Wiigi jag maa gus ga wosela ɓuy wii ne

Mari wo de war ɓe Jaŋa wo ti sir po maaga jar Philippines a wo le lagge ni, lan joŋ joŋre, day saara sii wããre Baa go ne hara de fruygi. Mari tõõ had wããre Baa ne jar maa ti sir maaga se ni mono, lan ne jar maa ti sir maa tigriŋ wo. Day á joŋ na joŋge là?

Mari wii jag jar maaga se had wããre Baa ne hara ga: “ndo yaŋ de ko jobo maa tigriŋ ga de sãy had wããre Baa ti yawlà?” Jee ɓen wãã we ga ãã no, se wii ne hẽn ga á mo wo de se ti jeŋ ɓaara”. Wiigi jag maaga go gus de maŋ sen, daŋge ɓe tum ɓo’ ti go de woore. Wer mayse ne? Werga jar maaga Wããre Baa de cõõre jag ɓaara wo de sãy maaga jar maa liŋ ni saara, noga bar saara mo laa wo ne. Jar maaga Mari had wããre Baa ne hara joŋ wo joŋge blam maaga Mari wii jag ɓaara mo là?

Yasmin wãy po maaga Mari had Bible ne hẽn kay ne maa da’ jar maaga wo de sãy had Bible ti naa. Maa po boŋ yoo ɓaara à ɗen Kristine, hadge wããre Baa co jag ɓe debaŋ, hãã nen maaga se raw wããge ga saara mo dog hadge ɓe ɓaale ɓog nen naw renam. De maaga Mari wii ne ga á yaŋ de ko jobo maaga de sãy had wããre Baa ti pa yawla mono, se yiŋ jag ga: “ãã, ndi kaŋ nen ɓo yaŋ ti bar ɓi maa po wo.” Lumo wo kiigi mbag nokay tu, Kristine kaŋ nen Mari ti kããre ɓe maa po wo naa ga hay wo de sãy had wããre Baa ti. Go blam hãã, Kristine kaŋ nen ɓe ti kããre ɓe maa tigriŋ wo pa. Jar maa po wo yoo kããre ɓe sen wo la, raw wo kaŋ nen ɓe ti jar maa tigriŋ wo pa.

Kristine joŋ de sãy maaga jar maa ɓi feele se maa Philippines mo had wo wããre Baa ti lay. Wer sen se wii mãy ɓe Aŋdreya ga se had wããre Baa ne hẽn lay. Taŋgu Aŋdreya hay ɗig ga ‘Sedeewa Jeofa wo diŋ jag Baa po maaga a defay, ga bay wo hã ɓil ti Yeso wa, joŋ wo joŋre diŋ de Wããre Baa maaga hay le de yerge jag Hebre taŋgu mo tawa tu.’ Amaa, blam maaga à had wããre Baa ne hẽn ɓaale boŋ nokay tu, ɗiggi ɓe coo ti Sedeewa Jeofa wo. Tum de maaga à had wããre Baa ne hẽn mokay, se wãã ga, hayga á yaŋ diŋ ɓil Bible no, kaŋ nen ga á diŋ cwãy!”

Ig go blam sen mẽ’ Aŋdreya kiɗ bar ɓe maa tigriŋ wo le ɓog ne Mari, lan ngaɓ kan ɓe maa ti ngeel joŋre ne hẽn pa; Saara tõõ wer had wããre Baa. Naa Aŋdreya hay we, à ɗen ga Aŋjela. Á go rew, day tum de maaga Aŋdreya had wo wããre Baa mokay, se hay co’ sug ɓaara, Mari hay bay de koge ga á de co’ sug saara wa. Wur po, Aŋjela wii Aŋdreya ga á mo wii Mari ga á had wããre Baa yaŋ ne se lay yawlà. Aŋjela hay da fẽn maaga à hay hadge ɓe ne hẽn debaŋ. Nen few boŋ tu, se ɗaw verse wo go ti ɓe ngaɓa debaŋ, lan se joŋ de sãy maaga saara mo had wããre Baa ɓaale naa nen naw renam! Aŋdreya kay ne maaga á mo hay tum co’ sug taygeti wo ti telfone.

De maaga Mari laa ga Josuwe war Kristine co’ sug saara freŋ freŋ de maaga saara had wããre Baa mokay, Mari wii ne ga á de sãy ya’ge le see saara ti lay yawlà. Josuwe fer ne Mari ga: “Ndi co’ diŋ sug ɓay tawa tu, amaa wii jag ɓi ti mopo wa, hayga ndo wii jag ɓi we la no, ndi ur jag ɓi.” Ti tĩĩgi wer hadgen nokay tu, se wii wiɗgi jag wo ngaɓa de daŋ Kristini, lan se joŋ de sãy maaga had wããre Baa ne se ti lay.

Wiigi jag maaga Mari wiin kaŋ wer ɓe had wããre Baa ne jar ngaɓa. Se wii kayge maaga Sedeewa Jeofa maa tigriŋ mo had wo wããre Baa ne jar sen wo no. Mari tõõ wer had wããre Baa ne jar 28 ti sir wo sar sar naa.

Yasmin maaga à tõõ had wããre Baa ne hẽn taŋgu joŋ batem go nen Few Ɓurgi, nen kiŋgi maa 2021 no. Kristine joŋ batem go nen Few Kabge, nen kiŋgi maa 2022 no, se fer Philippines see jar maa ɓi feele ɓe wo. Naare maa tigriŋ po wo ɓog ga Kristine hay kaŋ nen Mari ti ɓaara joŋ wo batem go lay. Few blam sen mbag Aŋjela joŋ batem go lay, se patala diŋ piyoniyẽ permanaŋ. Josuwe war Kristine wo de mãy ɓe, lan jar maa tigriŋ wo ngaɓa ga hay wo had wããre Baa wo de gẽẽge ciŋ ti wããre Baa de woore pa.

Ti wur maa ni Yeson wo de jar peele ɓen wo mono, jar debaŋ hay wo had fẽẽre maaga saara laa ti Yeso ne jar maa liŋ ni ɓaara wo de bar ɓaara wo. (Jaŋ 1:​41, 42a; Joŋre 10:​24, 27, 48; 16:​25-33) Wii ne jar maaga ndo had wããre Baa ne hara ga “á yaŋ wo de ko jar maaga wo de sãy had wããre Baa ti yawlà?” Hayga ndo wii wiigi jag sen we no, maapo ndo da’ jar yaŋ ngaɓa maaga ndo had wããre Baa ne hara?