Kusanka Mazgu Ghakuti Muyowoye

MAZGU ngakuzirwa comene pakuyowoyeskana. Kweni ndipera, kuti mazgu ghithu ghafiske cilato cithu, tikwenera kusanka mazgu ghaweme ghakuti tiyowoye. Mazgu agho ghangaŵa ghakwenelera pa cakucitika cinyake ghangaŵa na cakufumapo ciheni usange ukhaliro wasinta. Para ghangayowoyeka uheni, mazgu ghakusekeska ghangaŵa “mazgu ghakukarifya.” Kayowoyero kanteura ako nka mawara, ndipo kakurongora kuwura citemwa. Pali mazgu ghanyake agho ghali na mang’anamuro ghaŵiri, ndipo nyengo zinyake limoza mwa ng’anamuro lake likuŵa la muziro panji la muyuyuro. (Zinth. 12:18; 15:1) Kulwande linyake, “lizgu liweme,” ilo likupereka cikhuŵirizgo, likupereka cimwemwe kwa muntu uyo tikuyowoya naye. (Zinth. 12:25) Nanga kungaŵa kwa muntu wavinjeru, kusanka mazgu ghaweme ghakuti wayowoye pakukhumbikwira kuyezgayezga. Baibolo likutiphalira kuti, Solomon wakamanya kukhumbikwa kwa kupenja na kusanga “mazgu ghakukondweska” na ‘mazgu ghaunenesko.’—Muph. 12:10.

Mu viyowoyero vinyake, pali mazgu ghanyake agho ghakugwiriskirika ncito para yunji wakuyowoya na muntu uyo ni murara kwa iye, panji uyo wali na udindo. Paliso ghanyake agho ghakugwiriskirika ncito para muntu wakuyowoya na mabwezi ghake panji para wakuyowoya na ŵanici. Kuleka kurondezga marango ghanteura agho kukurongora muyuyuro. Ncakweneleraso yayi kujiyowoya mwekha na mazgu agho ghakurongora ncindi zapadera agho ŵantu ŵa mu cigaŵa cinu ŵakughazunura para ŵakuyowoya na ŵantu ŵanteura awo. Pa nkani ya kurongora ncindi, Baibolo likuzirwiska comene ukhaliro uwu kuruska umo dango lakupangika na ŵantu panji mitheto yawo yikuyowoyera. Baibolo likukhuŵirizga Ŵakristu kuti ‘ŵatumbike ŵantu ŵose.’ (1 Pet. 2:17) Ŵantu awo ŵakucita nteura kufumira pasi pa mtima ŵakuyowoya na ŵantu ŵa misinku yose mu ntowa yakurongora ncindi.

Nga ni umo mukumanyira, pali ŵantu ŵanandi awo Mbakristu yayi ndipo iwo ŵakuyowoya mazgu gha mutonyoro na muziro. Iwo ŵangaghanaghana kuti kayowoyero kanteura ako kangapangiska kuti ivyo ŵayowoya vimanyikwe luŵiro na ŵantu. Nyengo zinyake kayowoyero kanteura aka kangarongora kuti mbalemwa kuyowoya. Para yunji wakaŵa na cizgoŵi ca kuyowoya mwa mutonyoro na mwa matusi panyengo iyo wakaŵa wandasambire ntowa za Yehova, cingaŵa cakusuzga comene kuleka ukhaliro wanteura uwu. Ndipouli, ncamacitiko kumazga ukhaliro uwu. Mzimu wa Ciuta ukovwira muntu kuti waleke kayowoyero kaheni. Kweni ndipera, muntu wanteura uyu wakwenera kufwilirapo kuti wacimanye makora ciyowoyero, mwakuyowoya mazgu ghaweme, mazgu ghakupereka cikhuŵirizgo, ndipo pamanyuma pake wagwiriskire ncito nyengo zose mazgu agho wasambira sono.—Rom. 12:2; Efe. 4:29; Kol. 3:8.

