“Ya’ge ɓiŋ Baa” de el nen naa!

1-2. (a) Naa joŋ joŋge maa sa’ barge maa kwũy de jobo là? (b) Naa wãã ge yaŋ ti hadge sen la ti maylà?

BAR ɓo maa ti ngeel ɓe yaŋ yawlà? Ndo joŋ joŋge maaga nday mo hay barge là? Maapo ga nday hay iggi see kããra, ndo da’ wer ne re maaga á hay hres nen ɓaara wo, lan da’ wer ne fẽn maaga á da ne wo de maaga á bay dage ɓe wa wo mono. Ndo wo da’ge ga joŋre ɓe wo de woore debaŋ nen maaga ndo ko see ɓe lay. Ndo le’ da bar ɓo sen debaŋ.

² Maaga ndo mo hay barge de jobo mono, á wii wuri, lan wii durgi debaŋ. Maaga naa mo hay sa’ barge maa kwũy de Baa naa Jeofa mono, á wii wúr wo de durgi do naa lay. Ɓil hadge sen la naa wãã yaŋ ti ɗeŋ maaga naa ya’ see Baa mbaŋ de ɓe, lan naa wãã yaŋ ti da’ge maaga naa da’ wer sa’ge barge de Baa mono. Taŋgu ɗa, naa ko wee wer mayse ga á de el ga naa mo sa’ barge maa kwũy de Bar naa Jeofa la.

3. Wer may ga á de el maaga naa mo ɗig ti fẽẽre maaga naa da’ ra de woore de maaga naa ya’ see naa see Jeofa ne?

³ Naa go de koge ga sa’ge barge de Jeofa diŋ fẽn maaga daŋ go. De maaga naa ɗig ti de el maaga naa da’ le wer ɓe, se jor wer naa debaŋ maaga naa mo ya’ see Baa mbaŋ pa. (Siŋ. 63:​7-9) Ko ba ɗa, naa de koge ga de maaga naa yaŋ rege de woore, yaŋ joŋ joŋre maa caa see naa go, yaŋ ig see naa no, sen kay naa ti hõõgesee debaŋ. Amaa, jar debaŋ bay wo ɗiggi ti fẽẽre sen wo wa, bay wo ko ngar hõõgesee ɓaara wa. Hayga naa yaŋ tum ɗiggi ti de el joŋge fẽẽre maaga kay wo naa no, se joŋ go see naa gus maaga naa mo hay tum joŋge diŋ fẽẽre sen wo no. Doo sen no lay, naa mbe go de koge ga sa’ge barge de Jeofa de ele; amaa hayga naa yaŋ ɗiggi ti de el sa’ge barge de ɓe no, se ya’ wer jor glog naa ciŋ ni maa sa’ barge de ɓe pa.—Siŋ. 119:​27-30.

4. Doo maaga Siŋ 73:28 wãã no mono, jee yer siŋn le’ ɗiggi ga hãylà?

⁴ Jaŋ Siŋ wora 73:28. Jee yer siŋ Siŋ wora maa 73 hay diŋ jee lefiɗ po maaga à hay de baage ɓe do jee ‘waɗ siŋ ɓil tiŋ maa ni Jeofa nono. Á hay diŋ jobo maaga hay go ti joŋre ne Jeofa kiŋgi pur debaŋ. Mbe de sen ɓuy á hay de sãy maaga se lay, jar maa ɓuyn lay, mo ko go ga “ya’ge ɓiŋ Baa” de el nen se, nen ɓaara lay. Wer mãyse ga á de el maaga naa mo ko Jeofa go de woore, naa mo sa’ barge maa kwũy de ɓe lay là?

“YA’GE ƁIŊ BAA” HÃ FRUYGI NE NAA

5. (a)  Wer may ga ya’ge see naa see Baa a de ti desãy ne naa là? (b) Koge re maaga Jeofa hã ne naa, kay naa, day koɗ naa na koɗge là? (Jag Jõõ wo 2:​6-16.)

