Palije Homwa Lakufulikira Ise Liluskenge
“Palije homwa ilo lafulikira iwe tilisakate.”—YESAYA 54:17.
1, 2. Kasi ivyo vikacitikira Ŵakaboni ŵa Yehova ŵa ku Albania vikulongora wuli kuti lemba la Yesaya 54:17 ndaunenesko?
MU VILIMIKA vya kumanyuma uku, mu caru cinyake cicoko ca mapiri, ico cili pakati pa kumwera na kuvuma kwa Europe, mukaŵa gulu lambura wofi la Ŵakhristu. Boma la caru ico likayezgayezga kuparanya gulu ili. Ndipouli, nthambuzgo, kujalirika mu jere, ndiposo ivyo ŵakaŵapusikizgiranga vikamazga yayi gulu ili. Kasi Ŵakhristu aŵa ŵakaŵa anjani? Ŵakaŵa Ŵakaboni ŵa Yehova ŵa ku Albania. Nangauli kukaŵa kwakusuzga kuwungana ndiposo kupharazga, kweni ŵazizipizga vilimika vinandi. Kuzizipizga kwawo kwapangiska kuti ŵanthu ŵacindike Cikhristu ndiposo kulumba zina la Yehova. Mu cilimika ca 2006, peneapo ŵakapatuliranga ofesi yiphya ya munthavi, mbali munyake, uyo wateŵetera kwa vilimika vinandi, wakati: “Nanga Satana wangayezgayezga comene, kweni wakuthera ndipo Yehova wakulutilira kutonda.”
2 Nkhani za nthena izi zikulongora unenesko wa layizgo la Ciuta ku ŵanthu ŵake, ilo liri pa lemba la Yesaya 54:17, ilo likuti: “Palije homwa ilo lafulikira iwe tilisakate, ndipo lulimi lose ilo tiluwukire iwe mu kweruzga tiulususkenge.” Mdauko ukulongora kuti palije ico caru ca Satana cingacita mwakuti cilekeske ŵateŵeti ŵakujipeleka aŵa kuti ŵasopenge Yehova Ciuta.
Mahomwa gha Satana Ghakutondeka
3, 4. (a) Kasi Satana wakugwiliskira nchito mahomwa wuli? (b) Kasi mahomwa gha Dyabulosi ghatondeka wuli?
3 Satana wakugwiliskira nchito mahomwa nga ni kukanizgika na boma, kuyuzgika na ŵanthu ŵankhaza, kuŵikika mu jere, ndiposo wakutuma “ŵanthu awo ŵakwata ulankhasi mu dango” kuti wasuske ŵasopi ŵaunenesko. (Salmo 94:20) Na sono wuwo, mu vyaru vinyake Ŵakhristu ŵaunenesko ‘ŵakuyezgeka’ cifukwa ca kugomezgeka kwawo kwa Ciuta.—Civumbuzi 2:10.
4 Mwaciyelezgero, ofesi yinyake ya munthavi ya Ŵakaboni ŵa Yehova yikati mu cilimika cimoza pera, kwa nyengo zakukwana 32, ŵateŵeti ŵa Ciuta ŵakatimbikanga comene cifukwa ca kupharazga. Kusazgirapo apa, kwa nyengo zakukwana 59, ŵapolisi ŵakakakanga Ŵakaboni ŵa Yehova, ŵalara na ŵana, ŵanalume na ŵanakazi, awo ŵakapharazganga. Ŵanyake ŵakaŵadindiskanga minwe pa pepara kuti ŵamanyikwenge, ndiposo kuŵajambura na kuŵajalira mu jere. Ŵanji ŵakaŵawofyanga mwa kuŵatimba. Mu caru cinyake, muli milandu yakujumpha 1,100 yakukhwaskana na Ŵakaboni ŵa Yehova awo ŵakakakika, awo ŵakaŵalipiska ndalama panji kutimbika. Pa milandu iyi, milandu yakujumpha 200 yikacitika apo ŵakawungana pakukumbukira nyifwa ya Yesu. Pa vyose ivi, mzimu wa Yehova wawovwira ŵanthu ŵake mu vyaru ivi ndiposo vinyake nangauli ŵalwani ŵawo mbanandi comene kuluska iwo. (Zekariya 4:6) Kwali suzgo liŵe likuru wuli, lingatondeska yayi awo ŵakulumba Yehova. Ntheura tili na cigomezgo kuti palije homwa ilo lingatondeska cilato ca Ciuta.
