Ndo joŋ joŋge maaga ndo mo hay diŋ barge maa ti ngeel ɓe là?

Ndo da’ see ɓo we go ti boŋ ɗiggi ga ndo de durgi jag re maa see ɓon wo boŋ yawlà? Naa wara nen “wur maa de gaali ga soɗ de bon debaŋ” ga joŋ ga naa mo ko see naa go de woo do, lan go boŋ mono. (2 Tim. 3:​1, TMN) Amaa de maaga naa yaŋ nen re no, jar yaŋ ngaɓa ga wo de kããge maa kay naa. Naa da’ ɓil Bible ga barge maa ti ngeel ɓe kay wo debaŋ de maaga naa da’ see naa we nen “ngeel maa de gayri” no.—Jõõ. 17:17.

BARGE MAA TI NGEEL ƁE KAY NDO KAYGE LÀ

Pol hay joŋ raŋge misiyoner de bar ɓe wo ngaɓa. Bar ɓe sen kay wo ne ti fẽẽre ngaɓa debaŋ. (Kol. 4:​7-11) De maaga Pol hay ti daŋgay Rom mono, bar ɓen joŋ wo joŋre po maaga á hay bay de kããge maa joŋge ɓe de see ɓe wa go ne hẽne. Ko ba ɗa, Epafrodid a de fẽẽre maaga hẽẽrebe maa Filip hã wo ra le ne Pol mono. (Flp. 4:18) Ticig hay woge de leder maaga Pol yer ra ne taygen wo mono. (Kol. 4:7.) De kayge maaga bar ɓen kay wo ne mono, Pol jor glog taygen wo, koh de maaga à hay maŋ jag ɓe go kalge siigi, noga de maaga á hay ti dangay mono. Day wara, ndo joŋ joŋge maaga ndo mo hay diŋ barge maa ti ngeel ɓe là?

Hẽẽre naa po wo wara kaŋ wo nen naa ti ɗeŋ maaga naa mo kay kããra ti holaŋ naa. Naa ko saɓlaŋ maygemanbe po ga hay ngaɓ go ga se diŋ bar Elisabed, piyoniyẽ po ga wo Espagne mo ɗa. De maaga à hay da’ ga cege kaŋser go de kalge ne man ɓe see mono, maygemanbe sen laa verse wo wo ne Elisabed ti telefon maa jor glog ɓe. Elisabed wãã ga: “wããre sen hã wo ẽgre ne ndi debaŋ maa ooge jag re sen de bay ɗiggi ga ndi go boŋ.”—Jõõ. 18:24.

Naa ya’ holaŋ naa ciŋ de hẽẽre naa wo de maaga naa kay ra woge ti taygeti noga ti siigi wããre Baa mono. Maapo ga ndo yãã ga ndo kay hẽẽrebe maaga wo go de garge maa woge ti taygeti, noga kalge go ti siigi wããre Baa. Hayga ndo joŋ sen we no, ndo jor glog ɓaara, saara jor glog ɓo lay. (Rom. 1:12) Amaa, Kretiyẽ maa po bay wo de kããge maa laage go wa. Day, naa joŋ bar ɓaara maa ti ngeel ɓe na joŋge là?

HAY BARGE DE JAR MAAGA BAY WO DE KÃÃGE MAA LAAGE GO SIIGI WA MONO

Hẽẽre naa maa po bay wo de kããge maa woge ti taygeti ti tiŋ-Baa wa, maapo ga werga á wo de cege debaŋ. Ko ba ɗa, hẽnbe po ga à ɗen ga Dafid, hay de cege kaŋsere. A joŋ few ti dogta hiira’ do cege kanser. Nen few se 6 mono, Dafid wo de wãy ɓe Lidia hay wo joŋ taygeti ti interned le liŋ ni ɓaara ɓaa.

Hẽẽrebe joŋ wo na joŋge maa jor glog ɓaara là? Blam taygeti tum mokay, hẽẽrebe dur wo maa wãã wããre de Dafid wo de wãy ɓe Lidia ti internede. Ni pa mono, de maaga Dafid wo de Lidia fer wo wããre we ti taygeti no, hẽẽrebe yer wo mesaje ne hara maa jor glog ɓaara. Ɓo’ge ti ɓen so, Dafid wo de Lidia ko wo see ɓaara maŋ see hẽẽre ɓaara wo.