⁵ Naa yaŋ ya’ge see Baa tum no, naa joŋ yaŋ de fruygi tum lay. (Siŋ. 65:5) Naa da’ fruygi yaŋ wer fẽẽre pur debaŋ. Maa taŋguŋ diŋ ga, joŋge joŋre de yaŋ maa ɓil Bible hã koge re ne naa. Koge re sen yãã naa go jag re maa de ɓlagge po wo, day kay naa maaga naa mo leɗ go nen ɓlagge maa kwũy wa lay. (Jaŋ Jag Jõõ wo 2:​6-16.) Diŋ wersen ga Bible wãã ga: “Je maga yaŋ de ko re sen woo we go, je maga kol go de ko ɗeŋ wããre mo lay!”—Jõõ. 3:13.

6. Wer may ga jee yer siŋn bas fruygi ɓen go là?

⁶ Á mbe cwãy, bar Jeofa yiŋ wo mbaara de re maa car jiili ɓaara go ti wur maa po wo lay. Jee yer Siŋ maa 73 car jiili go ti maaga á hay ko re maaga bay wo ti ngeel ɓe wa mono. Á le’ ɗiggi ga koh de maaga jar joŋ ɓlaggen bay wo hoo sug ti Jeofa wa laybla mono, á wo de da’ see ɓaara yaw. Jiili ɓe raw sõõge. Á le’ slag nen ti jar sen wo no. Ɗiggi ɓe maaga á hay ɗiggi ti jar ɓlagge maaga far wo ti see ɓaara ciŋ, ga á hay wo de da’ see ɓaara, wo tum holaŋ ti hõõgesee, ga bay wo jo bon wa lay, hay bay diŋ ɗiggi maa ti ngeel ɓe wa. (Siŋ. 73:​3-7, 12) De maaga á hay ko joŋge jar de gurn go ti ngeel ɓuy mo deŋ, se kal ɗiggi ga joŋge peele ne Jeofa bay kayge wa. Nen lawge ɓen, á wãã ga: “Day ndi yog doo ɓi go ga ndi mo duʼ ɓlagge wa mono de koɗ so.”—Siŋ. 73:13.

7. De maaga naa yaŋ nen lawge no, naa mo joŋ diŋ mayla? (Ko foto maa faale kefder no.)

⁷ Koh de maaga á hay mbe nen lawge mo laybla, á dur maa coo ɗiggi ɓe. De maaga á kal “ɓi tiŋ ma bay ɗag mani Baan mono”, Baa raw kayge ɓe maaga á mo coo ɗiggi ɓe maa debaywoore no. (Siŋ. 73:​17-19) De maaga naa yaŋ nen lawge no, bar naa Jeofa de ko re maaga naa de hresge nen ɓe mono. Á hã teŋge nen ne naa de yaŋ maaga naa da’ ɓil wããre ɓen, de yaŋ maaga naa da’ jag hẽẽre naa wo, de maaga naa yaŋ nen lawge no. Ren mo hay ba wo go de raw naa nen maaga ɗeŋ joŋ mopo bay do naa wa laybla, Jeofa kay naa yaŋ maaga naa mo caa jiili go wa.—Siŋ. 94:19.a

BAAGE BARGE DE BAA KAY NAA MAA JOŊ DUNIYÃ MAA TI NGEEL ƁE, LAN MAA KAŊ ƊIGGI TI NAW MAA PEELN LAY

8. Naa kãã maa ya’ see naa see Baa de ɗeŋ maa hõn wo pa ne?

⁸ Ya’ge see naa see Jeofa kay naa ti ɓaŋ fẽẽre po wo ɓoge. Maa taŋgun diŋ ga naw naa ti tamsir la co jag naa de maaga naa yaŋ barge de Baa no. Maa de ɓog no, sen kay naa maa koge ga fẽẽre maaga Baa wii ga se joŋ ge ra yaŋ a ge wo yaŋ cwãy. (Jer. 29:11) Naa wãã wee go ti fẽẽre se ɓogn wo de woore ɗa.

