Ɗig diŋ ti see ɓo tawa doo jar maa ti tamsir maa waran wo no wa

NDO mbo de koge ga jar maa po wo wara ngaɓa ɗig wo ga joŋ saara sar de jar lan yawlà? Koh à mo hay ba joŋ rage de woore, saara ɗig ga à mo hay joŋ saara de woore de daŋ sen de peel ni. Jar maaga ɗig wo de maŋ sen diŋ jar maaga ɗig wo ti see ɓaara tawa; á bay wo joŋ suse’ ne Jeofa ti fẽẽre maa do ɓaaran wo wa. Bible hay go de wããge ga jar joŋ ge doo sen ne no, ti wur naw maa blam no.—2 Tim. 3:2.

Cwãy tu seŋ, jar tõõ ɗiggi ti see ɓaara tawa tu bay diŋ wara wa. Ko ba ɗa, Adam wo de Efa hay maŋ wo ga saara ko fẽẽre maa de el wo de fẽẽre maa de ɓlaggen wo yaŋ diŋ saara de see saara tu. Day diŋ wersen so ga naa joŋ bon wara wer ɓaara mono. Kiŋgi go kis kis pur blam, Waŋ Osiyas hay ɗig ga se de kããge maa rod fẽẽre fõõre ɓil tiŋ-Baa. Amaa, se hay bay de kããge wa. (2 Kro. 26:18, 19) Doo sen no lay, jar Farisiyẽ wo de Sadusiyẽ hay wo ɗiggi ga saara maŋ see Baa wer maaga saara ti moore maa ni Abraham mono.—Mat. 3:9.

Jar po wo ti jeŋ naa ngaɓa ɗig wo diŋ ti see ɓaara tawa tawa, day maapo ga joŋre ɓaara sen hãy naa lay. (Gal. 5:26) Maapo ga naa tĩĩ wer ɗiggi ga à de hay joŋ naa sara de jar lan wo, noga ga á de hay hã joŋre maa po wo ne naa do, ga jar lan bay wo de ɓe wa. Naa joŋ joŋge maa nii ɗiggi sen wo go là? Taŋgu tu, naa ɗig wee doo Jeofa nono ti ɓaŋ se no. ‘Principes’ maa ɓil Bible po wo ɓog kay wo naa yaŋ.

Maŋ fẽn maaga naa nen da’ge ɓe diŋ Jeofa. Naa ko wee saɓlaŋ po wo ɗa.

Ɓi feele, Jeofa da ga jee twar mo ko ga wãy se de hoo sug ti se, lan wãy ɓe mo ko ga war se de da sege lay. (Efe. 5:33) Jeofa da ga jar maaga wo de da kããra mo hay naa wo nen dage maaga diŋ maa war ɓaara, noga wãy ɓaara go diŋ see kããra tawa tu. (1 Kor. 7:3) Pããrebe gor wo ga weere saara mo yãã wo jag saara; day weere gor wo ga pããre saara mo da wo saara, kay saara lay.—2 Kor. 12:14; Efe. 6:2.
Ti tayge mo lay no, naa nen hoo sug ti jar maa peel tayge, ga joŋ wo joŋre debaŋ mo lay.(1 Tes. 5:12) Ni pa, jar maa peel tayge mo joŋ wo see ɓaara doo waŋre see hẽẽrebe wo wa.—1 Pi. 5:2, 3.
Baa hã faage ne jar wãã re sir wo maaga á mo tar wo lompo wo; lan maaga jar mo hoo sug ti ɓaara.—Rom. 13:1, 6, 7.

Jeofa jee maaga da naa debaŋ hã fẽẽre ne naa dedaŋ fẽẽre maaga naa hay nen da’ rage mono. Wer ɓlagge maa see naan mono, fẽn maaga naa hay nen da’ge ɓe diŋ húulí tawa tu. (Rom. 6:23) Amaa Jeofa ɓo’ bosa’ ne naa ti debaŋ werga se da naa. (Siŋ. 103:10, 11) Bosa’ maaga á kaŋ ne naa ti ɓuy bay diŋ mopo maaga naa nen da’ge ɓe wa. Á kaŋ ne naa ti diŋ werga se da naa, lan se de yaŋ see naa debaŋ.—Rom. 12:6-8; Efe. 2:8.

