Kuciska Mwakukhorweska

ŴARARA Ŵacikristu ŵakwenera “kuciska mu cisambizgo ceneco.” (Tito 1:9) Nyengo zinyake ici cikwenera kucitika para pali mikhaliro yakusuzga comene. Ncakukhumbikwa comene kupereka urongozgi mwakukolerana na ivyo Malemba ghakuyowoya. Mwanteura, ŵarara ŵakwenera kupulikira urongozgi wakuti: “Upe . . . kuciska.” (1 Tim. 4:13) Nangauli cidumbirano cithu comene-comene ncakukhwaskana na ŵarara panji awo ŵakunwekera udindo uwu, kweni pakuŵa vyakucitika vinyake ivyo vikukhumbikwira kuti ŵapapi ŵaciske ŵana ŵawo panji awo ŵakucitiska masambiro gha Baibolo kuti ŵaciske ŵasambiri ŵawo. Mu vyakucitika vya nga ni ivi, urongozgi wakuyana waka uŵenge wakovwira.

Mikhaliro Iyo Kuciska Kungaŵa Kwakukhumbikwira. Kuti mumanye usange kuciska nkhwakukhumbikwa, ncakovwira kusanda mikhaliro iyo yili kulembeka mu Baibolo penepapo kuciska kukaperekeka. Mpostole Petros wakaciska ŵarara kuti ŵapwererere ncito yawo nga mbaliska ŵa mberere za Ciuta. (1 Pet. 5:1, 2) Mpostole Paulos wakaphalira Tito kuti waciske ŵapungwe kuti “ŵaŵe ŵakuziza.” (Tito 2:6) Paulos wakaromba Ŵakristu ŵanyake kuti ‘ŵayowoye mwakuyana’ ndiposo kuti ŵaleke kwendezgana na awo ŵakuwuska mpatukano pakati pa ŵabali. (1 Kor. 1:10; Rom. 16:17; Fil. 4:2) Nangauli Paulos wakawonga viŵaro vya mpingo wa Tesalonika cifukwa ca vintu viweme ivyo ŵakacitanga, kweni wakaŵaciska kuti ŵafwilirepo comene kuruska umo wakacitiranga kurondezga urongozgi uwo ŵakapokera. (1 Tes. 4:1, 10) Petros wakaŵeyelera Ŵakristu ŵanyake kuti ‘ŵaziŵizge makhumbiro gha thupi.’ (1 Pet. 2:11) Yuda wakaciska ŵabali ŵake kuti ‘ŵalimbire comene cifukwa ca cipulikano.’ Iye wakayowoya nteura cifukwa ca ŵantu ŵambura kusopa awo ŵakacitanga mikhaliro yiheni. (Yuda 3, 4) Ŵakristu wose ŵakaphalirika kuti ŵaciskanenge yumoza na munyake mwakuti paŵavye yumoza wakunonopeskeka na upusikizgi wa kwananga. (Heb. 3:13) Petros wakaciska Ŵayuda awo ŵakaŵavya cipulikano mwa Kristu kuti: ‘Ŵajiponoske ku muwiro uwu wakubendera.’—Mil. 2:40.

Kasi uyo wakuciska ŵanji mu mikhaliro ya nga ni iyi wakwenera kuŵa muntu wa mtundu wuli? Ni mwauli umo uyo wakuciska ŵanyake wangacitira kuti ŵacitepo kantu mwaluŵiro kwambura kuŵa wankaza panji munonono?

‘Cifukwa ca Citemwa.’ Usange tikuciska ŵanji ‘cifukwa ca citemwa’ cara, mbwenu kuciska kwithu kuŵenge kwakuzotofya. (File. 9) Enya, para pakukhumbikwira kucitapo kantu mwaluŵiro, uyo wakuciska wakwenera kurongora mu kayowoyero kake. Kuyowoya mwakuzikitizga kungarongora nga mukuphepiska. Kweniso, kayowoyero kinu kakwenera kurongora kuti mukucezga cara, kweni ndipera, yowoyani mwacitemwa. Mwambura kukayika, kayowoyero ka citemwa ndiko kakhuŵirizgenge ŵategherezgi. Pakuyowoya za iye mwene na awo ŵakendanga naye, Paulos wakaphalira Ŵatesalonika kuti: “Mukumanya umo tikamupwerererani yumoza yumoza, nga ndi umo wiske wakupwererera ŵana ŵake, ndipo tikamuciskani.” (1 Tes. 2:11) Ŵalaŵiliri Ŵacikristu aŵa ŵakaŵeyelera ŵabali na citemwa. Imwe namweso mazgu ghinu ghaŵe gha kufipira mtima ŵategherezgi ŵinu.

