Mazgu Ghakwamba

Buku la Malemba Ghakovwira pa Umoyo Withu Wachikhristu limovwiraninge kuti musange luŵiro mavesi kweniso nkhani za mu Baibolo izo zingamovwirani kuti mumalane na masuzgo agho mukukumana nagho. Limovwiraningiso kuti musange malemba ghakudunjika agho mukukhumba kuti movwire na kukhozga ŵanji kuti ŵasankhe vinthu mwamahara na kuchindika Yehova. Sankhani nkhani iyo mukukhumba. Pa nkhani yiliyose pali mafumbo kweniso mazgu ghachoko waka agho ghakulongosora nkhani ya mu Baibolo, ivyo vingamovwirani kuti muyipulikiske. (Wonani bokosi lakuti “Umo Mungagwiliskira Ntchito Buku Ili.”) Musangenge malemba kweniso nkhani izo zingamovwirani kusanga ulongozgi, fundo kweniso izo zingamukhozgani. Limovwiraningiso kuti musange luŵiro malemba agho mungawovwilira ŵanthu mwauzimu kweniso ulongozgi uwo ungaŵawovwira kuti ŵamarane na masuzgo ghawo.

Umo Mungagwiliskira Ntchito Buku Ili

Kuti musange nkhani, lembani waka nkhani iyo mukukhumba pa kabokosi kakupenjera nkhani. Buku la Malemba Ghakovwira pa Umoyo Withu Wachikhristu lagaŵika mu vigaŵa 7. Vigaŵa ivi ni: Masuzgo, Nkharo, Mpingo, Umoyo wa Zuŵa na Zuŵa, Banja, Umoyo Wauzimu kweniso Mikhaliro. Nkhani zinandi izo mupenjenge muzisangenge mu vigaŵa ivi. Sankhani chigaŵa na kupenja nkhani iyo mukukhumba. Usange mukumanya makora yayi kuti nkhani iyo mukukhumba yingasangika pa chigaŵa wuli, mbwenu penjani waka pa vigaŵa vyose m’paka muyisange nkhani iyo mukukhumba. Mu nkhani yiliyose, musangenge tumitu panji mafumbo ghafipa chomene. Muli mafumbo kweniso mazgu agho ghakulongosora nkhani. Para mukuŵazga mavesi gha malemba ghafipa chomene agho ghali pa fumbo panji kamutu, mughanaghanirengepo chomene umo vesi ilo likukhozgera fundo panji kuzgora fumbo ilo lilipo. Mu vigaŵa vinyake, mitu yagaŵika mu tuvigaŵa tuchokotuchoko kuti vimovwirani kusanga luŵiro nkhani iyo mukupenja. Nyengo zinyake musangengeso malemba ghakuti “Wonaniso.” Malemba agha ghakukolerana na nkhani iyo yilipo. Pafupifupi pa nkhani yiliyose, musangengepo kamutu kakuti “Viyelezgero vya mu Baibolo ivyo vingamovwirani.” Ndipo pasi pa kamutu aka, paliso mazgu agho ghakulongosora fundo yikuru panji iyo tikusambirapo pa mavesi agho. Mazgu agha ghamovwiraninge kuti mupulikiske makora mavesi agho mukuŵazga.

Nangauli pa nkhani yiliyose pali malemba, kweni pali malemba ghose yayi yakukhwaskana na nkhani iyo mukukhumba. Kweni buku ili lalembeka munthowa yakuti limovwirani kusanga malemba agho ghakulongosora fundo zikuru za nkhani iyo mukukhumba. (Zi 2:1-6) Kuti musange fundo zakusazgikira, wonani malemba agho ghali pa kamuzere kapakati pa pepara lililose la Baibolo la Malemba Ghakupatulika mu Mang’anamuliro gha Charu Chiphya. Kuti mupulikiske makora ng’anamuro la vesi ilo mukuŵazga, wonani Buku Lakupenjera Nkhani la Ŵakaboni ŵa Yehova. Wonaniso mabuku agho ghafuma sonosono agho ghakulongosora nkhani panji lemba ilo mukukhumba, kuti mumanye umo tikupulikiskira nkhani iyo pasono.

Mphanyi buku ili lamovwirani kuti muŵe ŵavinjeru, mumanye unenesko kweniso kuti mupulikiske makora Malemba Ghatuŵa. Apo mukugwiliskira ntchito buku ili, mukhorwenge nadi kuti “mazgu gha Chiuta ngamoyo na ghankhongono.”—Heb 4:12.