Kuyowoya Mazgu Ghapusu. Mazgu agho ghakukhumbikwira kuyowoyeka ni agho ngapusu kughapulika. (1 Kor. 14:9) Usange ŵategherezgi ŵinu ŵakutondeka kupulikiska makora ivyo mukuyowoya, iwo ŵangamuwonani nga ni para mukuyowoya ciyowoyero cacilendo.

Mazgu ghanyake ghali na ng’anamuro lapadera, mazgu ghanteura agho ghakuyowoyeka na ŵantu awo ŵakugwira ncito iyo yikuyana na mazgu agho. Mazgu ghanteura agho ŵakughayowoya nyengo zose. Kweni para imwe mungaghayowoya pa malo ghambura kwenelera, mbwenu ivyo mukuyowoya ŵantu ŵangavimanya yayi. Mwakusazgirapo, nanga mungaŵa kuti mukuyowoya mazgu agho ŵanandi ŵakughamanya, kweni para mungasuŵilira waka kurongosora cimanyisko ico ncambura candulo ku ŵategherezgi ŵinu, mbwenu maghanoghano ghawo ghangaŵa ku vintu vinyake.

Muyowoyi wamahara wakuyowoya mazgu agho ŵantu ŵangaghamanya, nanga ŵangaŵa awo mbambura kusambira comene. Mwakurondezga Yehova, naye wakurongora lusungu ku “ŵakavu.” (Job 34:19) Usange muyowoyi wawona kuti ncakukhumbikwa kuyowoya lizgu ilo ndacilendo, ipo waliyowoye lizgu ilo pamoza na mazgu ghapusu kuti ng’anamuro lake limanyikwe.

Mazgu ghapusu usange ghayowoyeka makora ghakupereka nkongono yikuru comene pa ivyo mwayowoya. Masentensi na mafulezi ghafupi ghakupangiska fundo kumanyikwa luŵiro. Igho ghangayowoyeka mwakusintana-sintana na masentensi ghanji agho ngatali comene mwakuti nkani yinu yileke kuŵa yakudumuka-dumuka. Kweni para mukukhumba kuyowoya fundo zakuti ŵategherezgi ŵinu ŵazikumbukirenge, yowoyani mazgu ghapusu ndiposo masentensi ghafupi.

Kuyowoya Mazgu Ghakupambana-pambana Ndiposo Ghakurondora. Palije cigoti ca mazgu ghaweme. Mumalo mwakuyowoya mazgu ghamoza gheneghagho nyengo na nyengo, yezgani kuyowoya mazgu ghanji ghacilendo. Kacitiro kanteura aka kapangiskenge kuti kayowoyero kinu kaŵe kakukondweska ndiposo ka candulo. Kasi ni mwauli umo mungamanyira mazgu ghanandi gha ciyowoyero cinu?

Para mukuŵazga, Gwarani muzere kusi kwa mazgu agho mukuleka kughamanya, ndipo laŵiskani ng’anamuro lake mu dikishonare usange muli nalo. Sankani mazgu agho mukuleka kughamanya ndipo yezgayezgani comene kughagwiriskira ncito igho para mukuyowoya. Ghazunurani mazgu agho mwakurondora ndipo ghagwiriskireni ncito makora kuti ghakolerane na nkani iyo mukuyowoya kuti ng’anamuro lake limanyikwe, ndipo lekani kuyowoya mwakuti mujiwoneske kuti mukumanya mazgu ghanandi. Kumanya mazgu ghanandi kumovwiraninge kuti muyowoye mu ntowa zakupambana-pambana. Kweni pwerererani comene pakuyowoya cifukwa cakuti, para muntu wabudiska kuzunura mazgu mwakurondora panji kughagwiriskira ncito, ŵanji ŵangaghanaghana kuti muntu wanteura uyo wakumanya yayi ivyo wakuyowoya.

