Kiɗ Jeofa maa da’ coɓge

1. Naw jar Jwif maaga hay wo le Babilon hay wo na ẽlà?

ƊIG ba ti ɗeŋ maaga jar Jwif de hay ko wo see ɓaara wo Babilon mo ɗa. Á hay ko wo jar go taw sir ɓaara. Wer ɓlagge ɓaara wo de ɓlagge maani moore ɓaaran wo, à hoo ra wo go Babilone. (2 Kro. 36:​15, 16, 20, 21) Á mbe cwãy ga á hay wo wo ni go de pogge ga ti’i. (Jer. 29:​4-7) Amaa, naw ɓaaran hay bay ne hara gus wa; lan saara hay bay dage ga saara mo lag wo ni wa. Á hay wo ɗiggi ti re maaga á hay wo nen ɓe na ɗiggi là? Jobo maa po yoo ɓaara boŋ wãã ga: “Ti jeŋ bii ma Babilon wo mono, Wùr hay de lagge ni, day hay ti roo, jag ɗiggi ti Siyoŋe.” (Siŋ. 137:1) Jar Jwif hay wo de sãy coɓge ti cwãy tu, day á hay da’ wo coɓgen na gen là?

2-3. (a) Jeofa hay joŋ mayse ne jar Jwif maaga hay wo le go de caa nen mo là? (b) Naa ko ge yaŋ ɓil hadge sen la diŋ mayse wo là?

² Jeofa diŋ “Baa maa coɓ nen jar nen bon ma honla ɓuy no.” (2 Kor. 1:​3, TMN) Á diŋ Baa maa de dage, ga coɓ nen jar maa wer ɓen wo go ɓil feh. Jeofa hay de koge ga jar maa po wo yoo jar maaga hay wo le go de caa nen Babilon yãã wo liŋgi sen yaŋ, day fer wo yaŋ le see se. (Esa. 59:20) Diŋ wersen so ga kiŋgi de daŋ kis taŋgu maaga à raw de jar Jwif wo Babilon mono, Jeofa hã ẽgre nenterse ɓen ne profed Esay maa yer kefder maa de ɗúu ɓe no. Maa joŋ maylà? Esay wãã ga: “Teŋ we nen jar ɓin wo, teŋ we nen ɓaara, wããn diŋ Baa ɓay no.” (Esa. 40:1) Ɓil kefder maani Esayn mono, Jeofa hã coɓge maaga jar Jwif hay wo de sãy ɓe ti ne hara.

³ Ɓil hadge sen la, naa ko ɗeŋ po yaŋ wo swa’ ga Jeofa hay coɓ nen jar Jwif maaga hay wo le go de caa nen Babilon mono: (1) á hay wãã ne hara ga se fug ɓil yaŋ go ne jar maaga mbiɗ wo faale ne ɓlagge ɓaaran wo ti, (2) se hay coɓ nen jar maa sen wo ti naw maa pel no, lan (3) se kay ra maaga á mo joŋ wo hẽẽne wa so. Naa ko ɗeŋ maaga Jeofa coɓ nen naa wara doo saara no lay yaŋ.

JEOFA FUG ƁIL GO NE NAA TI

4. Jeofa ngaɓ go na ngaɓge ga se diŋ Baa maa ko decoo jar là? (Esay 55:7)

⁴ Jeofa diŋ “Baa ma ko decoo jar debaŋ no.” (2 Kor. 1:3) Á hay naa nen joŋre sen go de maaga á wãã ga se fug ɓil go ne jar Jwif maaga mbiɗ wo faale we ne ɓlagge ɓaaran wo ti mono. (Jaŋ Esay 55:7.) Á wãã ga: “De dage ma tum no, ndi fer ge yaŋ ko decoo ɓo.” (Esa. 54:8) Jeofa naa nen koge decoo ɓen go na naage là? Koh de maaga jar Jwif ig wo mbaara le Babilon ni kiŋgi ngaɓa wer debay yããge jag ɓaaran laybla mono, Jeofa wãã ne hara ga á joŋ ge wo wo ni maa tum gà. (Esa. 40:2) Sen hay diŋ mopo maa coɓ nen jar Jwif maaga hay mbiɗ wo faale ne ɓlagge ɓaara, lan ga hay wo de sãy maaga saara mo co jag Jeofa ti mono.