MAYSE KAY NAA MAAGA NAA MO ƊIG TI SEE NAA TAWA NOGA ƊIG GA NAA DAŊ JAR LAN WA LA?

Naa mo joŋ hayya ne see naa see ɗiggi maa ti tamsirn wo. Maapo naa le’ ɗiggi ga naa de daŋ jar lan wo, se ko do naa ga. Ti wur po Yeso wãã mopo maa ngaɓge ga á go gus maaga naa ɗig doo sen nono. Á wãã ti jar joŋre po maaga yãã wo ga poɗ saara solay boŋ, ni saara sii yaŋ hẽẽ ti joŋre. Blam sen, jee payn raw ɗe jar joŋre maa tigriŋ wo le ni. Wo dayge de law mokay, se poɗ ra diŋ sen boŋ, koh ba de maaga jar lan joŋ wo joŋre nen boo boŋ mono. Amaa, jar maaga tõõ wo joŋre de jag toŋ mbuu, ɗig wo ga à hay poɗ saara de daŋ jar lan wo no, werga saara sii hẽẽ ti joŋre nen cege. (Mat. 20:1-16) Yeso joŋ joŋre de saɓlaŋ sen la maa ngaɓge ga jar maaga maŋ wo blam se mo hay fruy wo diŋ ti fẽn maaga Baa da ga se joŋn yaŋ ne hara mono.

Jar joŋre maa ɓil jag jõõ maa ni Yeson wo de raa waŋ ne jee pay no. — Werpiiri maaga hay sii wo ti joŋre hẽẽ, ɗig wo ga poɗge saaran mo hay de daŋ jar lan wo

Hay joŋ suse’e, gor do jar wa. (1 Tes. 5:18) Joŋ doo Pol no lay. Pol bay de wii Kretiyẽ maa Korenten wo ga á mo hã wo fẽẽre maaga se de sãy ɓaara ti ne se wa. (1 Kor. 9:11-14) Naa de hay joŋ suse’ ne jar lan wo ti fẽẽre maaga á joŋ wo ra ne naa mono, naa mo hay gor fẽẽre do ɓaara wa.

Apotre Pol wo de baa mburyug de jar maa tigriŋ wo ɓoge. — Apotre Pol bay de wii kayge wa

Hay fer ti see ɓo gesiŋ. De maaga jobo yaŋ ɗiggi ti see ɓe debaŋ no, se le’ ɗiggi tum ga se de hay da’ fẽẽre debaŋ de daŋ maaga se de ɓe mono. Ferge ti gesiŋ diŋ saŋgu ɗiggi maa de baywoore.

Collage: 1. Profed Daniyel ti wur maaga á go de tããbe mono. 2. Sir Babilon maa ɓaa no. 3. Daniyel de kããre ɓe jar Hebre maa 3 wo de maaga á hay jõõ mono. — Daniyel hay diŋ jobo maaga de el nen Jeofa werga á hay fer ti see ɓe gesiŋ

Profed Daniyel diŋ saɓlaŋ maa de woore ti ɓaŋ ferge ti gesiŋ. Á a le diŋ ɓi feele po maa de hoo sug ti, á hay diŋ jobo maa de woore debaŋ, de ti debaŋ, de ko wer fẽẽre po wo debaŋ pa. Wer sen, á de hay ɗig ga hoo sug ti se de daŋ jar lan wo. (Dan. 1:3, 4, 19, 20) Amaa, Daniyel hay tum fer ti see ɓe gesiŋ, day joŋre ɓe sen joŋ ga á mo hay diŋ jobo maaga daŋgo nen Jeofa.—Dan. 2:30; 10:11, 12.

Naa mo ɗee go do liggi koŋne ɓili, farge ti ciŋ maaga wo go de dusgi wara ti tamsir mo ti’ no. Nen maaga naa mo hay joŋ doo sen ne mono, á de el maaga naa mo hay jag ti feg, wer bosa’ maaga naa da’ do Jeofa wer ɓil de el ɓen mono.