Kasi Tikukhumbikwira Mesiya?

NAMWE mungafumba kuti, “Kasi tikukhumbikwira Mesiya?” Nchamahara kujifumba usange Mesiya ngwakukhumbikwa nadi kwa imwe.

Ŵanji awo mukuŵamanya kuti mbamahara ŵangamuphalirani kuti zgoro ka ndakumanyikwa kale: Mose umo vingaŵira Mesiya ngwakukhumbikwa kwa imwe, na kwa waliyose waka. Kale munthu munyake wakumanya makora dango la Ŵayuda wakalemba za Mesiya kuti: “Umo viliri vinandi vilayizgano vya Ciuta, mwa Iyo muli eya.” Munthu uyu wakalongosora kuzirwa kwa Mesiya pakukolerana na khumbo la Mlengi la kutumbika mitundu yose ya ŵanthu pa caru ca pasi. (2 Ŵakorinte 1:20) Nchito ya Mesiya njakuzirwa comene, mwakuti kwiza kwake na umoyo wake yikaŵa nkhani yikuru ya ucimi wa Baibolo. Mu buku lake ilo laŵazgika na ŵanthu vilimika vyakujumpha 70, Henry H. Halley wakalemba kuti: “Tesitamenti la Kale likalembeka kuti ŵanthu ŵaŵe na cilindizga na kunozga nthowa ya kwiziramo [Mesiya].” Kweni kasi nchakukhumbikwa kuti Mesiya wize? Nchifukwa wuli imwe mukwenera kukhwaskika?

Lizgu lakuti “Mesiya,” ilo likung’anamura “Wakuphakazgika” likuyana waka na lakuti “Khristu.” Buku la Encyclopædia Britannica, ilo likalembeka mu 1970 likulongora kuti Mesiya ni “muponoski wanadi,” ndipo wakenera kwiza cifukwa ca ubudi wa Adamu na Heva. Adamu na Heva ŵakalengeka ŵarunji, na cilindizga ciwemi ca kukhala na umoyo wamuyirayira mu Paradiso, kweni mwaŵi uwu ŵakawutaya. Mungelo wakugaruka, uyo wakazgoka Satana Dyabulosi, wakaŵapusika kuti Mlengi wawo ngwakunonopeska vinthu comene, na kusacizga kuti cingaŵa ciwemi para ŵangajisankhiranga ŵekha ico nchiwemi na ciheni.—Genesis 3:1-5.

Heva wakapusikika ndipo wakawugomezga utesi uwu. Adamu wakwenera kuti wakakhumba kukhalilira na muwoli wake kuluska kugomezgeka kwa Ciuta, ndipo nayo wakakolerana na cigaruka ca Dyabulosi. (Genesis 3:6; 1 Timote 2:14) Vyakucita vyawo vikaŵatayiska mwaŵi wa kukhala na umoyo wa muyirayira mu paradiso. Kweniso ŵana ŵawo ŵakamburako kwananga na njombe yake nyifwa.—Ŵaroma 5:12.

Mlengi withu Yehova, mwaluŵiro wakasankha nthowa yakuwombolera ŵanthu ku njombe yiheni ya cigaruka ico cikacitika. Dango la Mozesi la kulipira mwakuyana ndendende na ico canangika, ndiyo yikaŵa nthowa yakuti Mlengi wawombolere ŵanthu. (Duteronome 19:21; 1 Yohane 3:8) Dango ili likenera kufiskika dankha mwakuti ŵa mphapu ya Adamu na Heva ŵazakaŵe na umoyo wa muyirayira mu paradiso pa caru capasi, nga umo likaŵira khumbo la Mlengi. Ici cikutilongozgera kwa Mesiya.

Pakupeleka ceruzgo kwa Dyabulosi, mu ucimi wakwamba wa mu Baibolo Yehova Ciuta wakati: “Tindiŵike cimphindikwa pakati pa iwe na mwanakazi, na pakati pa mphapu yako na mphapu yake; tiyibwanyenge mutu wako, iwe tiulumenge citende cake.” (Genesis 3:15) Mwanalume munyake wakusanda Baibolo wakati: “Malemba ghakulongosora za malayizgano gha Mesiya, ghakamba na nkhani [yeneiyi].” Munyakeso wakayowoya kuti Mesiya ni nthowa ya Ciuta “yakuwombolera ŵanthu ku zakwananga,” na kupeleka vitumbiko ku ŵanthu.—Ŵahebere 2:14, 15.

Pasono pano mungawona kuti ŵanthu mbakutumbikika yayi. M’malo mwake ŵanthu ŵali na masuzgo kwambura cilindizga cakuti ghangamara. Ndico cifukwa The World Book Encyclopedia likuti: “Ŵayuda ŵanandi ŵacali kulindizga Mesiya kuti wizenge” na “kuzakanozga vinthu na kuthereska ŵalwani ŵawo.” Kweni Baibolo likuti Mesiya wali kwiza kale.