Cilato cithu cakuti timanye mazgu ghanandi ncakuti tipereke cimanyisko, kuti kujiwoneska ku ŵategherezgi ŵithu kuti tikumanya mazgu ghanandi yayi. Kuyowoya mazgu agho ngakusuzga kumanya ng’anamuro lake kungarongora kuti muyowoyi ngwakujitemwa. Khumbo lithu likwenera kuŵa lakuti tiphalire ŵanyithu cimanyisko cakuzirwa ico tili naco ndiposo ticiyowoye mu ntowa yakukondweska ku ŵategherezgi ŵithu. Kumbukirani ntharika ya mu Baibolo iyi: “Lulimi lwa ŵavinjeru lukuŵapa ŵanyake mahara.” (Zinth. 15:2) Kuyowoya mazgu ghaweme ndiposo ghakwenelera ghakuti ghamanyikwe luŵiro, ghakupangiska kuti kayowoyero kithu kaŵe kaweme ndiposo kakukhuŵirizga mumalo mwa kuŵa kambura kukondweska.

Peneapo mukurutilira kumanya mazgu ghanandi gha ciyowoyero cinu, gwiriskirani ncito mazgu ghakwenelera mwakupwererera. Mazgu ghaŵiri ghangawoneka nga ni para ghali na ng’anamuro limoza, kweni ngakupambana para ghangagwira ncito mu ntowa zakupambana-pambana. Para mungamanya mazgu ghanteura agha, kayowoyero kinu kaŵenge kaweme ndipo mutceŵenge kukhuŵazga ŵategherezgi ŵinu na mazgu ghinu. Tegherezgani para ŵantu awo ŵakumanya makora ciyowoyero cinu ŵakuyowoya. Mu madikishonare ghanyake, kuntazi kwa lizgu lirilose ilo lalembeka kukuŵaso mazgu agho ghakuyana ng’anamuro na lizgu ilo lalembeka ndiposo agho ghakupambana nalo ng’anamuro. Anteura, mwakugwiriskira ncito dikishonare yanteura iyi, kuti mumanyenge mazgu ghakupambana-pambana pera agho ghalongosoreka yayi, kweniso mumanyenge mang’anamuro ghakupambana-pambana gha lizgu limoza. Ici cikuŵa cakovwira comene para mukupenja lizgu lakwenelera lakuti muligwiriskire ncito. Peneapo mukusambira kuti mumanye mazgu ghanandi gha ciyowoyero cinu, woneseskani kuti mwamanya ng’anamuro lake, kazunuliro kake ndiposo umo likugwirira ncito.

Kuyowoya mazgu ghakudunjika kukupangiska kuti ng’anamuro lake limanyikwe luŵiro kuruska kuyowoya mwakuzweta. Muyowoyi wangayowoya kuti: “Panyengo yira, ŵantu ŵanandi ŵakarwara.” Panji wangayowoya kuti: “Pamanyuma pa Nkondo Yakudanga ya Caru Cose, kwa myezi yicoko waka, ŵantu ŵakukwana 21,000,000 ŵakafwa na ntenda ya fuluwenza ya Cisipanishi.” Mwee, nawo mbuweme usange muyowoyi wangaphara ico wakung’anamura para wakuyowoya mazgu ghakuti “panyengo yira,” “ŵantu ŵanandi,” na “ŵakarwara.”! Kuyowoya mazgu ghanteura agha pakukhumbikwira kuti muŵe na cimanyisko cakufikapo ca fundo izo zikukolerana na nkani yinu ndiposo mukwenera kusanka makora mazgu ghakuti muyowoye.

Kuyowoya mazgu ghakwenelera kungamovwiraniso kuti muyowoye fundo mwakudunjika mumalo mwakuyowoya mazgu ghanandi ghambura kukhumbikwira. Kuyowoya mazgu ghanandi ghanteura agha kukujandizga fundo kuti zileke kumanyikwa makora. Mazgu ghapusu ghakupangiska ŵanji kuti ŵamanye na kusunga fundo izo mwayowoya. Ghakovwiraso pakusambizga cimanyisko cakurondora. Kasambizgiro ka Yesu Kristu kakaŵa kaweme comene cifukwa pakusambizga wakayowoyanga mazgu ghapusu. Sambirani umo iye wakacitiranga. (Wonani viyerezgero ivyo vyalembeka pa Mateyu 5:3-12 na Marko 10:17-21.) Sambirani kuyowoya mwakudunjika, mwakugwiriskira ncito mazgu ghaweme.

