MAFUMBO AGHO BAIBOLO LIKUZGORA
Kasi awo ŵali kufwa ŵangazakaŵaso ŵamoyo?
Uyo Wakambiska umoyo wangawezgerapo nadi umoyo
Yehova Chiuta ndiyo ntchisimi cha umoyo. (Salmo 36:9) Ipo ntchamahara kuyowoya kuti Chiuta wangawuska ŵakufwa kuti ŵaŵeso ŵamoyo. Nakuti Baibolo likutiphalira kuti Chiuta wazamuwuska nadi ŵakufwa. (Ŵazgani Milimo 24:15) Kweni chifukwa wuli wazamuŵawuska?
Kufuma waka pakwamba, Chiuta wakakhumbanga kuti ŵanthu ŵakhalenge pa charu chapasi muyirayira. (Genesis 1:31; 2:15-17) Khumbo lake ili lindasinthe. Vikumuŵinya para wakuwona ŵanthu ŵakusuzgika na kufwa mwaluŵiro chomene.—Ŵazgani Job 14:1, 14, 15.
Kasi para ŵakufwa ŵazakawuka ŵazamukhala nkhu?
Kasi Chiuta wakalenga ŵanthu kuti ŵakhalenge kuchanya? Yayi. Chiuta wakalenga ŵangelo kuti ndiwo ŵakhalenge kuchanya. Kweni ŵanthu kuti ŵakhalenge pa charu chapasi. (Genesis 1:28; Job 38:4, 7) Pakumanya fundo iyi, wonani ivyo vikachitika na ŵanthu awo Yesu wakaŵawuska. Ŵanthu aŵa wakaŵawuskira pano pa charu chapasi. Ntheura ŵakufwa ŵanandi awo ŵazamuwuskika ŵazamukhalaso pa charu chapasi.—Ŵazgani Yohane 5:28, 29; 11:44.
Kweni Chiuta wasankha ŵanthu ŵachoko waka kuti ŵazakawuskike na kuluta kuchanya, uko ŵamuŵa na mathupi ghauzimu. (Luka 12:32; 1 Ŵakorinte 15:49, 50) Para ŵanthu aŵa ŵawuka na kuluta kuchanya ŵazamuŵa mafumu pamoza na Yesu ndipo ŵazamuwusa charu chapasi.—Ŵazgani Uvumbuzi 5:9, 10.