Kususka Malulimi Ghautesi
5. Kasi Ŵakhristu ŵakwambilira ŵakaŵayowoyera mautesi wuli?
5 Yesaya wakacima kuti ŵanthu ŵa Ciuta ŵazamususka lulimi lose ulo luŵawukirenge. Ŵakhristu ŵakwambilira ŵakaŵapusikizgiranga kuti ŵakacitanga vinthu viheni. Mazgu agho ghakusangika pa lemba la Milimo 16:20, 21 ghakulongora ivyo ŵanthu ŵakaŵayowoyeranga. Lemba ili likuti: “Aŵa ŵanthu . . . ŵakusuzga comene muzi withu, ndipo ŵakuwuzga maluso agho ndi muziro kwa ise, pakuŵa Ŵaroma.” Pa nyengo yinyake ŵakususka ŵakayezga kukhuŵilizga ŵeruzgi ŵa misumba kuti ŵawukire ŵalondezgi ŵa Khristu. Iwo ŵakati: ‘Awo ŵali kutimbanizga caru ŵiza na kuno wuwo; [nakuti] ŵakucita kwakupambana na malanguro gha Kesare.’ (Milimo 17:6, 7) Mpositole Paulosi ŵakamuthya kuti “nchilengo” ndiposo mulongozgi wa kagulu ka awo ŵakugaluska ŵanthu “mu caru cose.”—Milimo 24:2-5.
6, 7. Kasi nthowa yimoza iyo Ŵakhristu ŵaunenesko ŵakususkira mautesi agho ŵanthu ŵakuyowoya ni njini?
6 Lero napo tikuzizwa yayi kuti Ŵakhristu ŵaunenesko ŵakuŵatetera mautesi, ŵakuŵasesa, ndiposo kunanga lumbiri lwawo mwa kuthandazga nkhani zautesi. Kasi tikususka wuli mautesi agha?—Yesaya 54:17.
7 Nkharo yiwemi ya Ŵakaboni ŵa Yehova yikususka nkhani zautesi izo ŵakususka ŵakuthandazga. (1 Petros 2:12) Nkhani zautesi izi zikususkika para Ŵakhristu ŵakupulikira dango la boma, ndiposo ŵakulongora nkharo yiwemi ku ŵanthu na kuŵafipira mtima. Nkharo yithu yiwemi yikucitira ukaboni. Peneapo ŵanthu ŵakuwona kuti tikulimbikira kucita milimo yiwemi, kanandi ŵakucindika Dada withu wa kucanya ndiposo ŵakumanya umo ŵateŵeti ŵake ŵakukhalira.—Yesaya 60:14; Mateyu 5:14-16.
8. (a) Kasi nyengo zinyake tikwenera kucita vici kuti tikhozgere vigomezgo vithu vya m’Malemba? (b) Nga ni umo Yesu wakacitira, kasi nase tikususka wuli malulimi gha awo ŵakwimikana nase?
8 Kusazgirapo pa nkharo yithu ya Cikhristu, nyengo zinyake cingaŵa cakuzirwa kukhozgera mwacikanga vigomezgo vithu vya m’Malemba. Nthowa yinyake tikupempha boma panji makhoti kuti ghativikilire. (Esther 8:3; Milimo 22:25-29; 25:10-12) Apo Yesu wakaŵa pa caru capasi , nyengo yinyake wakasuskanga pakweru ivyo awo ŵakamususkanga ŵakamuyowoyeranga. (Mateyu 12:34-37; 15:1-11) Nga ni umo Yesu wakacitira, nase tingalongosora mwakupulikikwa makora vigomezgo vithu. (1 Petros 3:15) Tileke kuzomerezga ŵanthu awo ŵakutigoska ku sukulu, ku nchito, ndiposo ŵabali ŵithu ŵakuthupi kutilekeska kupharazga Mazgu gha Ciuta.—2 Petros 3:3, 4.