9. De maaga naa ya’ see naa we see Jeofa, sen hã fruygi ne naa na hãge ne?

⁹ Naw naa ti tamsir la co jag naa de maaga naa yaŋ barge de Baa no. Jar maaga bay wo hã ɓil ga Baa yaŋ wa ɗig wo ɓaaran ga da’ge bay ti tamsir la ni wa; day ga ig la mẽ’, naa huɗ ge yaŋ go. Amaa, laage wer ne Wããre Baa ɓo’ nen naa go ga Baa “yaŋ, day ga á poɗ jar maga kiɗn wo de jiili ɓaara ɓuy” mono. (Heb. 11:​6, TMN) Ni pa de maaga Baa joŋ naa mono, á ɓo’ ɗiggi maaga naa mo hay joŋ peele ne see ne naa ɓili. Wersen, de maaga naa yaŋ joŋ peele ne hẽn no, naa da’ fruygi debaŋ.—Dog. 10:​12, 13.

10. Doo maaga naa da’ ɓil Siŋ 37:29 ne mono, Jeofa ga se joŋ mayse yaŋ ne jar maaga kaŋ wo ɗiggi ti se ne?

¹⁰ Jar debaŋ bay wo kaŋ ɗiggi ti naw maa peeln wa. Wersen, nen naw ɓaaran á ɗig wo diŋ ti joŋre, dage naare, ɓiŋgi weere, noga ɗaw suŋgu ciŋ maa gor ti tããbe ɓaara. Á joŋ wo doo sen diŋ werga á bay wo de ko fẽẽre maaga Baa wii ga se joŋ ra yaŋ wo ti wurpo mo wa. Amaa jar joŋ peele ne Jeofa wo de koge ga á de ko nen ti saara. (Siŋ. 25:​3-5; 1 Tim. 6:17) Maa naa, naa de kaŋ ɗiggi naa ti Bar naa, Baa Jeofa. Go nen naa ga á bag ge jag fẽẽre maaga á wii ga se joŋ ra ge yaŋ go ɓuy. Yoo bosa’ maaga naa da’ ge ra mono, naa goŋ ge Jeofa yaŋ tum ti Paradis.—Jaŋ Siŋ wora 37:29.

11. De maaga naa ko ga naa see Baa mbaŋ, se joŋ see ne naa na joŋge ne, day se joŋ see ne hẽn na joŋge laylà? 

¹¹ Ya’ge see naa see Baa kay naa ti ɓaŋ fẽẽre maa tigriŋ pur debaŋ. Jeofa ga se fug ɓil go ne naa ti ɓlagge naa wo, hayga naa wii fuggi ɓil we do ɓe no. (Esay. 1:18) Sen joŋ ga naa mo hay tum ferge ɗiggi ti ɓlagge maaga naa hay joŋ ra le go ti naw maa glog wo wa. (Siŋ wora. 32:​1-5) Wersen, ɓil naa joŋ go feh de maaga naa joŋ ɓil go ne Jeofa feh mo lay no. (Jõõ. 23:15) Kidolgi, bosa’ maa tigriŋ po yaŋ mbaara deŋ maaga naa da’ wer sa’ge barge de Jeofa. Day naa joŋ diŋ mayse maa ya’ see naa see Jeofa là? Naa ko wee sen ɗa.

NAA JOŊ DIŊ MAYSE MAA “YA’ SEE NAA SEE BAA LA”

12. Naa joŋ joŋge maa ya’ge see Baa mbaŋ là?

¹² Hayga ndo yaŋ go de wumgi nen bii no, ni ndo go de durgi debaŋ maa ya’ see ɓo see Baa yaw. Werga ndo joŋ nen had cwãy ti Jeofa wo de Yeso, ndo mbiɗ faale go ne ɓlagge ɓo maa ɓaa wo, ndo hã ɓil ti Baa, day ndo dur maaga seele ɓo mo hay doo maaga Baa wii ga ndo mo see nono. De sen mbe ɓuy, maaga naa mo hay tum barge de Baa mono, daga naa mo hay tum joŋ fẽẽre sen wo no.—Kol. 2:6.