Iŵani ŵaluso pakuyowoya. Tceŵani kukwiyiska awo mukuŵaciska. Kweni panyengo yeneiyo pera, lekani kopa kuphalira ŵategherezgi ŵinu “dazgo lose la Ciuta.” (Mil. 20:27) Ŵantu awo ŵakuwongera urongozgi ŵakwiyenge cara panji kuleka kumutemwani cifukwa cakuti mwaŵaciska kuti ŵacitenge ico nciweme.—Sal. 141:5.

Nyengo zose, mbuweme kwamba danga na kuwongera mwakuzunura vintu ivyo muntu uyo wakucita makora pambere mundamupe urongozgi. Aghanaghanirani vintu viweme ivyo ŵabali ŵinu ŵakucita—vintu ivyo Yehova wakwenera kuti wakukondwa navyo: cipulikano ico ŵakurongora mu milimo yawo, citemwa ico cikuŵaciska kuti ŵaŵe ŵakutokatoka, ndiposo kuzizipizga viyezgo ivyo ŵakukumana navyo. (1 Tes. 1:2-8; 2 Tes. 1:3-5) Kucita nteura kovwirenge ŵabali ŵinu kujiwona kuti mbakukhumbikwa ndipo ici cipangiskenge kuti ŵapokere urongozgi uwo mungayowoya.

“Na Kuzizipizga Kose.” Kuciska kukwenera kucitika “na kuzizipizga kose.” (2 Tim. 4:2) Ici cikusazgapo kuzizipizga para yunji wacita cintu ciheni panji cakukwiyiska. Muntu wakuzizipizga wakuŵa na cilindizga cakuti ŵategherezgi ŵake ŵagwiriskirenge ncito ivyo wakuyowoya. Kuciska ŵanji mwa ntowa iyi kovwirenge ŵategherezgi ŵinu kuti ŵaleke kughanaghana kuti imwe mukuŵawona nga mbaheni comene. Cigomezgo cinu cakuti ŵabali na ŵadumbu ŵinu ŵakukhumba kucita vintu ivyo ŵangafiska mu uteŵeti wa Yehova ciŵaciskenge kuti ŵacite ico nciweme.—Heb. 6:9.

“Mu Cisambizgo Ceneco.” Ni mwauli umo murara ‘wangaciskira mu cisambizgo ceneco’? Mwa ‘kukoreska mazgu ghakugomezgeka agho ghakulingana na cisambizgo.’ (Tito 1:9) Mumalo mwakuyowoya maghanoghano ghinu, gwiriskirani ncito Mazgu gha Ciuta para mukuciska ŵanji. Gwiriskirani ncito Baibolo kuti ndilo limupani mahara gha ivyo mukwenera kuyowoya. Yowoyani vyandulo ivyo muntu wakusanga para wakugwiriskira ncito ivyo Baibolo likuyowoya vyakukhwaskana na nkani iyo mukuyowoya. Rongosorani vyakufumapo ivyo muntu wangasanga sono ndiposo muntazi para wakuleka kugwiriskira ncito ivyo Mazgu gha Ciuta ghakuyowoya, ndipo gwiriskirani ncito vyakufumapo ivyo mwayowoya kuti mukhorweske ŵategherezgi ŵinu za kukhumbikwa kwa kucitapo kantu mwakwenelera.

Woneseskani kuti mukurongosora mwakupulikikwa makora ku ŵategherezgi ŵinu za ico ŵakwenera kucita na umo ŵakwenera kucitira. Ŵarongosolerani makora kuti ivyo mukuyowoya nvyakufumira mu Malemba. Usange Malemba ghakupereka wanangwa wakupanga cakusanka cilicose ico muntu wakukhumba, rongosorani mphaka za wanangwa uwo. Paumaliro pake, perekani cikhuŵirizgo caumaliro ico cikhozgenge ŵategherezgi ŵinu kuti ŵacitepo kantu.

Na “Wanangwa wa Kuyowoya.” Kuti waciske ŵanji mwakukhorweska, muntu wakwenera kuŵa na “wanangwa wa kuyowoya mu cipulikano.” (1 Tim. 3:13, NW) Kasi ncivici ico cikupangiska kuti muntu wayowoye mwakufwatuka? Ncifukwa cakuti ‘bambiro lake la milimo yiweme’ likukolerana na ivyo wakuciska ŵabali ŵake kuti ŵacitenge. (Tito 2:6,7; 1 Pet. 5:3) Pacifukwa ici, awo ŵakuciskika ŵamanyenge kuti uyo wakuŵaciska wakukhumba kuti iwo ŵacitenge ivyo iye wakuleka kucita cara. Iwo ŵawonenge kuti ŵangarondezga cipulikano cake nga ni umo iye wakurondezgera Kristu.—1 Kor. 11:1; Fil. 3:17.

Kuciska kwakuzikika pa Mazgu gha Ciuta ndiposo kwakuperekeka mu citemwa kungaŵa na vyakufumapo viweme comene. Awo ŵali kupika ncito ya kuciska ŵakwenera kufwilirapo kuti ŵaciskenge mwakwenelera.—Rom. 12:8.