5. Wer mayse ga naa de hay hã ɓil ti fuggi ɓil maani Jeofan de daŋ jar Jwif wo là?

⁵ Sen had mayse ne naa là? Jeofa de sãy fug ɓil go ne jar maa joŋ joŋre ne hẽn wo ti de jiili ɓe ɓuy. Fẽn po boŋ ga jar Jwif hay bay wo de koge ɓe wa, kay naa wara maa koge ga Jeofa de sãy ful ɓil go ne naa ti. Fẽn sen diŋ maylà? Naa de ko fẽn maaga Jeofa joŋ maa fug ɓil go ne naa ti ti ɓlagge naan wo mono. Kiŋgi go blam profesi maani Esay kis kis puri, Jeofa ɓo’ Weel dage ɓe maa boŋn le go gesiŋ, huugi go maa coo jar téebeere maa de ɓlagge see ga mbiɗ wo faale ne ɓlagge ɓaaran mono. Werga Yeso huu go ti re naa so mono, Jeofa men ɓlagge naa wo go ne naa eŋ ɓuy tu. (Joŋre 3:19; Esa. 1:18; Efe. 1:7) Jeofa diŋ Baa maa fug ɓil go ne jar tin cwãy tu!

6. Wer mayse ga ɗiggi ti ti fuggi ɓil maani Jeofan coɓ nen naa là? (Ko foton lay.)

⁶ Wããre maaga à yern de ẽgre nenterse Jeofa ɓil Esay 55:7 coɓ nen naa de maaga jiili naa yaŋ caa kiida naa wer ɓlagge po maaga naa joŋn no. Jiili jar maa po wo yoo naa joŋ mbaara tum caa kiida ɓaara ti ɓlagge maaga saara joŋ le ɓaa, koh de maaga á mbaara go de mbiɗ faale ne ɓlagge sen mono. Sen joŋ debaŋ ɓe de maaga naa yaŋ joŋ bon wer ɓlagge sen ɗa no. Amaa hayga naa yaŋ go de sii ɓlagge sen ne jar maa pel tayge wo, lan ga naa men joŋ ɓlagge sen we go lay no, naa mo hay go de bawge jag jiili naa ga Jeofa go de fug ɓil ne naa ti. Day de maaga Jeofa fug ɓil we go ne naa ti no, á fer ɗig ti ti ɓlagge naan ga so. (Tab ne de Jermi 31:34.) Doo maaga Jeofa bay ɗiggi ti ɓlagge naa maaga naa joŋ le ɓaa wa lay mono, daga naa mo ɗig ti ti ɓe wa lay. Fẽn maa de woore nen Jeofa diŋ fẽẽre maaga naa joŋ ra wara mono, bay diŋ ɓlagge maaga naa hay joŋn le go ɓaa mo wa. (Ese. 33:​14-16) La maŋ ti sir maa defay mono, Pan naa maa de dagen pog naa yaŋ go jag re maaga daɗ wo naa wer ɓlagge naa wo no.