13. Fẽẽre maa swa’ maaga kay wo naa tum maa ya’ see naa see Jeofa wo diŋ maa hõn wo là?

¹³ Day kayge naa tum maa ya’ge see Jeofa diŋ maylà? (1) Da ga naa mo hay tum jaŋ Wããre Baa, frug wer ɓe lay. Maaga á mo hay go gus mono, da ga naa mo kiɗ wer bay diŋ ne fẽẽre maaga wo go gus ti Baa tawa wa. Naa mo kiɗ diŋ ɗeŋ maa koge ga Baa wii ga naa mo joŋ diŋ may la, day ni naa mo men see naa koɗge ne ‘principes’ maa ɓen wo no. (Efe. 5:​15-17) (2) Naa ya’ hãge ɓil naa ciŋ de kiɗgi wer ne fẽẽre maaga ɓo’ wo nen naa go ga Baa da naa cwãy mono. (3) Naa mo caa hee go de fẽẽre maaga sõɗ wo ɓil ne Jeofa mono, naa baa barge de jar maaga joŋ wo fẽẽre se maa de ɓlaggen wo ga lay.—Siŋ wora. 1:1; 101:3.

14. Doo wããre maaga naa da’ ɓil 1 Korente 10:31 mono, naa mo joŋ tum diŋ mayse maaga naa mo hay de cõõre jag Jeofa là? (Ko foton ni lay.)

¹⁴ Jaŋ 1 Korente wo 10:31. Á de el maaga naa mo joŋ diŋ fẽẽre maaga co wo jag Jeofa mono. Naa joŋ sen bay diŋ de woge ti taygeti wo de siigi wããre Baa ne jar tawa wa. Fẽẽre maa de el sen wo diŋ fẽẽre maaga naa joŋ ra nen naw tum mono. Ko ba ɗa, de maaga naa yaŋ de deele ti fẽẽren ɓuy, lan do naa yaŋ ma’ge lay no, naa fruy ɓil Jeofa. (2 Kor. 8:21; 9:7) Jeofa da ga naa mo ɓo’ nen go ne se ga tenen maaga se hã ne naa de cõõre jag naa. Naa joŋ haya ne see naa ti rege maa de raw ɓil naa, maaga naa jo de raw ẽgre naa; de joŋge fẽẽre maa tigriŋ maaga kay wo naa maa joŋge holaŋ mono. De maaga Jeofa ko naa durgi maa yãã jag ɓe, koh ti fẽẽre maa mẽ’ mẽ’ wo mono, se ya’ wer da naa debaŋ pa.—Lug 16:10.

15. Jeofa da ga naa mo hay joŋ jar ɓuy joŋge là?

¹⁵ Jeofa hã fẽẽre ne naa ɓuy, koh de jar maaga bay wo joŋ peele ne hẽn wa mono. (Mat. 5:45) Á da ga naa mo joŋ see jar doo sen no lay. Á da ga naa :“mo wãɗ ɓlagge ti jar wa, naa mo hay jam de jare, . . . naa mo hay desãy see jar tum ɓuy.” (Tid 3:2) Koh jar mo hay ba wo joŋ peele ne Baa wa laybla naa bay ɗiggi ga naa go de daŋ rage wa. (2 Tim. 2:​23-25) Naa yaŋ joŋ jar ɓuy de el, se ya’ naa see Baa mbaŋ pa.