Mazgu Ghakurongora Nkongono, Umo Mukujipulikira na Ghakupereka Cithuzithuzi. Peneapo mukusambira kuti mumanye mazgu ghanandi gha ciyowoyero cinu, lekani kughanaghanira waka mazgu agho mwasambira sono, kweni ghanaghaniraniso mazgu agho ghali na ng’anamuro lapadera. Mwaciyerezgero, ghanaghanirani maverebu agho ghakuwoneska nkongono, maadijeketivu agho ghakurongosora mtundu wa cintu, ndiposo mazgu agho ghakurongosora mtima waubwezi, panji kuŵa munenesko.

Baibolo liri na mazgu ghanandi comene ghanteura agho. Kwizira mwa ncimi Amosi, Yehova wakaromba ŵantu kuti: “Penjani viweme, viheni cara . . . Tinkani viheni, mutemwe viweme.” (Am. 5:14, 15) Kwa Themba Saulos, ncimi Samuel yikayowoya kuti: “Yehova waparura ufumu wa Israel kwa iwe muhanya uno.” (1 Sam. 15:28) Apo wakayowoyanga na Ezekiel, Yehova wakayowoya mazgu ghakuti ghangaruwika yayi, ghakuti: “Nyumba yose ya Israel njancene cinonono na mtima waciganga.” (Ezek. 3:7) Kuti wadidimizge ukuru wa zakwananga za Ŵaisrayeli, Yehova wakafumba kuti: “Kasi muntu tiwaskoghe Ciuta? Ndipouli mwandiskogha ine.” (Mal. 3:8) Pakukonkoska umo cipulikano cikayezgekera ku Babulone, Daniel wakalongosora makoraghene nkanira umo mukhaliro uwo ukaŵira mwa kuyowoya kuti: “Nebukadnezar wakazura na kutukutwa” cifukwa Shadiraki, Meshaki na Abedinego ŵakakana kusopa cikozgo cake, ndipo nga ncakufumapo cake, iye wakalangura kuti ŵanarumi aŵa ŵakakike na kuponyeka mu “ng’anjo ya moto wakunyeka.” Kuti watovwire kumanya umo ng’anjo yira yikawotceranga, Daniel wakayowoya kuti themba lira likalangura ŵantu ŵake kuti “ŵasonkeko ng’anjo kankonde na kaŵiri kwakuruska umo ŵakasonkeranga.” Ng’anjo yira yikawotca comene mwakuti ŵanarumi ŵa themba lira apo ŵakaŵa pafupi na ng’anjo ŵakafwa na dimi la moto. (Dan. 3:19-22) Apo wakayowoyanga na ŵantu ŵa ku Yerusalemu ghakati ghakhalako mazuŵa ghacoko waka pambere wandafwe, Yesu wakadandaura kuti: “Nkene kanandi apo nkatenge ndiŵawunganye pamoza ŵana ŵako, nga ndi nyatazi wakuwunganya twana twake kusi ku mapapindo ghake, ndipo imwe mukakananga! Henani, nyumba yinu yamukhalirani mapopa.”—Mat. 23:37, 38

Kusanka mazgu ghaweme ghakuti muyowoye kungapangiska ŵategherezgi ŵinu kuti ŵaŵe na cithuzithuzi mu maghanoghano ghawo gha ivyo mukuyowoya. Usange mukuyowoya mazgu agho ngakukondweska kwa iwo, ŵategherezgi ŵinu “ŵangawona” na “kukhwaska” vintu ivyo mukuyowoya, ndiposo “ŵangaraŵa” na “kununkiska” vyakurya ivyo mukuyowoya. Iwo “ŵangapulika” mazgu gha vintu ivyo mukurongosora na mazgu gha ŵantu awo mukuŵayowoya. Para mungayowoya mwanteura, ŵategherezgi ŵinu ŵategherezgenge comene ivyo mukuyowoya cifukwa ŵakupulikiska makora comene.

