no” (Mat. 28:​18-20). Piyer jor glog naa maaga naa mo hay go “tum de gragge” maa sii wããre Baa. Ndo mbo de sãy sii wããre ti ngeel joŋre, ti lakole, noga ti ngeel maa tigriŋ yawlà? Ɗig go peel bol ti ngeel maaga ndo de sãy sii wããre ni mono, lan ni ndo bag jag see ɓo go see fẽn maaga ndo de sãy wããge ɓe ti mono. Tos maa da’ coɓge, day hay de kaŋ ɗiggi ta’ ga Jeofa kay mo yaŋ maaga ndo mo joŋ hẽẽne do jar wa.—Joŋre 4:29.

“BAA WEE WÙU DA KÃÃRA”

9. Ti wur maapo naage nen dagen go ẽg Piyer na ẽgge là? ( Ko foton lay).

⁹ Piyer had da jare. Á co’ sug Yeso wããge ga: “Ndi de hã jag liŋgi ma defay ne nday, da wee kããra, doo ga ndi hay da wee no lay” (Jaŋ 13:34). Amaa wo day ge go blam mokay, Piyer laa dayge rege de krétiyẽ maaga hay bay wo diŋ jar jwif wa mo ga; werga á hay joŋ hẽẽne do jar jwif wo. Apotre Pol ga fẽn se ga Piyer joŋ mokay diŋ re bagge bii jare (Gal. 2:​11-14). Piyer yãã ruugi maaga Pol ruu ne mono, day se raw koge se ɓen ni. Ɓil leder ɓe maaga á yer ne mono, Piyer ɓo’ nen go ne naa ga naa mo hay wããge ga naa da hẽẽre naa wo diŋ de jag tawa wa, amaa naa mo naa nen dagen go see ɓaara de joŋge ɓe.

10. Mayse kay naa maa “da hẽẽre [naa] ma de hã ɓil [ . . . ] ne Baan wo là (1 Piyer 1:22)?

¹⁰ Piyer wãã ga naa mo hay tum da hẽẽre naa wo go de jiili naa ɓuy (Jaŋ 1 Piyer 1:22). Naa joŋ sen werga naa de “yãã wããre ma cwãy” no. Wããre sen ɓo’ nen ne naa ga “Baa bay car ɓil jar go sar sar wa” (Joŋre 10:​34, 35). Hayga ti tayge naan naa yaŋ da jar maa po wo, ga naa bay da maa po wo wa no, ni naa bay hoo sug ti jag liŋgi maaga Yeso wii ga naa mo da jar ɓuy mo wa. Doo Yeso ne lay, naa ko mbe see naa de sa’ge see jar maa po wo debaŋ de daŋ jar lan wo no (Jaŋ 13:23; 20:2). Amaa Piyer wii ne naa ga naa mo hay durgi maa da hẽẽre naa maa de hã ɓil ɓaara ne Baa wo werga naa diŋ hẽẽrebe maa ti feele po boŋ—1 Pi. 2:17.

11. “Baa[ge] wùu da kããra, de jiili naa ɓuy” da wããge ga hãylà?

¹¹ Piyer wãã ne naa ga naa mo “baa [ . . . ] wùu da kããra [ti holaŋ] kããra go de jiili naa ɓuy”. “Baage wuu da kããra” da wããge ga naa mo hay naa nen dage naan go koh de maaga á bay mbe gus wa laybla’ mono. Ko ba ɗa, naa joŋ joŋge de maaga hẽn naa po cog jiili we ne naa là? Maapo ga taŋgu naa ɗig ga naa de joŋn doo maaga á hay joŋ naa no lay. Day Piyer wãã ne naa ga joŋre sen bay de cõõre jag Jeofa wa (Jaŋ 18:​10, 11). Piyer yer ga: “Poɗ wee ɓlagge kããra de ɓlagge wa, noga ɗarge de ɗarge wa. De el ɓen, fer wee wããre diŋ de joŋge bosa’ ne kããra ti” (1 Pi. 3:9). Hayga ndo yaŋ de dage ɓil debaŋ no, ndo joŋ de yaŋ lay, hoo sug ti jare lay, koh de jar maaga hay joŋ wo ndo de ɓlagge mono.

12. (a) Baage wùu da kããra kay naa ti mayse pa là? (b) Doo maaga videyo “Présevons l’unité, un cadeau précieux” naa wer ɓe ne mono, ndo da ga ndo dur maa joŋ mayselà?