7. Mayse jor glog naa maa wããge ne jar maa pel tayge wo ga naa hay joŋ ɓlagge maa kwũy là?

⁷ Naa joŋ joŋge hayga ɗiggi naa yaŋ caa kiida naa ti ɓlagge maa kwũy po maaga naa joŋ ne ga na yoŋ ne là? Bible jor glog naa maaga naa mo wii kayge do jar maa pel tayge wo. (Jag 5:​14, 15) Amaa maapo se joŋ ne naa gus maa sii ɓlagge maaga naa joŋn mo gà. Day naa mo hay fer ɗiggi ga Jeofa joŋ joŋre de jar sen wo maa kay naa; lan ga á naa ge wo nen dage wo de koge decoo yaŋ go see naa doo Jeofa nono. Hayga naa fer we ɗiggi ti sen, lan naa mbiɗ faale we ne ɓlagge naan wo no, ni naa joŋ yaŋ de sãy sii ɓlagge naan ne hara ti. Ko maaga koge decoo maani Jeofan coɓ nen hẽn naa po ga à ɗen ga Arthura, ga ɗiggi ɓe hay ruugi ɓe debaŋ ti ɓlagge ɓe mo ɗa. Arthur wãã ga: “Nen kiŋgi boŋ, ndi hay ko pornografi. Blam maaga ndi laa siigi wããre ti ‘conscience’, ndi sii ɓlagge sen ne wãy ɓi, lan ne jar maa pel tayge wo. Blam sen mokay, jiili ɓi suu. Amaa ndi hay mbi tum ɗiggi ti fẽn maaga ndi hay joŋn mo ɗa. Jar maa pel tayge ɓo’ wo sug ɓi ga Jeofa bay go de tob ndi go wa. Á liŋ naa diŋ werga á da naa. Wããre ɓaara maa de wooren du’ jiili ɓi debaŋ, lan hã bawge go me ga Jeofa go de fug ɓil me ti cwãy.” Arthur wara diŋ piyoniyẽ permanaŋ lan diŋ jee kay jar maa pel tayge wo pa. Sen jor glog naa de maaga naa ko ga naa mbiɗ faale we ne ɓlagge naan, Jeofa go tum gorge maa fug ɓil go ne naa ti mono!

JEOFA JOŊ GA NAA MO KAŊ ƊIGGI TI NAW MAA PEL NO

8. (a) Coɓge nen maa hõn ga Jeofa hã ne jar Jwif wo là? (b) Doo maaga naa da’ ɓil Esay 40:​29-31 ne mono, kaŋge ɗiggi ti naw maa peln hay joŋ see ne jar Jwif maaga hay mbiɗ wo faale ne ɓlagge ɓaaran na joŋge là?

⁸ Maapo jar Jwif hay ɗig wo ga saara fer le ti sir saara ti boŋ ga so hase. Werga jar Babilon hay bay wo men jar maaga saara hay hoo ra rawge ti sir ɓaara ti boŋ wa. (Esa. 14:17) Jeofa wãã ne hara ga se pog ra yaŋ go, day mopo kãã maa maŋ jag se go joŋ sen gà. (Esa. 44:26; 55:12) Nen Jeofa, Babilon hay doo ɓurgi maaga laa ti fẽn far klew nono. (Esa. 40:15) De maaga ndo fug ɓurgi we no, á yee nen go. Se na doo sen no lay ga á hay go gus ne Jeofa maa pog jar maa ɓen wo le go Babilon mono. Wããre Jeofa sen de hay kay jar Jwif wo na kayge là? Á de hay coɓ nen ɓaara. Amaa bay sen tawa wa. Esay hay yer ga: “ama jar maaga gor wo do Jeofa fer wo daʼ egre, fer wo pudgi doo gar wo nono.” (Jaŋ Esay 40:​29-31, TMN.) Cwãy tu, wããre sen hã ẽgre ne hara; á “fer wo pudgi doo gar wo nono.”