Mazgu agho ghakurongosora fundo ghangapangiska ŵantu kuseka panji kulira. Ghangakhuŵirizga cipulikano cawo, ghangakhuŵirizga muntu uyo wakhuŵazgika kuti wawone kukhumbikwa kwa kurutilira kukhala na umoyo ndipo ghangamukhuŵirizga kuti wakuliske citemwa ca pa Mlengi wake. Ŵantu pa caru cose capasi ŵakhwaskika mitima yawo cifukwa ca cilindizga ico cayowoyeka mu Baibolo pa Salmo 37:10, 11, 34; Yohane 3:16; na Civumbuzi 21:4, 5.

Peneapo muŵazgenge Baibolo na vyakupharazga vya “muzga wa magomezgeko na wa vinjeru,” musangenge mazgu ghacilendo ghakupambana-pambana. (Mat. 24:45) Mungaŵazganga waka na kughaluwa mazgu agha yayi. Sankani mazgu agho ghamukondweskani, ndipo ghagwiriskireni ncito igho nyengo zose pakuyowoya.

Kuyowoya Mwakurondezga Marango gha Ciyowoyero. Ŵantu ŵanyake ŵakumanya kuti ŵakuyowoya mwambura kurondezga marango gha ciyowoyero. Ncici ico iwo ŵangacita kuti ŵamanye marango agho?

Para mucali pa sukulu, gwiriskirani ncito mwaŵi uwu kuti musambire marango gha ciyowoyero na kugharondezga pakuyowoya. Usange mukumanya makora yayi za dango linyake la ciyowoyero, fumbani ŵasambizgi ŵinu. Mungasambiranga marango gha ciyowoyero kuti mughamanye waka yayi. Cilato cinu ncakupambana na ŵanyinu awo muli nawo lumoza. Imwe mukwenera kuŵa mupharazgi waluso wa makani ghaweme.

Wuli usange sono ndimwe muntu murara ndipo mukuyowoya ciyowoyero ico mukakura naco yayi? Mutepanji mukaŵavya mwaŵi wakurutirizga masambiro ghinu mu ciyowoyero cinu. Lekani kugongoweskeka. Mumalo mwake, yezgayezgani comene kuti munyololere kayowoyero kinu cifukwa ca makani ghaweme. Vinandi ivyo tikuvimanya vyakukhwaskana na marango gha ciyowoyero tikusambira mwakutegherezga ku ŵanji para ŵakuyowoya. Anteura tegherezgani comene para ŵayowoyi ŵaluso ŵakuyowoya nkani zawo. Peneapo mukuŵazga Baibolo na vyakupharazga vyakuzikika mu Baibolo, wonani umo masentensi ghalikulembekera, umo mazgu ghagwiriskirikira ncito pamoza, ndiposo mu nkani iyo ghagwiriskirikamo ncito. Mu mazgu ghinu, gwiriskirani ncito ivyo mwasambira kufuma pa viyerezgero ivyo mwasambira pacanya apa.

Ŵakwimba awo mbakumanyikwa comene ŵangimba mu mazgu agho ghakususkana na marango gha ciyowoyero. Ŵantu ŵanyake ŵakutemwa kurondezga ŵantu ŵanteura aŵa pakuyowoya. Awo ŵakuguliska munkhwara wakwiba na awo umoyo wawo ngwa ucigaŵenga kanandi ŵakuyowoya mazgu agho ŵakughamanya ŵekha, ndipo ŵakusintirathu ng’anamuro leneco la mazgu. Ncamahara yayi kuti Ŵakristu ŵarondezge kayowoyero ka ŵantu aŵa. Kurondezga kayowoyero kanteura aka kungang’anamura kuti ise nase nkaro yithu yikuyana waka na ya ŵantu ŵa kucaru ŵanteura awo.—Yoh. 17:16.

Nyengo zose yezgayezgani kuyowoya mazgu ghaweme. Para nyengo zose muli ŵalemwa kuyowoya makora, muzamuŵaso ŵajira kuyowoya pa vyakucitika vyapadera. Kweni para mukuyowoya makora nyengo zose, muzamuŵavya suzgo kuyowoya nkani pa pulatifomu panji para mukupharazga unenesko ku ŵanji.