¹² Ɓil leder ɓe maa taŋgun mono, Piyer joŋ joŋre de wããre “baage wùu da kããra” no. Dage sen yoŋ ɓlagge wo go debaŋ, bay diŋ ɓlagge maa po wo tawa wa (1 Pi. 4:8). Maapo ga Piyer fer ɗiggi ti hadge maaga Yeso hay had ti fuggi ɓil go ne jar ti kiŋgi go taŋgu pur mono. Ti wur maa sen, Piyer hay ko see ɓe de deele debaŋ ti maaga á wãã ga naa mbe de kããge maa men ɓlagge go ne hẽẽre naa wo “ɓaale renam” mono. Amaa Yeso wãã wããre po ne hẽne, ga de wããge diŋ ne naa wara lay, ga naa mo men ɓlagge go ne hẽẽre naa wo “ɓaale do renam ti renam”, sen da wããge ga bay taw ti (Mat. 18:​21, 22; [NWT]). Hayga hooge sug ti yaŋ sen bay we joŋge do ɓo wa no, laa do go gesiŋ wa. Sedeewa Jeofa wo ɓuy diŋ jar téebeere maa de ɓlagge see, day day de ngar ngeel maa po se bay gus ne hara maa men ɓlagge hẽẽre ɓaaran wo go wa. Mo maaga daŋ go ɓuy na diŋ ga naa mo dur go de ẽgre naa ɓuy maa men ɓlagge go ne hẽn naa no, lan naa mo fer tay jag de ɓe.c

JAR MAA PEEL TAYGE WO, KOƊ WEE HOROG MAA NI BAA WO NO

13. Mayse joŋ ga da’ge wur maa jor glog hẽẽreben wo kol de gayri do jar maa peel taygen wo là?

¹³ Piyer yõõ ti go ti wããre maaga Yeso wãã ne hẽn blam birgi ɓe le go ga “Koɗ sããre ɓin wo de ele” mo ga (Jaŋ 21:16). Hayga ndo yaŋ diŋ jee maa peel tayge no, ndo ti see ɓo tu ndo de koge ga jag liŋgi sen de hãge mo lay. Amaa day maa po jar maa peel taygen da’ wo wur de gayri debaŋ maa koɗ sããre maa ni Baan wo no. Joŋre jar maa peel taygen wo taŋgu tu diŋ ga á mo hã wo fẽẽre maaga jar maa ɓi feele ɓaaran wo de sãy ɓaara ti ɓuy ne hara; mo joŋ wo ga wosela ɓuy ti feele ɓaaran mo ko ga à de da se ge; lan ga á mo kay wo jar maa ɓi feele ɓaara wo ɓuy maa ya’ge see Jeofa. Á mo hã wo saɓlaŋ ti ɓaŋ siigi wããre Baa, ti ɓaŋ kne’ge nen hadge maa ti tayge ti wo, lan ti taygeti maa kleere wo de maa kluuri wo. Jar maa peel tayge maa po joŋ wo joŋre de jar maa ti CLH (“Comité de Liaison Hospitalier”) noga joŋ wo joŋre de LDC (Buro maa bo tiŋ-Baa maa ti filyale) wo. Joŋre raw do jar maa peel taygen wo debaŋ!

14. Mayse kay jar maa peel taygen wo maa koɗ sããren wo là (1 Piyer 5:​1-4)?

¹⁴ Piyer jor glog jar maa peel taygen wo maaga á mo “koɗ [wo] horog maga Baa hã [ne hara] do ma koɗge” mono (Jaŋ 1 Piyer 5:​1-4). Hayga ndo yaŋ diŋ jee maa peel tayge no, wùr de koge ga ndo da hẽẽre ɓon wo no, lan ndo de sãy ko de el ɓaara ti. Maapo ndo ko see ɓo go de gayri noga joŋre raw do ɓo debaŋ nen maaga wur joŋ do ɓo maa ko de el horog maa ni Baan wo ga so. Day ndo joŋ na joŋge là? Wãã ɗiggi ɓo sen ne Jeofa. Piyer yer ga: “Je maga ɓen diŋ joŋ ge peele mo lay, á mo joŋ ne de ẽgre maga Baa hã ne hẽn mo lay no” (1 Pi. 4:11). Maapo ga hẽẽre ɓo joŋ wo de re see maaga taw go ti tamsir se maa waran mo ti’ la ga. Amaa ɗig ga “Jee koɗ sããre maa kluu[n]”, Yeso Kris, de kããge maa kay rage ɗawa de daŋ ndo. Á de kããge maa kay rage hãã patala ɓaa, lan ti tamsir maa defayn pa. Baa gor do jar maa peel taygen wo diŋ ga á mo da wo hẽẽre ɓaaran wo no, mo ko wo de el ɓaara, lan ga á mo “joŋ wo . . . see [ɓaara] de el maga horogn mo ko wo see [ɓaara]”.