Yerusalemu Wakaŵa “Libwe Lizitu”
9. Kasi ni Yerusalemu njuni uyo wakwimilirika na “libwe lizitu” ilo lazunurika pa lemba la Zekariya 12:3, ndipo kasi libwe ili likuyimira anjani awo ŵali pa caru capasi?
9 Ucimi wa Zekariya ukuvumbura cifukwa ico mitundu yikuwukira Ŵakhristu ŵaunenesko. Wonani ivyo lemba la Zekariya 12:3 likuyowoya: “Mu zuŵa ilo ndicite Yerusalemu kuŵa libwe lizitu ku ŵanthu ŵose.” Kasi ucimi uwu ukayowoyanga za Yerusalemu njuni? Ucimi wa Zekariya ukayowoyanga za “Yerusalemu wakucanya,” uyo ni Ufumu wa kucanya, uwo Ŵakhristu ŵakuphakazgika ŵali kucemekera. (Ŵahebere 12:22) Ŵanthu ŵacoko waka awo ŵamuwusa mu Ufumu uwu ŵacali pa caru capasi. Iwo na ŵabwezi ŵawo ŵa “mberere zinyake” ŵakuciska ŵanthu kuti ŵakhozgere muwuso wa Ciuta peneapo nyengo yicalipo. (Yohane 10:16; Civumbuzi 11:15) Kasi mitundu yacita wuli na nchemo iyi? Kasi Yehova wakupeleka wovwiri wuli ku ŵasopi ŵake ŵaunenesko lero? Tiyeni tisange mazgoro gha mafumbo agha kufuma mu Zekariya cipaturo 12. Kusanda cipaturo ici kutovwirenge kuti tisimikizge kuti palije homwa ilo liluskenge pakwimikana na Ŵakhristu ŵakuphakazgika ndiposo ŵa mberere zinyake.
10. (a) Cifukwa wuli ŵanthu ŵa Ciuta ŵakuwukirika? (b) Kasi nchivici cacitikira awo ŵakuyezga kuwuskapo “libwe lizitu”?
10 Lemba la Zekariya 12:3 likulongora kuti mitundu ‘yiteketekenge.’ Kasi yiteketekenge wuli? Ciuta wali kulangura kuti makani ghawemi gha Ufumu ghakwenera kupharazgika. Ŵakaboni ŵa Yehova ŵakuwona kuti mulimo wa kupharazga ngwakuzirwa comene. Nangauli kupharazga Ufumu nkhwakuzirwa, kweni kwaŵa nga ni “libwe lizitu” ku mitundu. Mitundu iyi yikuyezga kuwuskapo libwe ili mwa kutimbanizga awo ŵakupharazga Ufumu. Cifukwa ca kuyezga kuwuskapo libwe ili, mitundu ‘yateketeka.’ Lumbiri lwa mitundu iyi lwanangika comene cifukwa cakuti yatondeka mwacikhozga soni. Mitundu yingakanizga yayi ŵasopi ŵaunenesko awo ŵakuzirwiska mulimo wa kupharazga “ivangeli landanda” la Ufumu wa Ciuta. Ufumu uwu ukuwusika na Mesiya ndipo ukupharazgika pambere mgonezi uwu undamare. (Civumbuzi 14:6) Mwanalume munyake, uyo wakugada jere mu caru cinyake muno mu Africa, wakati wawona nkhaza izo ŵanthu ŵakacitiranga ŵateŵeti ŵa Yehova, wakati: ‘Imwe mukutaya waka nyengo yinu pakusuzga ŵanthu aŵa. Iwo ŵatherengepo yayi. Apa nthena ndipo mukuŵakwezga nkhongono.’
