MAFUMBO AGHO BAIBOLO LIKUZGORA
Kasi umoyo ndimo ukwenera kuŵira?
Kasi nyengo zinyake mukuwona kuti umoyo ngufupi chomene?
Kasi muli kujifumbapo usange umoyo ukumalira waka pa kuseŵera, kugwira ntchito, kutora panji kutengwa, kubaba ŵana, na kuchekura? (Job 14:1, 2) Baibolo likulongora kuti ŵanthu ŵavinjeru nawo ŵakuzizikika chomene na fundo iyi.—Ŵazgani Mupharazgi 2:11.
Kasi umoyo ni vichi? Chakwamba tifumbe kuti, Kasi umoyo ukamba wuli? Ŵanthu ŵanandi ŵamanya kuti Mlengi wavinjeru ndiyo wali kutilenga ŵati ŵasanda umo wongo na thupi lithu lose vikugwilira ntchito. (Ŵazgani Salmo 139:14.) Ntheura Chiuta wakwenera kuti wakaŵa na chifukwa chiwemi chomene pakutilenga! Para tingamanya chifukwa ichi mbwenu tingamanya makora kuti umoyo ni vichi.
Chifukwa wuli Chiuta wali kulenga ŵanthu?
Chiuta wakatumbika ŵanthu ŵakwamba na kuŵapa ntchito yakuti ŵachitenge. Chiuta wakakhumbanga kuti ŵanthu aŵa ŵakhale kwamuyirayira, ŵazuzge charu, na kuzgora charu chapasi kuŵa paradiso.—Ŵazgani Genesis 1:28, 31.
Ivyo Chiuta wakakhumbanga vikafiskika yayi chifukwa ŵanthu ŵakatondeka kumupulikira. Kweni Chiuta wakatileka waka yayi nesi kusintha khumbo lake. Baibolo likutiphalira kuti Chiuta wachali kugwira ntchito kuti wawombore ŵanthu ŵakugomezgeka ndipo khumbo lake lizamufiskika pa charu chapasi kwambura kutondeka! Ntheura Chiuta wakukhumba kuti imwe muzakaŵe na umoyo nga umo iyo wakakhumbiranga. (Ŵazgani Salmo 37:29.) Sambirani Baibolo mwakuti namwe muzakaŵepo apo Chiuta wazamufiska khumbo lake.