Kasi Ivyo Mukugomezga Vili na Ntchito Yiliyose?
Kasi mukughanaghana kuti umoyo uli na ntchito? William B. Provine uyo wakagomezganga kuti vyamoyo vikachita kusintha, wakati: “Para tikuwona umo vikendera kuti tiŵeko, tikwamba kujifumba usange umoyo uli na ntchito.” Fundo yake njakuti wuli? Iyo wakati: “Nkhuchiwona yayi icho ŵanthu ŵakusangikira mu charu.” 32
Mazgu agha ghakung’anamurachi chomene? Usange mbunenesko kuti umoyo ulije ntchito, palije chifukwa chakuŵira ŵamoyo. Ipo tiyezgenge waka kuchita viwemi na kubaba ŵana. Para tafwa, mbwenu tamalira penepapo. Usange ni nthena, nangauli tili na wongo, tikughanaghana, tili na mahara, ndipo tikujifumba icho tikaŵirako, ndikuti vyose ni vyawaka pera.
Ni apo pera yayi. Ŵanandi awo ŵakugomezga kuti vyamoyo vikachita kusintha, ŵakukanirathu kuti Chiuta waliko ndipo ŵakuti wanjilirengepo yayi pa ivyo ŵanthu ŵakuchita. Usange ndimo vingaŵira, kawemi kangawoneka yayi. Ndikuti ŵanthu ŵalutilirenge waka kulaŵiska ku ŵandyali, ŵanthu ŵakusambira, na ŵalongozgi ŵa visopa. Kweni ŵanthu aŵa ŵalije mbiri yiwemi. Para tingatolera ivyo vyachitika kumanyuma uku, chingang’anamura kuti nthimbanizgo na mphindano vimalenge yayi pakati pa ŵanthu. Usange mbunenesko kuti vyamoyo vikachita kusintha, ipo ntchiwemi kwendera waka fundo yakuti “tiyeni tirye na kumwa, chifukwa machero tifwenge.”—1 Ŵakorinte 15:32.
Kweni Baibolo likusambizga kuti: “Chisimi cha umoyo chili na [Chiuta].” (Salimo 36:9) Mazgu agha ghali na fundo yakuzirwa.
Usange ivyo Baibolo likuyowoya mbunenesko, ndikuti umoyo uli na ntchito. Mlengi withu wachitemwa wakukhumbira viwemi wose awo ŵakuchita khumbo lake. (Mupharazgi 12:13) Iyo wakukhumba kuti ŵanthu ŵazakakhale makora kwambura nthimbanizgo, mphindano na ukhuluku, ndipo na nyifwa wuwo kuzamuŵavya.—Salimo 37:10, 11; Yesaya 25:6-8.
Mphake kuti ŵanthu mamiliyoni pa charu chose ŵakugomezga kuti icho chikukhumbikwa kuti umoyo uŵe wakunozga nkhumanya Chiuta na kumupulikira. (Yohane 17:3) Agha ni maghanoghano waka yayi. Ukaboni ukulongora kuti vyamoyo vikachita kulengeka.