Ŵakuzika Ŵazamuhara Caru

“Nkhughanaghana kuti caru cizamusintha na kuŵaso ciwemi. . . . Kuti ni namacero namulenji yayi, kweni kunthazi, peneapo kuzamuŵa macanya ghaphya na caru capasi ciphya.”—Jean-Marie Pelt, nkhwantha ya ku France yakusanda vya cilengiwa.

PAKUWONA umo cilengiwa kweniso umo vinthu vikunangikira mu caru, ŵanandi ŵangatemwa kuzakawona caru capasi cikusintha kuzgoka paradiso. Khumbo ili kuti nda sono yayi. Kumanyuma uku, Baibolo likalayizga kuti paradiso wazamuwelerapo pa caru capasi. Mazgu gha Yesu ghakuti ‘ŵakuzika ŵazamuhara caru’ na “khumbo linu licitike pano pasi, nga nkhucanya,” ngamoza mwa mavesi ghakumanyikwa comene mu Malemba. (Mateyu 5:5; 6:10) Ndipouli, lero ni wose yayi awo ŵakugomezga kuti pa caru capasi pazamuŵa paradiso umo muzamukhala ŵakuzika. Kwa ŵanandi awo ŵakuti Mbakhristu, Paradiso wali kuzgeŵa.

Magazini ya sabata yiliyose ku France ya La Vie yikalongosora cifukwa ico cigomezgo ca paradiso kwali mpha caru capasi panji kucanya cili kulekekera, comene mu Cisopo ca Katolika. Yikuti: “Cisambizgo ca paradiso cati casambizgika na Ŵakatolika kwa vilimika pafupifupi 1900, lero cisambizgo ici cikusangikaso yayi mu visambizgo vyawo, kwali mpha visopo vya pa Sabata, masambiro gha ku seminale, na makalasi gha katekisima.” Lizgu lakuti paradiso likuyowoyeka kuti liri kubisama mu “matutu,” ‘ndakusuzga kulipulikiska, ndiposo ndakuhangayiska.’ Ŵaliska ŵanji ŵakuligega lizgu ili cifukwa “likulongora kuti vitumbiko ivi vizamuŵa pa caru capasi.”

Frédéric Lenoir, uyo ni nkhwantha yakusanda vya kacitiro ka ŵanthu, comene mu visopo, wakati maghanoghano gha paradiso “ngaunenesko yayi.” Mwakuyana waka, Jean Delumeau, wakumanya mdauko kweniso uyo wakalemba mabuku ghanandi gha nkhani za paradiso, wakughanaghana kuti vilayizgo vya mu Baibolo vizamufiskika nadi yayi. Wakalemba kuti: “Pakuzgora fumbo lakuti, ‘Nchivici cakhala ku Paradiso?’ cipulikano ca Ŵakhristu cikulutilira kuzgora kuti: Cifukwa cakuti Mponoski wakawuka, zuŵa limoza tose tizamukolerana na kuwona ivyo tikalindiliranga vikufiskika.”

Kasi uthenga wa paradiso pa caru capasi ucali wakwenelera? Kasi nchivici ico casungikira caru cithu kunthazi? Kasi mboniwoni ya kunthazi yili kuleka kuwoneka makora, panji njakuti yingawoneka? Nkhani yakulondezgapo yili na mazgoro gha mafumbo agha.