NAA KÃÃ MBE MAA “YA’GE SEE BAA” KOH DE MAAGA NAA JOŊ ƁLAGGE WE NO

16. De maaga á hay joŋ joŋre ne Jeofa mono, jee yer siŋ maa 73 le’ ko see ɓe koge là?

¹⁶ Ti wur maa po ndo ɗig doo ga Jeofa go see ɓo hãã wer re maa de bay woore maaga ndo hay joŋ ra nono. Doo maaga naa hay ko le go ciŋ la no mono, tee re sen hay da’ jee yer siŋ maa 73 lay. Á wãã ga:“Gwa’ go me’ koɗ ga ɓaale ɓi de cel go. Celge sen kãã maa joŋ mopo see ɓi gà has ɓuy tuu, ɓaale ɓi naa ndarda seŋ gà.” (Siŋ. 73:2) Á de see ɓe tu wãã ga “jag jiili ɓi hay ɓlag go”, ga ndi “hay ma’ nen ti go”, ndi kol go doo “horog” peel Jeofa nono. (Siŋ. 73:​21, 22) Day á hay mbe na ɗiggi ga Jeofa da se ga so, fug ɓil go ne se ti ga so wer ɓlaggen sen wo yawlà?

17. (a) Koh de maaga á hay mbe go de sol do laybla, jee ‘waa siŋn joŋ diŋ maylà? (b) Saɓlaŋ ɓe had mayse ne naa lay ne? (Ko foton wo ni lay.)

¹⁷ Koh de maaga jee ‘waa siŋn hay mbe ɗiggi ga Jeofa da se ga so laybla mono, amaa á ɗig ne wo naw pur ga. Koh nen lawge ɓen á hay go de koge ga se de sãy joŋge see Jeofa mbaŋ. Á raw yerge ga: “Mbe de sen ɓuy, ndi hay mbi tum de ɓo, ndo hay ɗaw doo ɓi maa war no. Ndo hay koɗ mege de baage yaŋ ɓo no, blam ɓe ndo yãã ge ndi yaŋ wo ti togoɗge.” (Siŋ. 73:​23, 24) Naa lay, naa nen wii Jeofa ga á mo coɓ naa de maaga naa yaŋ go hẽg le’ge gesiŋ ti hãge ɓil, noga de maaga naa yaŋ go sol do wer ɓlagge naa wo no. (Siŋ. 73:26; 94:18) Naa mo joŋ ba ɓlagge maa kwũy laybla, naa mbe de kããge maa wii fuggi ɓil go de bawge jag jiili ga Jeofa “go de gorge tum maa fug ɓil go” ne naa ti (Siŋ. 86:​5,TMN) De maaga naa ko we do ga naa go de sol do no, á de el debaŋ maaga naa mo ya’ see naa see Baa naa no—Siŋ. 103:​13, 14.

NAA MO “YA’ SEE NAA SEE BAA” DIŊ MAA TUM

18. Wer may ga naa mbe tum maa ya’ see naa see Jeofa là?

¹⁸ Naa mbe tum nen ya’ see naa see Baa werga naa joŋ ge mbe tum had fẽẽre see ɓe. Bible wãã ga faage maa ni Jeofan wo, koge re ɓen de koge ɓen “laa wo wer do jobo ga.”—Rom. 11:33.

19. Kefder Siŋ wora hã bawge jiili maa hõn go ne naa là?

¹⁹ Ɓil Siŋ maa 79:13 mono, naa jaŋ ni ga: “Day maa wùr jar ɓo no, horog maga wùr de koɗge, ti ngeel koɗ horog ɓon mono, wùr maŋ ge ti ɓo yaŋ ciŋ tumi. Ti wer maga ndar ge wo wo mo ɓuy no, wùr fer ge yaŋ dog togoɗ moge.” Ndo ti see ɓo á mo hay go nen ɓo ga bosa’ yaŋ gor moge hay ga ndo yaŋ tum ya’ ge see Jeofa no. Doo jee ‘waa siŋn ne lay, ndo mbo nen bawge jag jiili ɓo ga: “Baa joŋ ge mbe tum diŋ húulì ma jag jiili ɓi no, diŋ nen mo ma ɓi no.”—Siŋ. 73:26.