CHARU CHAZURA NA MASUZGO

1 | Jivikilirani Kuti Muŵe na Umoyo Uwemi

CHIFUKWA WULI NTCHAKUZIRWA?

Masuzgo panji masoka ghachilengiwa ghangapangiska ŵanthu kutondeka kuŵa na umoyo uwemi mu nthowa zakupambanapambana.

Para soka panji suzgo lachitika, vikupangiska ŵanthu kuti ŵasuzgikenge maghanoghano, ndipo para ŵasuzgika maghanoghano kwanyengo yitali pamanyuma ŵangalwara.
Para pachitika masoka panji kwabuka matenda, vipatala navyo vikukhwaskika chifukwa vingakhumbikwira kuti vipwelelere ŵalwari ŵanandi panyengo yimoza kweniso mankhwala ghangaŵaso ghakuchepa.
Masoka panji miliri, vikupangiska kuti paŵe masuzgo gha vya ndalama, ndipo ŵanthu ŵangatondeka kugura vyakukhumbikwa nga ni chakurya chiwemi kweniso wovwiri wa chipatala.

Ivyo Mukwenera Kumanya

Matenda ghakuru kweniso kusuzgika maghanoghano, vingapangiska kuti mutondeke kusankha makora vinthu. Ndipo mungatondeka kuchita vinthu ivyo vingamovwirani kuti muŵe na umoyo uwemi. Paumaliro mungalwara.
Umoyo winu ungaŵa pangozi para mungaleka kupokera wovwiri wa chipatala pa suzgo la muthupi ilo mungaŵa nalo.
Para muli na umoyo uwemi ndipo mungasankha vinthu mwamahara pa nyengo iyo mwasangana na soka.
Nangauli mungakumana na masuzgo gha ndalama, kweni vilipo ivyo mungachita kuti muvikilire thupi linu.

Ivyo Mungachita Pasono

Mulimose umo vingaŵira, munthu wavinjeru para wawona kuti pangaŵa ulwani, wakuchitapo kanthu kuti wajivikilire. Ndimo viliriso na pa nkhani yakuŵa na umoyo uwemi. Kanandi tikujivikilira ku matenda para tikupwelelera thupi lithu kweniso panyumba pithu. Kujivikilira nkhuwemi kuluska kughanaghana kuti para mwalwara ŵachipatala ŵamumuchizgani.

“Chifukwa chakuti ine na muwoli wane tikujipwelelera kweniso tikupwelelera malo ghithu agho tikukhala, vikutovwira kuti tileke kusakaza ndalama zinandi zakulipilira dokotala panji kugura munkhwala.”—Andreas.a

a Mazina ghanyake mu magazini iyi ghasinthika.

UMO MUNGACHITIRA—Fundo Zakovwira

Usange pachitika soka, mungajivikilira kuti muŵe na umoyo uwemi para mungachita ivi

MUŴENGE ŴAKUTOWA MWAKUTHUPI

Muŵenge ŵakutowa mwakuthupi

Baibolo likuti: “Munthu wakuchenjera wakuwona ulwani na kubisama.” (Zintharika 22:3) Gegani vinthu ivyo mukuwona kuti vingamupwetekani.

Gezani mu mawoko na sopo pafupipafupi, chomene pambere mundakore chakurya, panji para mwafuma ku chimbuzi.
Mutozgenge panyumba pinu nyengo zose kweniso kupuputa na munkhwala wakukoma majeremusi mu malo agho mukughakora pafupipafupi, kweniso vinthu ivyo mukuvikora pafupipafupi.
Para mungafiska, gegani kukhala pafupi chomene na ŵanthu awo ŵali na nthena yakwambukira.

MURYENGE CHAKURYA CHIWEMI

Muryenge chakurya chiwemi

Baibolo likuti: “Palije munthu uyo wakutinkha thupi lake, kweni wakulilyeska na kulipwelelera.” (Ŵaefeso 5:29) Tikulongora kuti tikupwelelera thupi lithu para tikuŵa maso na ivyo tikurya panji kumwa.

Mumwenge maji ghanandi.
Muryenge vipambi vyakupambanapambana kweniso mphangwe.
Chepeskani kurya vya mafuta yanandi, mchere unandi, na shuga munandi.
Lekani kukhweŵa panji kumwa minkhwala yakuloŵezga.

“Kuti tigege kulwaralwara, tikuyezgayezga kurya chakurya chiwemi, ndipo tilekenge kuchita nthena, mphanyi kandalama kithu kachoko ako tikusanga tikumaliraso kulipira ku chipatala para talwara. Ntheura tikuyezgayezga kugura chakurya chiwemi.”—Carlos.

MUCHITENGE MASEŴERO GHAKUKHOZGA THUPI KWENISO MUPUMURENGE MWAKUKWANA

Muchitenge maseŵero ghakukhozga thupi

Baibolo likuti: “Woko limoza lakuzura na chipumulo ndiwemi kuluska mawoko ghaŵiri ghakuzura na kuphyoka na kuchimbizga waka mphepo.” (Mupharazgi 4:6) Nangauli tikwenera kugwira ntchito, kweni tikweneraso kupumura mwakukwana.

Muchitenge maseŵero. Mungamba na kunyolorako malundi panji kutembeya. Kuchita maseŵero kungamovwirani kuti muŵe na umoyo uwemi nanga mungaŵa kuti ndimwe muchekuru, wakupendera, panji mukutondeka kuchita vinyake chifukwa cha ulwari.
Mupumurenge

Mupumurenge mwakukwana. Para mukutondeka kupumura mwakukwana mungamba kusuzgika maghanoghano kweniso kutondeka kughanaghana makora. Ndipo para pajumpha nyengo vingapangiska kuti mwambe kulwaralwara.
Jiŵikirani nyengo yakugonera, ndipo muyilondezgenge. Yezgani kulondezga nyengo iyo mwaŵika kweniso nyengo zose muwukenge panyengo yakuyana waka.
Gegani kuwonelera TV panji foni uku muli pa bedi.
Gegani kurya chakurya chinandi, kumwa khofi panji moŵa pambere mundagone.

“Chifukwa chakuti nkhagonanga mwakukwana yayi, thupi lane likaŵanga makora yayi. Nyengo zinyake para nkhuwuka mulenji mutu ukaŵinyanga ndipo thupi lane likaŵanga lakulopwa. Kweni para nagona mwakukwana nkhuŵanga makora. Nkhuŵanga na nkhongono zinandi ndipo nkhulwaranga bweka yayi.”—Justin.