9. Mayse hay go ngaɓge ne jar Jwif wo ga Jeofa bag ge jag wããre maaga á wãã ga se pog ra yaŋ go là?

⁹ Jeofa hay wãã ne jar Jwif wo pa ga fẽn maaga se wãã ne hara de hay bag jag go cwãy. De ɗeŋ maa hõnlà? Ɗig ti profesi maaga á hay wo de ko rage ga hay wo go de bag jag mono. Á hay wo de koge ga Jar Asiri hay hoo wo wer jar maa hwal Israyel, lan raw de ɓaara. (Esa. 8:4) Á hay ko wo jar Babilon wo go taw Jerusalem lan raw de ɓaara Babilone. (Esa. 39:​5-7) Á hay ko wo maaga à ɓer nen waŋ Sedesiyas go, lan à raw de ɓe Babilon mono. (Jer. 39:7; Ese. 12:​12, 13) Fẽẽre maaga Jeofa hay wãã ra go pel bol ɓuy hay bag wo jag go. (Esa. 42:9; 46:10) Fẽẽre sen wo ɓuy ya’ wo hãge ɓil ɓaara ciŋ ga fẽn maaga Jeofa wãã ga se pog ra yaŋ go bag ge jag yaŋ go!

10. Mayse kay naa maa kaŋ ɗiggi gor fẽẽre maaga a ge wo le pel ti wur naw maa glog la là?

¹⁰ Sen had mayse ne naa là? De maaga naa ko see naa we go nen gayri no, fẽẽre maaga Jeofa wãã ga se joŋ ra yaŋ nen naw maa peln mbaara de kããge maa coɓ naa, lan maa hã ẽgre ne naa lay. Re maa ti tamsirn de ya’ wer de pel ni debaŋ, lan jar hee Baa maa de ẽgren kaŋ wo ne naa nene. Amaa naa mo hay woo do go wa. Jeofa wãã ga naa joŋ ge yaŋ ti paradis maa tum. Wo ni naa joŋ yaŋ jam, lan nen ti desãy. Naa mo hay tum kaŋ ɗiggi ti wããre se no. Hayga naa bay we joŋge doo sen ne wa no, se kol ne naa doo ga naa de ko ngeel maa de woore po wo nen ‘vitre’ maa de ɗag nono. Naa joŋ joŋge maa “yog ‘vitre’n” go nen maaga fẽẽre maaga naa kaŋ ɗiggi gor rage mo kol wo diŋ cwãy nen naa là? Naa mbe maa kiɗ wur tum maa ɗiggi ti naw naa maaga joŋ wo ɓil sir maa defayn mono. Maapo ga naa jaŋ kefder wo, ko videyo wo, lan ‘wad siŋ maaga wãã wo ti kaŋge ɗiggi gorge naa no. Noga naa wãã fẽẽre maa de woore maaga naa de gor bagge jag ɓaara go ne Jeofa nen tosge.

11. Mayse kay mãygemanbe po maaga hay de cege maaga gaali maa pẽẽge see maa ferge da ẽgre là?

¹¹ Naa ɗig wee ba ti maaga, kaŋge ɗiggi ti naw maa pel gor fẽẽre maa de woore, hã coɓge nen wo de ẽgre ne mãygemanbe po ga à ɗen ga Joy mo ɗa. Cege maaga gaali maa pẽẽge hay see ɓe. Á wãã ga: “De maaga ndi ko see ɓi we go de hoo ẽgre do re maa see ɓin no, ndi wãã fẽn maaga de gay mege nen ɗiggi ne Jeofa, go de bawge jag jiili ga á laa fẽn maaga ndi wãã mono. De ngar ngeel sen, Jeofa hã ‘egre se ma de daŋ egren ɓuy’ me.”(2 Kor. 4:7) Joy hay ko see ɓe wo go ɓi sir maa defayn pa, ti ngeel maaga “je ma ɓi leege maga riŋ ga: ‘Ndi de cegè, baywa’” mono. (Esa. 33:24) Hayga naa yaŋ wãã fẽẽre maaga gay wo naa jag jiili ne Jeofa, lan yaŋ kaŋ ɗiggi ti fẽẽre maaga á wãã ga se joŋ ra yaŋ ne naa no, ni naa da’ ẽgre yaŋ maa soɗ gayri maaga naa yiŋ de ɓaara mono.