15. Jee maa peel tayge joŋ joŋge maa koɗ sããren wo là (Ko foton lay)?

¹⁵ Wilyam maaga hay diŋ jee maa peel tayge kiŋgi go tagla pur ko de el koɗge horog maa ni Baa wo no. De maaga ceege COVID-19 a mokay, á wo de jar maa peel tayge maa po dur wo maaga saara mo hay ɗe wosela ɓuy maa ti tayge ɓaaran tum nen naw renam. Á naa wer ɓe ga: “hẽẽreben hay wo go ko see ɓaara boŋ boŋ, day maapo saara de hay le’ ɗiggi go hãy hãy.” De maaga hẽnbe po wãã re maa see ɓe we ne hẽnbe maa tigriŋ po no, se co’ sug ɓe de woore maa laa wer ne mo maaga de gayge ɓe jag jiili mono, lan maa ko mo maaga á de sãy ɓe ti mono. Blam sen se kiɗ kefder noga videyo maaga kay hẽnbe sen yaŋ ɓil sid naa no. Á wãã ga: “Wara de daŋ maa ɓaan ɓuy, á de el debaŋ maaga koɗ sããren wo no. Naa dur debaŋ maa kay jar maa ko Jeofa; naa mo dur debaŋ maa koɗ hẽẽre naa wo, lan maa kay rage maaga á mo lag wo ti faagen lay.”

MEN JEOFA KOL MOGE TI NGEEL ƁE KEƊED

16. Naa joŋ joŋre de hadge maaga naa da’ ra ɓil kefder maa ni Piyern wo na de ɗeŋ maa hõnlà?

¹⁶ Naa da’ hadge po wo mbag ɓil kefder maa ni Piyer maa ɓog wo no. Maa po ndo ba nen da’ hadge ti ɓaŋ fẽn po maaga ndo de joŋ ne. Ko ba ɗa, ndo mbo de kããge maa ɗiggi ti bosa’ maaga ndo da’ ra yaŋ wo ti sir maa defayn mo yaw? Ndo mbo de maŋ ɗiggi maaga ndo sii wããre ti lakole, ti ngeel joŋre, noga ti ngeel tigriŋ po yaw? Ndo mbo de kããge maa naa nen dage ɓon go de peel ni de daŋ maa ɓaan see hẽẽreben wo yaw? Day nday jar maa peel taygen lay mono, nday mbay go de baa wer see ɓay maa koɗ sããre maa ni Baan wo de jiili ɓay ɓuy yawlà? Ɗig go de woore ti wiigi jag sen wo la no, lan ni ndo kiɗ ɗeŋ maaga ndo coo seele ɓo. “Waŋkluu de el” day á kay nday yaŋ maa gẽẽge ciŋ (1 Pi. 2:​3, [NWT]). Piyer hã bawge go ne naa jag jiili ga: “Baa de see ɓe kol ge wee ge yaŋ go ti ngeel ɓe keɗed, kol wee yaŋ kiŋkiŋ, hã ẽgre yaŋ wee, lag wee yaŋ ciŋ ti glog tiŋ ma de booge kiŋkiŋ no”—1 Pi. 5:10.

17. Hayga naa dur we, ga naa men see naa we hadge ne Jeofa no, poɗge ɓen joŋ ge diŋ maylà?

¹⁷ Taŋgu Piyer hay ɗig ga se bay de kããge maaga se joŋ jee maa wer Yeso wa (Lug 5:8). Amaa wer kayge maa de dage maa ni Jeofan wo de Yeson mono, á joŋ joŋre wer Kris de woore. Diŋ wersen so ga Jeofa hã faage ne Piyer maa “woge [kalge] ti ngel maaga je yãã naa go Yeso Kris Waŋkluu hay Waŋ ni tum mono” (2 Pi. 1:11). Sen diŋ poɗge may de woore debaŋ mokay ne! Hayga ndo men Jeofa we had ndo no, tenen maa tumn joŋ yaŋ diŋ poɗge maaga ndo da’ mono. Ndo “da’ [ge] fen maga [ndo] hã ɓil [ɓo] ti ɓe mono: diŋ maga Baa yãã ge see ɓay wo go wurpo mono”—1 Pi. 1:9.