11. Kasi Yehova wafiska wuli layizgo lake ilo liri pa lemba la Zekariya 12:4?
11 Ŵazgani Zekariya 12:4. Mwakuyelezgera, Yehova walayizga kuti wazamubulumutizga maso ndiposo ‘kuzukumiska’ awo ŵakulimbana na ŵapharazgi ŵacikanga ŵa Ufumu. Yehova wakucita nga ni umo walayizgira. Mwaciyelezgero, mu caru cinyake ico ŵasopi ŵaunenesko ŵakakanizgika kusopa, ŵakususka ŵakatondeka kukanizga ŵanthu ŵa Ciuta kupokera cakurya cauzimu. Nanga yingaŵa nyuzipepara yinyake mu caru ici yikati Ŵakaboni ŵa Yehova ŵakugwiliskira nchito vibaluni kuti ŵapokere mabuku ghakulongosora Baibolo. Ivyo Ciuta wakalayizga ŵateŵeti ŵake ŵakugomezgeka ni vyaunenesko nadi. Iyo wakati: “Ndijurenge maso ghane, para nkhutimba kavalo yose wa ŵamitundu na uciburumutira.” Cifukwa ca ukali, ŵalwani wa Ufumu aŵa ŵakumanya yayi ico ŵangacita. Kweni ise tikugomezga kuti Yehova wazamuponoska ŵanthu ŵake ndiposo kuŵapwelelera.—2 Mathemba 6:15-19.
12. (a) Kasi Yesu wakaponya moto pa caru mu nthowa wuli? (b) Kasi ŵakuphakazgika awo ŵacali pa caru capasi ŵakubuska moto wauzimu mu nthowa wuli, ndipo nchivici ico cacitika?
12 Ŵazgani Zekariya 12:5, 6. Mu ciyowoyero cakwambilira, mazgu ghakuti “mbumba” mu mavesi agha, ghakalembeka kuti “mafumu.” Antheura, mafumu gha Yuda ghakwimira awo ŵakulaŵilira ŵanthu ŵa Ciuta. Yehova wakuŵapa ŵalaŵiliri ŵakuphakazgika aŵa mwamphu wakuti ŵacitire vinthu vyakukhwaskana na Ufumu ivyo vili pa caru capasi. Pa nyengo yinyake, Yesu wakaphalira ŵasambiri ŵake kuti: “Nkhizira kuponya moto pa caru.” (Luka 12:49) Ndipo nadi, mwakuyelezgera Yesu wakaponya moto. Pakuti Yesu wakapharazganga mwamwamphu, ŵanthu ŵakamanya kuti Ufumu wa Ciuta ngwakuzirwa comene. Nangauli Yesu wakapharazganga mwamwamphu, kweni Ŵayuda ŵanandi ŵakamususkanga. (Mateyu 4:17, 25; 10:5-7, 17-20) Mwakuyana waka, ‘nga ndi moto wakugolera mukati mwa nkhuni, ndiposo nga ndi cenje mukati mwa nchinda,’ ŵalondezgi ŵa Yesu mazuŵa ghano nawo ŵakubuska moto mwauzimu. Buku la mu cilimika ca 1917, la mutu wakuti, The Finished Mystery,a likavumbura upusikizgi wa visopa ivyo vikuti ni vya Cikhristu. Ici cikakwiyiska ŵalongozgi wa visopa ivi. Sonosono apa, Uthenga wa Ufumu Na. 37 wa mutu wakuti, “Umaliro wa Cisopo Cautesi Uli Pafupi!” ukapangiska ŵanthu kukhozgera Ufumu wa Ciuta panji kwimikana nawo.
“Mahema gha Yuda” Ghakaponoskeka
13. Kasi mazgu ghakuti “mahema gha Yuda” ghakuyimira vici, ndipo cifukwa wuli Yehova wakuponoska awo ŵawukirika?
13 Ŵazgani Zekariya 12:7, 8. Kale mu Israyeli mukaŵanga mahema. Nyengo zinyake ŵaliska ndiposo ŵalimi ndiwo ŵakagonanga mu mahema agha. Ŵanthu aŵa ndiwo ŵakakhumbikwiranga civikiliro para ŵalwani ŵiza kuzakawukira msumba wa Yerusalemu. Mazgu ghakuti “mahema gha Yuda,” ghakulongora kuti mwakuyelezgera, Ŵakhristu ŵakuphakazgika ŵali pa malo ghambura kuvikilirika. Ndipo pa malo agha iwo ŵakukhozgera vinthu vya Ufumu wakuwusika na Mesiya. Yehova wa mipingo wazamuponoska dankha “mahema gha Yuda” cifukwa cakuti Satana wakughawukira.
14. Kasi Yehova wakuvikilira wuli awo ŵali mu “mahema gha Yuda” ghakuyelezgera, ndiposo kuŵapumuzga ku vyakulema?
14 Mdauko ukulongora kuti Yehova wakuvikilira nadi Ŵakhristu ŵakuphakazgika mu “mahema” ghawo ghakuyelezgera.b Wakuŵapumuzga ‘ŵavyakulema’ mwa kuŵakhozga ndiposo kuŵapa cikanga nga ni Davide, themba la nkhondo.
