Muphwa wa Paulosi Wakawopa Yayi

Tiye tisambire vya munyamata munyake uyo wakaponoska musibweni wake. Musibweni wa munyamata uyu wakaŵa mpositole Paulosi. Zina la munyamata uyu tikulimanya yayi, kweni ico tikumanya nchakuti wakawopa yayi. Kasi ukukhumba kupulika ivyo wakacita?—

Paulosi wakaŵa mu jele ku Yerusalemu. Wakakakika cifukwa wakapharazganga vya Yesu. Ŵanthu ŵanyake ŵaheni ŵakamutinkha Paulosi. Ntheura ŵakapangana kuti ŵamukome. Ŵakati: ‘Tipemphe mulongozgi wa ŵasilikari kuti watume ŵasilikari ŵake ŵize na Paulosi ku khoti. Ise tibisamenge panthowa kuti para Paulosi wakujumpha, timukome!’

Muphwa wa Paulosi wakapulika ivyo ŵakapangana. Kasi wakacitapo vici? Wakaluta ku jele kukaphalira Paulosi. Paulosi wakamuphalira kuti wakayowoye ivyo ŵanthu ŵara ŵakapangana kwa mulongozgi wa ŵasilikari. Kasi ukughanaghana kuti cikaŵa cipusu kwa muphwa wa Paulosi kukayowoya na mulongozgi wa ŵasilikari?— Yayi, cifukwa mulongozgi wa ŵasilikari wakaŵa wakuzirwa. Kweni muphwa wa Paulosi wakawopa yayi. Wakaluta kukayowoya nayo.

Mulongozgi wa ŵasilikari wakamanya cakucita. Wakatora ŵasilikari pafupifupi 500 kuti ŵamuvikilire Paulosi. Wakaŵaphalira kuti ŵatore Paulosi usiku wenewuwo na kuluta nayo ku Kesareya. Kasi Paulosi wakafika makora?— Enya, ŵanalume ŵaheni ŵara ŵakatondeka kumukoma! Ivyo ŵakapangana vikatondeka.

Kasi nkhani iyi yikukusambizgaci?— Nawe ungawopanga yayi. Tikwenera kopa yayi para tikuyowoya na ŵanthu vya Yehova. Kasi uwopenge yayi na kulutilira kuyowoya vya Yehova?— Usange uwopenge yayi, uponoskenge ŵanji.