12. Wer re maa hõn wo ga naa kaŋ ɗiggi ti fẽẽre maaga Jeofa wãã ga se joŋ ra yaŋ mo là? (Ko foton lay.)

¹² Doo maaga á hay joŋ de jar Jwif maaga hay wo le go de caa nen Babilon no lay mono, Jeofa hã saɓlaŋ fẽẽre po wo ngaɓa maaga naa mo kaŋ ɗiggi ti fẽẽre maaga se wãã ga se joŋ ra mono. Ɗig ti profesi maaga naa de ko rage go wara de bag jag mono. Ko ba ɗa, naa de ko sir maaga go de ẽgre ti tamsir ɓuy ga “plaŋ de egre, plaŋ de gayre” mono. (Dan. 2:​42, 43) Naa wara de laa “fiɗ gi sir. . .ti sir ma tigriŋ wo sar sar lay,” lan naa go de sii wããre Baa ti “tamsir krub ɓuy.” (Mat. 24:​7, 14) Profesi sen wo de maa tigriŋ ya’ wo hãge ɓil naa ciŋ ti fẽẽre maa coɓ naa, ga Jeofa wãã ga se joŋ ra, ga bay wo de bag jag wa ɗa mono.

JEOFA KAY NAA MAAGA NAA MO CAA JIILI GO WA

13. (a) Jar Jwif de hay yiŋ wo de gayri maa hõn de maaga wur yãã ragen hay go de kosge mo là? (b) Doo maaga naa da’ ɓil Esay 41:​10-13 no mono, de ɗeŋ maa hõn ga Jeofa hay coɓ jar Jwif maaga hay wo le de caa nen mo là?

¹³ Jeofa coɓ nen jar Jwif maaga hay wo le de caa nen Babilon de wããge ne hara ga se pog ra yaŋ le go; á hay de koge ga maapo ga á hay de gayri see ɓaara de maaga, wur sen go de age mono. Á hay wãã go pel bol ga waŋ po maa de ẽgre le’ ge sir maa de kii ti Babilon wo no, blam le’ Babilon ti see ɓe tu yaŋ, lan naa ge blum yaŋ. (Esa. 41:​2-5) Jar Jwif hay wo maa joŋ hẽẽne yawlà? Jeofa hay coɓ nen jar maa ɓen wo go taŋgu de wããge ga: “Joŋ hẽẽne wa werga ndi yaŋ de ɓo. Ti bii mo hay go nen ɓo ta’ ta’ wa werga ndi diŋ Baa ɓo no.” (Jaŋ Esay 41:​10-13.) Á hay da wããge ga hãy, de maaga á wãã ga “Ndi diŋ Baa ɓo no” là? Á hay bay ɓo’ sug jar Jwif wo diŋ ti goŋge ɓe wa, werga sen hay go tinoo tu ga á hay wo goŋge ɓe. Amaa, á hay ɓo’ sug ɓaara ga se hay tum de ɓaara.—Siŋ. 118:6.

14. Jeofa woo jiili jar Jwif wo de ɗeŋ maa hõn pa là?

¹⁴ Jeofa woo jiili jar Jwif maaga hay wo le de caa nen Babilon de wããge ne hara ti ẽgre ɓe wo koge re ɓe maa bay taw ti no. Á wãã ne hara ga á mo hoo wo nen ɓaara ciŋ ko ger wo ɗa la. Á wãã ne hara pa ga se taw bay diŋ de joŋge ger wo tawa wa, amaa se ɗe ra go de ɗúu ɓaara ɓuy pa. (Esa. 40:​25-28) Hayga Jeofa yaŋ go de ko ger wo de ɗúu ɓaara boŋ boŋ ɓuy no, sen go tinoo tu ga á go de ko jar maa joŋ joŋre ne hẽn wo de ɗúu ɓaara boŋ boŋ ɓuy lay. Day pa hayga Jeofa da’ ẽgre maa joŋ ger wo no, se ɓo’ nen ga á de kããge maa kay jar maa ɓen wo lay. Jar Jwif maaga hay wo le de caa nen Babilon hay bay wo maa caa jiili noga maa joŋ hẽẽne wa.

15. Baa hay bag jag jar Jwif maaga hay wo le go de caa nen see fẽn maaga hay gor rage na bagge là?

¹⁵ Jeofa hay wãã fẽn maaga jar Jwif sen de hay joŋ wo de maaga wur yãã ragen a we go no. Ɓil kefder maa ni Esay, Baa wãã ne jar maa ɓen wo ga: “Wo we laage ɓil tiŋ naw ɓayn wo, nday jar mani ɓi no, tẽg we jag tiŋn wo ti ɓay. Yoŋ we wo go ni semagga nen maga bagge põõn mo taw go ɗa.” (Esa. 26:20) Maapo ga jar Jwif joŋ wo joŋre de wããre sen de maaga Waŋ Sirus le’ Babilon mono. Jee Greg po maa ɓaa ga de ko wer mbaa wo wãã ga: De maaga á kal le Babilon mono, á “hã jag liŋgi ga ‘war jar maaga à da’ ra siigi mo go ɓuy.” Ɗig ba mbo ti hẽẽne maaga hay joŋ jar Babilon wo mo ɗa! Amaa maapo ga jar Jwif maaga hay wo le de caa nen Babilon da’ wo yããge go diŋ wer maaga á hoo wo sug ti jag liŋgi maani Jeofan wo mono.

16. Wer mayse ga naa mo joŋ hẽẽne do fẽẽre maaga hres ge wo wo ti wur bon maa de hããn wa là? (Ko foton lay.)

¹⁶ Sen had mayse ne naa là? Ig la mẽ’, naa yiŋ ge yaŋ de wur bon maa de hãã ga à ko sen ti boŋ gà ɗa mono. De maaga á tõõ wer mokay, jar téebeere joŋ ge wo go de dawge lan de caa jiili. Amaa, jar maani Jeofan joŋ ge wo doo sen ne gà tawa. Naa de koge ga Jeofa diŋ Baa naa. Naa joŋ ge de coɓge, de koge ga “Je yãã [naa] gen go yaŋ le a ge gusi.” (Lug 21:28) Koh de maaga tayge jag waŋre maa ti tamsir le’ wo naa we no, naa ya’ wer kaŋ ɗiggi ti Jeofa. Jeofa joŋ ge ga jar peele sen mo koɗ wo naa, lan hã jag liŋgi maaga yãã tenen naa yaŋ go ne naa pa. Jag liŋgi sen a ge wo naa le na age là? Naa kon patala gà ɗa. Amaa, maapo ga naa da’ ra diŋ wer tayge naa wo. Maapo tayge sen wo diŋ “tiŋ naw naa wo,” ngeel maaga naa da’ yããge go ni mono. Day naa bag jag see naa go na bagge see wur sen so là? Naa mo hay ya’ see naa see hẽẽrebe wo, hoo sug ti ɓodge faage fẽẽre maaga tayge maani Jeofan ɓod ra mono, lan naa mo hay go de bawge jag jiili ga Jeofa de seege de tayge maa ɓe no.—Heb. 10:​24, 25; 13:17.

17. Ndo mbiɗ nen ne Jeofa ti maa da’ coɓge na mbiɗgi là?

¹⁷ Koh de maaga naw jar Jwif hay bay mbe le gus ne hara Babilon wa mono, Jeofa hã coɓge maaga á hay wo de sãy ɓe ti ne hara. Á joŋ ge de naa doo sen no lay. Diŋ wersen so ga naa mo yiŋ ba de re maa hõnla, naa mo hay tum de mbiɗ nen naa ne Jeofa ti maa da’ coɓge. Naa mo hay de hã ɓil ga á fug ɓil go ne jar goŋge ɓe maa de deelen wo ti, lan ga á ko de el naa. Hay tum ɗiggi ti fẽẽre maaga á wãã ga se joŋ ra ge yaŋ mono. Fer ɗiggi ga ndo bay maa joŋ hẽẽne wa so hase, werga Jeofa diŋ Baa ɓo no.