Kufuma pa Nyengo ya Kulenga Mupaka pa Nyengo ya Cigumula

Kasi kucanya na caru vikafuma nkhu? Kasi dazi, mwezi, nyenyezi, na vinthu vinandi vya pa caru vikaŵako wuli? Baibolo likupeleka zgoro launenesko apo likuyowoya kuti vikalengeka na Ciuta. Mwantheura buku lithu likwamba na nkhani za mu Baibolo zakukhwaskana na cilengiwa.

Tisambilenge kuti Ciuta wakayamba kulenga ŵanthu ŵauzimu ŵakuyanako na iyo. Ŵakaŵa ŵangelo. Kweni caru cikalengekera ŵanthu nga ndise. Mwantheura Ciuta wakalenga mwanalume na mwanakazi, Adamu na Heva na kuŵaŵika mu munda wakutowa. Kweni ŵakakana kupulikira Ciuta ndipo ŵakataya wenelero wa kukhala na umoyo.

Kufuma apo Adamu wakalengekera kuzakafika pa nyengo ya Cigumula, pakajumpha vilimika 1,656. Mukati mu nyengo iyi kukaŵa ŵanthu ŵaheni ŵanandi. Kucanya, kukaŵa ŵanthu ŵauzimu ŵambura kuwoneka, Satana na ŵangelo ŵake ŵaheni. Pa caru capasi, pakaŵa Kayini na ŵanthu ŵanyake ŵanandi ŵaheni, kusazgapo ŵanalume ŵanji ŵankhongono. Kweniso pakaŵa ŵanthu ŵawemi nga ni Abelu, Enoki na Nowa. Mu Cigaŵa CAKWAMBA tiŵazgenge za ŵanthu wose aŵa na ivyo vikacitika.