15. Cifukwa wuli Yehova wakukhumba “kuparanya mitundu yose ya ŵanthu,” ndipo mphawuli apo wazamuyiparanyira?
15 Ŵazgani Zekariya 12:9. Cifukwa wuli Yehova wakukhumba “kuparanya mitundu yose ya ŵanthu”? Cifukwa cakuti ŵakulutilira kwimikana na Ufumu wakuwusika na Mesiya. Ciuta wakususka mitundu iyi cifukwa cakuti yikutombozga na kusuzga ŵanthu ŵake. Sonosono apa awo ŵakucita khumbo la Satana ŵazamuwukira ŵasopi ŵaunenesko ŵa Ciuta. Kuwukira uku kuzamwambiska nkhondo pa caru cose iyo yikuzunurika mu Baibolo kuti Haramagedoni. (Civumbuzi 16:13-16) Mweruzgi Mukuru wazamuvikilira ŵanthu ŵake ndiposo wazamutuŵiska zina lake pakati pa ŵamitundu.—Ezekiel 38:14-18, 22, 23.
16, 17. (a) Kasi ‘ciharo ca ŵateŵeti ŵa Yehova’ ni vici? (b) Kasi tikulongoraci para tikuzizipizga kuwukira kwa Satana?
16 Satana walije homwa ilo lingalopweska cipulikano panji mwamphu wa ŵanthu ŵa Yehova pa caru cose. Cifukwa ca nkhongono za Yehova, tili na mtende wauzimu uwo ‘nchiharo ca ŵateŵeti ŵake.’ (Yesaya 54:17) Palije uyo wangatipoka mtende ndiposo usambazi withu wauzimu uwo tili nawo. (Salmo 118:6) Satana walutilirenge kutisuska na kwambiska masuzgo. Kweni para tazizipizga mwakugomezgeka, tikulongora kuti mzimu wa Ciuta uli nase. (1 Petros 4:14) Makani ghawemi gha Ufumu wa Yehova ghakupharazgika pa caru cose. Nga ni vilwero vyakutimbira ŵalwani, ŵakususka ŵanandi mwakuyelezgera ‘ŵakuponya mawe’ ku ŵanthu ŵa Ciuta. Kweni cifukwa ca nkhongono za Yehova, ŵateŵeti ŵake ŵakuŵeka mawe agha. (Zekariya 9:15) Palije uyo wangatondeska Ŵakhristu ŵakuphakazgika ndiposo ŵanyawo ŵa mberere zinyake kucita milimo yawo.
17 Tikulindilira nyengo apo Satana wazamuleka kutiwukira. Tikupembuzgika comene na layizgo lakuti ‘palije homwa ilo lafulikira ise lisakatenge, ndiposo lulimi lose ulo tiliwukire ise mu kweruzga tilisuskenge.’
[Mazgu ghamusi]
a Lakupharazgika na Ŵakaboni ŵa Yehova, kweni sono likusindikizgikaso yayi.
b Kuti mumanye vinandi, wonani buku la Jehovah’s Witnesses—Proclaimers of God’s Kingdom, peji 675 na 676, lakupharazgika na Ŵakaboni ŵa Yehova.
Kasi Mungazgora Wuli?
• Kasi nchivici cikulongora kuti mahomwa gha Satana ghatondeka?
• Kasi Yerusalemu wakucanya waŵa wuli “libwe lizitu”?
• Kasi Yehova waponoska wuli “mahema gha Yuda”?
• Peneapo tikusendelera ku nkhondo ya Haramagedoni, kasi ndise ŵakusimikizga vici?
[Cithuzithuzi pa peji 23]
Ŵanthu ŵa Yehova ŵa ku Albania ŵakalutilira kugomezgeka nangauli Satana wakaŵawukira
[Cithuzithuzi pa peji 25]
Yesu wakasuskanga mautesi
[Cithuzithuzi pa peji 26]
Palije homwa lakufulikira awo ŵakupharazga makani ghawemi gha Ufumu liluskenge