Kasi Chiuta Wakutikhumbira Vichi?

PARA mukuŵerenga nyuzipepara, kuwonelera TV, panji kupulikizga wayilesi, mukuwona panji kupulika nkhani zinandi zakukhwaskana na kuswa malango, nkhondo, na uchigeŵenga. Namwe mungaŵa kuti mukusuzgika maghanoghano chifukwa chakuti mukulwara panji uyo mukumutemwa wafwa.

Jifumbani kuti:

• Kasi Chiuta wakakhumbanga kuti ivi ndivyo vinichitikirenge pamoza na banja lane?

• Kasi ni njani uyo wanganovwira pa masuzgo ghane?

• Kasi tizamuŵapo na mtende pa charu chapasi?

Baibolo likuzgora mafumbo agha.

BAIBOLO LIKUTI CHIUTA WAZAMUCHITA VINTHU VYAKUKONDWESKA CHOMENE PA CHARU CHAPASI.

• Ŵanthu ŵazamupulikaso vyakuŵinya yayi, kuchekura, panji kufwa.—Chivumbuzi 21:4

• “Ŵakupendera ŵazamudukaduka nga ni mbaŵala.”—Yesaya 35:6

• “Maso gha ŵachibulumutira ghazamujulika.”—Yesaya 35:5

• Ŵakufwa ŵazamuŵaso ŵamoyo.—Yohane 5:28, 29

• Palije uyo wazamulwara.—Yesaya 33:24

• Waliyose pa charu wazamuŵa na vyakurya vinandi.—Salimo 72:16

  

MANYANI IVYO BAIBOLO LIKUSAMBIZGA

Nyengo zinyake mungawona nga ivyo vyalembeka kukwambilira vingazakachitika yayi. Kweni Chiuta walayizga kuti sonosono apa wachitenge vinthu ivi pa charu chapasi. Ndipo Baibolo likulongosora umo wazamuchitira.

Baibolo likutiphaliraso vinthu vinyake. Likutiphalira ivyo tikwenera kumanya kuti tiŵe ŵakukondwa nadi kweniso kuti umoyo unozgenge sono nthena. Ghanaghanirani vinthu ivyo mukusuzgika navyo maghanoghano. Vinthu ivi vingaŵa ukavu, masuzgo gha mu banja, ulwari, panji munthu uyo mukumutemwa wali kufwa. Baibolo lingamovwirani umo mungachitira na masuzgo agha. Kweniso lingamupembuzgani na kumuzgorani mafumbo agha:

• Chifukwa wuli tikusuzgika?

• Ntchivichi chingatovwira kuti tilimbane na masuzgo?

• Kasi banja lithu lingaŵa lakukondwa?

• Kasi chikuchitika ntchivichi para munthu wafwa?

• Kasi ŵabwezi ŵithu awo ŵali kufwa tizamuŵawonaso?

• Ntchivichi chingatovwira kuti tigomezge kuti Chiuta wazamuchita nadi ivyo wali kulayizga?

Pakuti mukuŵerenga buku ili, mwalongora kuti mukukhumba kumanya ivyo Baibolo likusambizga. Buku ili limovwiraninge chomene. Muwonenge kuti ndime zili na mafumbo. Ivi vimovwiraninge kuti mupulikiske Baibolo. Ŵanthu ŵanandi ŵakukondwa para ŵakusambira Baibolo na Ŵakaboni ŵa Yehova. Tikugomezga kuti namwe mukondwenge. Yehova wamutumbikani apo mukusambira ivyo Baibolo likusambizga.