Kasi Paradiso Uyo Wakuyowoyeka mu Baibolo Wali Nkhu? — LAYIBULARE YA PA INTANETI ya Watchtower

Ŵaŵazgi Ŵithu Ŵakufumba Kuti . . .

Kasi Paradiso Uyo Wakuyowoyeka mu Baibolo Wali Nkhu?

▪ Pakulayizga munthu uyo wakalongora cipulikano mwa iyo, uyo wakaŵa pafupi kufwa, Yesu wakati: “Uzamuŵa na ine mu Paradiso.” (Luka 23:43) Kasi mwanalume uyu wazamuŵa nkhu? Kasi Paradiso uyu wazamuŵa kucanya, pa caru capasi, panji ku malo ghanyake uko ŵanthu ