Hã ɓil ti fuggi ɓil maani Jeofa no

1-2. Naa ko see naa na koge de maaga naa ko we ga Jeofa go de fug ɓil ne naa ti ti ɓlagge naan wo là? (Ko faalen lay.)

WAŊ Dafid hay ko see ɓe go nen lawge debaŋ wer ɓlagge maaga á hay joŋ ra le ɓaa mono. (Siŋ. 40:12; 51:3; suscription) Á fer go ɗig ɓlagge ɓe no, wersen Jeofa fug ɓil go ne hẽn ti. (2 Sam. 12:13) Dafid hay go de fruygi debaŋ de maaga á ko ga Jeofa go de fug ɓil ne se ti mono.—Siŋ. 32:1.

² Doo Dafid no lay, naa joŋ go de fruygi debaŋ de maaga naa ko we ga Jeofa naa nen ɓil de el ɓen go see naa, lan fug ɓil go ne naa ti mono. Koh naa mo joŋ ba ɓlagge maa kwũy laybla no, hayga naa mbiɗ faale we ne hẽn no, jiili naa suu, werga Jeofa fug ɓil go ne naa ti. Wersen naa mo tos ne maaga á mo fug ɓil go ne naa ti, naa mo sii ɓlagge naan ne jar maa pel tayge wo, lan naa mo dur go ɓuy maaga naa mo dog joŋ tee ɓlagge sen wa so! (Jõõ. 28:13; Joŋre 26:20; 1 Jaŋ 1:9) Day ɓil naa fruy debaŋ de maaga naa ko we ga, Jeofa go de fug ɓil ne naa ti, day ga á fer ɗig ti ti ɓlagge naan, nen maaga se joŋ bon naa blam gà so mono!—Ese. 33:16.

3-4. Mãygeman naa po ko see ɓe na koge blam maaga á joŋ batem go mo là, day naa ko yaŋ ɓil hadge sen la diŋ mayse là?

³ Day maa po, á joŋ see jar maa po wo gayri maa yããge ga Jeofa go de fug ɓil ne saara ti. Naa ko saɓlaŋ mãygeman naa Jenifer maaga pããre ɓe hay wo diŋ Sedeewa Jeofa mo ɗa. De maaga á de kalge ɓil tigli mono, á le’ joŋ fẽẽre maa debaywoore wo, day se yoŋ ra do pããre ɓe wo. Kiŋgi blam sen mbag mokay, se fer le see Jeofa, joŋ batem go. Á wãã ga: “Le ɓaa mono, ndi hay joŋ figliw, hay jo yíi debaŋ, hay sõõ ɓil debaŋ, lan hay da suŋgu debaŋ lay. Ndi hay de koge ga Bible wãã ga Jeofa fug ɓil go ne naa ti ɓlagge naan wo wer cíi Yeso. Amaa, koh de maaga ndi mbiɗ faale ne ɓlagge ɓin wo, lan wii Jeofa ga á mo fug ɓil go me ti mono, ndi hay bay go de bawge jag jiili ɓi ga á go de fug ɓil me ti wa.”

⁴ Day maa po naa ɗig ga ɓil Jeofa de sõõge ne naa ti wer ɓlagge maaga naa joŋ ra le go ɓaa mono. Jeofa da ga naa mo hay go de bawge jag jiili naa ga se ko decoo naa doo Dafid no lay. Ɓil hadge sen la, naa ko yaŋ ga wer mayse ga naa mo hay go de bawge jag jiili naa ga Jeofa fug ɓil go ne naa ti cwãy la, lan mayse kay naa maa joŋge doo sen no là?

WER MAYSE GA Á DE EL MAAGA NAA MO HÃ ƁIL TI FUGGI ƁIL MAANI JEOFAN LÀ?

5. Manhúulí da ga naa mo ɗig ga hãy là? Hã saɓlaŋ po ɗa

⁵ Naa yaŋ hã ɓil ga Jeofa go de fug ɓil ne naa ti no, naa leɗ go nen liwgi maani Manhúulín wo gà. Naa mo hay fer ɗiggi ga Manhúulí dur go ɓuy maaga naa mo men goŋ Jeofa go. Maa bag jag ɗiggi ɓe sen go mono, Manhúulí dur maaga naa mo hã ɓil ga Jeofa bay go de fug ɓil ne naa ti ti ɓlagge naan wo wa. Naa ko saɓlaŋ blo maa Korente, maaga hay joŋ figliw, day ga à hay naan go yoo tayge mo ɗa. (1 Kor. 5:​1, 5, 13) De maaga á mbiɗ faale go ne ɓlagge ɓen mono, Manhúulí hay bay de dage ga jar maa ti taygen mo fug wo ɓil go ne hẽn ti wa. Á hay bay de dage ga á mo yãã wo waare ɓe le ti taygen tigriŋ wa pa. Day hayga jar maa ti taygen hay fug wo ɓil we go ne hẽn ti gà no, maapo blon hay ɗig ga Jeofa bay go de fug ɓil ne se ti wa. Maapo á hay ko see ɓe go de caa jiili debaŋ, nen maaga se men goŋ Jeofa go. Manhúulí bay de cooge wa. Amaa, “naa go de ko tawgi ɓe maga á nii joŋ rage go de ele.”—2 Kor. 2:​5-11.

6. Naa joŋ joŋge maaga naa mo men lawge go ti ɓlagge maaga naa hay joŋn là?

⁶ Hayga naa hã ɓil we ga Jeofa go de fug ɓil ne naa ti no, naa men lawge go ti ɓlagge naa no. De maaga naa joŋ ɓlagge we no, naa ko see naa go de caa jiili debaŋ. (Siŋ. 51:19) Sen diŋ fẽn maa de woore. Hayga naa ko we ga naa joŋ fẽn maaga bay ni naŋ wa no, naa mbe de kããge maa coo seele naa, lan maa joŋ fẽn maa ti ngeel ɓe. (2 Kor. 7:​10, 11) Amaa, hayga naa yaŋ tum lawge blam maaga naa go de mbiɗ faale ne ɓlagge naan no, maapo naa men ge goŋ Jeofa go. Hayga naa yaŋ hã ɓil ga Jeofa go de fug ɓil ne naa ti cwãy no, naa men lawge go ti ɓlagge naa no. Doo sen nokay, naa joŋ yaŋ tum goŋge ɓe go de bawge jag jiili ga naa de cõõre jag ɓe, lan naa fer yaŋ go de fruygi tigriŋ pa. (Kol. 1:​10, 11; 2 Tim. 1:3) Day naa joŋ joŋge maaga naa mo hay go de bawge jag jiili naa ga Jeofa go de fug ɓil ne naa ti là?

MAYSE KAY NAA MAAGA NAA MO HÃ ƁIL TI FUGGI ƁIL MAANI JEOFAN LÀ?

7-8. De ɗeŋ maa hõn ga Jeofa naa wer see ɓe ne Moyis là, day sen hã bawge go ne naa jag jiili ga hãy là? (Laage go 34:​6, 7)

⁷ Naa mo ɗig ti maaga Jeofa wãã ti see ɓe tu mono. Ɗig ti fẽn maaga Jeofa wãã ne Moyis ti Húulì Sinay mo ɗa.a (Jaŋ Laage go 34:​6, 7.) Koh de maaga joŋre Jeofa maa de wooren mbaara ngaɓa debaŋ mo laybla’, se maŋ ɗiggi maaga se wãã ne Moyis ga se diŋ “Baa ma ɓil de ele, ma ko decoo jare.” Baa maa de maŋ sen ẽg mbe fug ɓil yaŋ ne jee maaga goŋ ne, day ga mbiɗ faale go ne ɓlagge ɓen cwãy ti yawlà? Baywa hase! Hayga Jeofa fug ɓil we go ne jee sen ti gà no, ni Se de debaycõõre, lan bay ko decoo jar wa. Day Jeofa joŋ ge de maŋ sen ti boŋ gà.

⁸ Naa mbe maaga naa joŋ go de bawge jag jiili naa ga, de maaga Jeofa wãã ga se ko decoo jar mono, á wãã diŋ cwãy. Á caa gete’ ti boŋ gà. (Siŋ. 31:6) Wersen naa mbe nen hã ɓil ti fẽn maaga Jeofa wãã ne mono. Hayga á yaŋ gayri see ɓo maaga ndo mo men ɗiggi go ti ɓlagge ɓo maaga ndo hay joŋ ra le ɓaa no, wii jag see ɓo ga: ‘Ndi mbi na de hã ɓil ga Jeofa diŋ Baa maa ɓil de ele, ko decoo jare, lan ga fug ɓil go ne wosela maaga mbiɗ faale go ne ɓlagge ɓen cwãy ti yawlà? Ndi bay maaga ndi hã ɓil ga á go de fug ɓil me ti wa an yawlà?’

9. Siŋ wora 32:5 had mayse ne naa ti ɗeŋ maaga Jeofa fug ɓil go ne naa ti ɓlagge naan wo là?

⁹ Ɗig ti maaga jar maaga nenterse Baa srog glog ɓaara yer Bible wãã wo ti fuggi ɓil maani Jeofan mono. Ɗig ba ti ɗeŋ maaga Dafid wãã ti fuggi ɓil maani Jeofan mo ɗa. (Jaŋ Siŋ wora 32:5; TMN.) Á wãã ga: “Ndo fug ɓil go ti ɓlagge ɓi no.” Fuggi ɓil da wããge jag Hebre pa ga “naage mopo go”, noga “rawge de mopo”. Wersen, de maaga Jeofa fug ɓil go ne Dafid ti mono, sen doo ga á naa ɓlagge ɓen wo go, lan raw de ɓaara nono. Jiili Dafid suu ti ɓlagge ɓe maa põõge ɓen, ga hay wo hã lawge ne hẽn mono. (Siŋ. 32:​2-4) Doo sen no lay, naa mbe nen maaga jiili naa suu lay. De maaga naa mbiɗ faale we go ne ɓlagge naan wo no, naa bay maaga naa joŋ tum lawge ti ɓlagge maaga Jeofa go de naa rage, lan go de rawge de ɓaara mo wa so.

10-11. Wããre maaga wãã ga “go de gorge maa fug ɓil” had naa ti Jeofa ga hãylà? (Siŋ wora 86:5)

¹⁰ Jaŋ Siŋ wora 86:5. Dafid ngaɓ Jeofa ɓil verse sen la doo jobo maaga go de “gorge maa fug ɓil” nono. Kefder po maa naa wer wããre maa ɓil Bible wo, wãã ti Jeofa ga: “[Á] diŋ ‘jee maa fug ɓil go ne jar ti no’—‘joŋre ɓe doo sen nono.’” Wer mayse ga joŋre Jeofa diŋ fuggi ɓil go ne jar ti là? Caage ɓil verse maa blamn wãã ga: “Ndo joŋ ɓil de el ɓon see jar maga ɗe wo ɗúu ɓo mo ɓuy no.” Doo maaga naa kon le ɓil hadge maa glog ne mono, Jeofa de wããge ne naa ga, se naa nen ɓil de el sen go see jar maaga da wo se mono, day á tob ra go ti boŋ gà. Hayga jobo joŋ ɓlagge we, day ga mbiɗ faale we go ne hẽn de jiili ɓe ɓuy no, á naa nen ɓil de el ɓen go see ɓe de fug ɓil go ne hẽn ti. (Esa. 55:7.) Hayga á yaŋ gaali see ɓo maa hã ɓil ga Jeofa go de fug ɓil ne ndo ti no, wii jag see ɓo ga: ‘Ndi mbi na de hã ɓil ga Jeofa diŋ jee maaga go de gorge maa fug ɓil go ne jar maaga raa wo see ɓe maa wii fuggi ɓil do ɓe, lan ga mbiɗ wo faale ne ɓlagge ɓaaran mo yawlà? Ndi bay nen yããge ga á go de fug ɓil ne ndi ti de maaga ndi hay wiin ga á mo fug ɓil go me ti mo wa an yawlà?’

¹¹ Bible wãã ne naa pa ga Jeofa go de ko fẽn maaga se joŋ naa de ɓe mono, lan se de koge pa ga naa de ɓlagge see. Sen coɓ naa. (Siŋ. 139:​1, 2) Naa ko fẽn maaga Dafid wãã ɓil Siŋ maa tigriŋ, ga kay naa maa hã ɓil ga Jeofa de sãy maaga se fug ɓil go ne naa ti mo ɗa pa.

TI ƁO MO YÕÕ GO TI FẼN MAAGA JEOFA FER ƊIG TI TI ƁE MO WA

12-13. Doo maaga naa da’ ɓil Siŋ wora 103:14 ne mono, Jeofa fer ɗiggi ti naa ga hãylà, day sen jor glog ɓe maa joŋ mayse là?

¹² Jaŋ Siŋ wora 103:14. Dafid ngaɓ re maaga Jeofa go de gorge maa fug ɓil go ne jar maaga mbiɗ wo faale ne ɓlagge ɓaaran mono. Á wãã ga Jeofa “fer ɗiggi ga naa diŋ buɗuf siri.” Sen da wããge ga á de koge ga naa de ɓlagge see. Naa mo ɗig wee ti fẽn maaga Dafid da wããge ɓe mo ɗa.

¹³ Dafid wãã ga: “Jeofa de ko fẽn maaga naa de kne’ge de ɓe mono.” Á joŋ Adam “de beɗef siri”, lan á go de ko fẽẽre maaga jar téebeere maaga bay wo de ɓlagge see wa wo desãy ɓaara ti mono. Ba doo maaga á wo de sãy rege ti, de sãy le’ naa, lan wo de sãy ɓod ẽgre. (Tĩĩ. 2:7) Amaa, werga Adam wo de Efa joŋ wo ɓlagge so mono, jar téebeere kol wo go diŋ buɗuf sir de ɗeŋ maa tigriŋ pa. Wer maaga naa diŋ moore Adam wo so mono, ɓlagge kol go nen cíi naa, nen maaga naa joŋ diŋ fẽẽre maa de ɓlagge wo. Jeofa de koge ga naa de ɓlagge see. De daŋ sen pa, Dafid wãã ga á “fer ɗiggi” ti fẽn se no. Sen da wããge pa ga werga naa de ɓlagge see so mono, Jeofa joŋ yaŋ tum ko decoo naa. Naa mbe maa wãã wããre maaga Dafid wãã go de ɗeŋ maa kay la no: Jeofa de koge ga, day de ngar ngeel maa po wo re raw wo ne naa do. De maaga á ko we ga naa go de mbiɗ faale ne ɓlagge naan cwãy no, se naa nen ɓil de el ɓen wo de koge decoo ɓen go see naa.—Siŋ. 78:​38, 39.

14. (a) Dafid wãã mayse maa tigriŋ ti ɗeŋ maaga Jeofa fug ɓil go ne naa ti pa là? (Siŋ wora 103:12) (b) Naa had mayse ti ɗeŋ maaga Jeofa fug ɓil go ne Dafid ti mo là? (Ko ngeel maa de gaɗge “De ɗeŋ maa hõn ga Jeofa fug ɓil go ne jar ti, lan yõõ ti go ti ɓlagge ɓaaran là?”)

¹⁴ Siŋ wora 103 had mayse ne naa ti ɗeŋ maaga Jeofa fug ɓil go ne naa ti pa là? (Jaŋ Siŋ wora 103:12) Dafid wãã ga de maaga Jeofa fug ɓil we go ne naa ti no, á yõõ ti go ti ɓlagge naan wo doo maaga “ngel ma nen wer go hãã see ngel ma nen pel nono.” Ngeel maa nen wer go hãã see ngeel maa nen peln, nen maaga saara yiŋ ti boŋ gà. Sen had mayse ne naa ti maaga Jeofa fug ɓil go ne naa ti là? Kefder po naa wer verse sen ga: “Baa ya’ ɓlagge naan wo wo go see naa hãã doo fõõre fẽn maaga yee nen go has nono. Naa mbe de kããge maaga naa joŋ go de bawge jag jiili naa ga á fer ge ɗig ti ɓe gà so.” Day maapo fõõre rege noga fẽn maa tigriŋ fer ɗig ti naa ti fẽn maaga hay hres le go ɓaa. Amaa de maaga Jeofa fug ɓil we go ne naa ti no, sen doo ga blam fõõre mopo taw go hase, bay de gwa’ge kiigi maa ferge ɗig ti ɓe ti ɓlagge naan, nen maaga se joŋ de sãy joŋ bon naa ti wa so nono.—Ese. 18:​21, 22; Joŋre 3:19.

15. Hayga naa yaŋ lawge ti ɓlagge maaga naa joŋ ra le ɓaa no, naa joŋ joŋge là?

¹⁵ De ɗeŋ maa hõn ga wããre maaga Dafid wãã ɓil Siŋ wora 103 kay naa maa hã ɓil ti fuggi ɓil maani Jeofan là? Hayga naa yaŋ tum lawge ti ɓlagge maaga naa hay joŋ ra le ɓaa no, naa mo wii jag see naa ga: ‘Ti ɓi go na de yõõge ti fẽn maaga Jeofa fer ɗig ti ti ɓe mo yawlà: kaŋ nen ga ti ɓi go na de yõõge ga Jeofa de koge ga ndi de ɓlagge see, day ga á fug ɓil go ne jee maaga mbiɗ faale ne ɓlagge ɓen mo yawlà? Ti ɓi mbe na de ferge ɗiggi ti fẽn maaga Jeofa go de yõõ ti ti ɓe mo yawlà: kaŋ nen ga, ti ɓi mbe de ferge ɗiggi ti ɓlagge maaga á go de fug ɓil me ti ɓaara, day ga á fer ɗig ti ti ɓaara maa ferge joŋ bon ɓi gà so yawlà?’ Jeofa bay tum ɗiggi ti ɓlagge maaga naa hay joŋ ra le ɓaa mo wa. Day naa mo hay fer ɗiggi ti ɓaara wa lay. (Siŋ. 130:3) De maaga naa yaŋ hã ɓil ti fuggi ɓil maani Jeofan no, naa joŋ yaŋ de kããge maa fug ɓil go ne see naa ti, lan naa joŋ joŋre yaŋ ne Jeofa de fruygi.

16. Hã saɓlaŋ po maaga ngaɓ ga, á bay de el maaga naa mo hay tum ɗiggi ti ɓlagge maaga Jeofa go de fug ɓil ne naa ti ɓe wa mo ɗa. (Ko foton lay.)

¹⁶ Naa ko ba saɓlaŋ po ɗa. Maaga naa yaŋ tum lawge ti ɓlagge naa maaga naa hay joŋ ra le ɓaa no, sen doo jobo maaga de ya’ mooda, ko nen diŋ ti ‘rétroviseur’ ɓen tawa nono. Á de el maaga jee sen mo hay ɓod nen ti fẽn ko nen no, werga sen kay ne maa ko re maaga a le nen wer ɓe mono. Amaa maaga á mo ya’ moodan jam mono, á mo hay kaŋ ɗiggi ɓe ti faage maa pel ɓe no. Doo sen no lay, de maaga naa yaŋ ferge ɓod nen blam ti ɓlagge maaga naa hay joŋ ra le ɓaa no, sen kay naa maaga naa mo da’ koge re le see ɓaara, lan maaga naa mo fer dog tee ɓaara wa so. Amaa hayga naa yaŋ ɗiggi ti ɓaara tum tu lay no, maapo naa joŋ de fruygi gà so, day naa joŋ de kããge maa goŋ Jeofa doo maaga naa de hay joŋ no gá so lay. Nen maaga naa joŋ tum lawge ti ɓlagge naan wo mono, naa mo kaŋ wee ɗiggi naa diŋ ti faage maa pel naa no. Naa diŋ ti faage maa woge da’ tenen maa tum maaga Baa ngaɓ ne naa mono. Wo ɓi sir sen ni, ɗiggi maa de baywoore fer ge wo le “a ge ne jobo ti gà so hase.”—Esa. 65:17; Jõõ. 4:25.

HAY TUM GO DE BAWGE JAG JIILI ƁO

17. Wer mayse ga naa mo hay go tum de bawge jag jiili naa ga Jeofa da naa, lan fug ɓil go ne naa ti là?

¹⁷ Naa mo hay tum go de bawge jag jiili naa ga Jeofa da naa, lan ga á go tum gorge maa fug ɓil go ne naa ti. (1 Jaŋ 3:19.) Wer mayse là? Werga Manhúulí tum jag durgi maaga se baw jag jiili naa, nen maaga naa mo ɗig ga naa bay nen maaga Baa da naa noga fug ɓil go ne naa ti wa. Ɗiggi Manhúulí bay de cooge wa, á da na ga naa mo men goŋ Jeofa go. Naa mo hay kaŋ ti naa ga Manhúulí ya’ wer durgi ɓen yaŋ ciŋ ni, werga á go de koge ga, wur de gwa’ge ne se mẽ’ tu seŋ. (Naa. 12:12) Naa mo men naa blum naa wa!

18. Ndo joŋ joŋge maaga ndo mo hay go de bawge jag jiili ɓo ga Jeofa da ndo, lan fug ɓil go mo ti là?

¹⁸ Maaga ndo mo hay ya’ wer baw jag jiili ɓo go ga Jeofa da ndo mono, joŋ joŋre de yaŋ maaga naa ko ra le ɓil hadge maaga naa ndal le ti ɓe naw wara renam mono. Maaga ndo mo hay go de bawge jag jiili ɓo ti fuggi ɓil maani Jeofan mono, ɗig ti maaga Jeofa wãã ti see ɓe diŋ se tu mono. Ɗig ti wããre maaga nenterse Baa jor wer jar maa yer Bible wo wããge ɓe ti fuggi ɓil maani Jeofan mono. Ti ɓo mo yõõ go ga á de koge ga ndo de ɓlagge see, day ga á joŋ yaŋ maaga se ko decoo ɓo wa. Day ndo mo hay kaŋ ti ɓo ga, de maaga Jeofa fug ɓil we go ne jobo ti no, á joŋn go de jiili ɓe ɓuy. Blam sen ndo joŋ yaŋ go de bawge jag jiili ɓo ti ɓil de el maani Jeofan doo Dafid no lay, ndo kãã yaŋ maa wããge ga: “Jeofa, suse’ ɓo ti maaga ndo fug ɓil go me ti de ‘naa ɓlagge ɓi ma ni naŋ gàn go’ mono!”—Siŋ. 32:5.