Maapo ga naa maŋ mbe ga naa sii wããre Baa de hẽnbe po maaga bay de kããge maa kalge go sii wããre Baa wa. Naa mbe de kããge maa coo program naan mẽ’ nen maaga naa joŋ joŋre de ɓaara. Naa joŋ we doo sen ne no, ni naa go de ngaɓge ga naa bay go de yõõ ti ɓaara wa. (Jõõ. 3:27) Maapo ga pa, ndo mbo de kããge maa joŋ progam maa sii wããre Baa de leder noga de telefon de ɓaara. Maapo ga jar maa peel tayge joŋ wo taygetin de ‘videoconference’ nen maaga á mo hay wo ni lay. Dafid wãã ga: “Maaga wùr joŋ taygeti de hẽẽrebe maa ti grub siigi wããre wùr, lan tos de kããra, jor glog wùr debaŋ.” Ni pa mono, hayga á joŋ yaŋ no, ndo ɗe jee maaga ndo had wããre Baa ne hẽn yaŋ le liŋ ni hẽnbe sen maaga nday had wããre Baa ne hẽn de kããra yawlà?

Hayga naa yaŋ iggi see hẽẽrebe maaga bay wo de kããge maa laage go sii wããre Baa wa no, naa da’ nen maa ko rage, ko joŋre ɓaara maa de wooren wo no, lan barge naa de ɓaara ya’ ciŋ lay. Ko ba ɗa, hayga ndo yaŋ co’ sug ɗeŋ maaga á sii wo wããre Baa ne jar, lan kay wo jar maa baa barge de Jeofa no, sen jor glog ɓo yaŋ maa hoo sug ti ɓaara debaŋ. Hayga ndo yaŋ kay hẽẽrebe wo ti ɓaŋ joŋre maa ti nenterse wo no, ndo joŋ yaŋ de barge wo debaŋ.—2 Kor. 6:13.

De maaga Pol hay nen ngeel maa de gayri mono, bar ɓe Tid wo koge ɓe, day kay ne maaga á mo ko see ɓe de woore. (2 Kor. 7:​5-7) Wããre sen la ɓo’ sug naa ga naa coɓ hẽẽrebe wo bay diŋ de jor glog ɓaara de wããre tawa wa, amaa de kay rage de maaga á yiŋ wo we de re maa de gayri no.—1 Jaŋ 3:18.

KAY BAR ƁO WO DE MAAGA À YAŊ JOŊ BON ƁAARA NO

Hẽẽre naa maa Russie wo diŋ saɓlaŋ maaga daŋ wo go ti ɓaŋ kayge kããra ti holaŋ ɓaara. Naa ko wee re maaga hay da’ Sergey wo de wãy ɓe Tatiyana mo ɗa. Polis laa wo liŋ ni ɓaara kiɗ fẽẽre wo, blam saara hoo ra maa woge wii jag ɓaara. Polis ɓo’ wo Tatiyana le go taŋgu, day se fer le go liŋ. Sergey wãã ga: “De maaga [Tatiyana] a liŋ nokay tu, mãygemanbe po de coɓge raw koge ɓe tu. Blam, hẽẽrebe maa tigriŋ a wo kay wùr maa fer fẽẽre maaga polis hay dus wo ra go ti ngeel ɓaara.”

Sergey wãã ni pa ga: “wããre maa ɓil Jag jõõ 17:​17, ga wãã ga: ‘Barge da mo go ti nawn wo ɓuy, hẽnbe ɓen diŋ ma kayge ti wur re wo’ tum de cõõre jag ɓi. Ti wur se ga à hay joŋ bon wùr mono, ndi hay joŋ de sãy kayge hẽẽrebe wo ti debaŋ. Ndi ko so ga wããre maa ɓil Jag jõõ 17:17 diŋ cwãy. Jeofa hã hẽẽrebe maaga bay wo joŋ hẽẽne wa ne ndi maa kay mege.”a

Naa ɓuy de sãy barge maa ti ngeel ɓe wo ti ti wur maa de gayri wo. Naa joŋ ge de sãy ɓaara ti ti wur bon maa de hããn debaŋ pa. Diŋ wersen so, da ga naa dur wee go de ẽgre naa ɓuy maaga naa mo hay diŋ barge maa ti ngeel ɓe patala ɓaa!—1 Pi. 4:​7, 8.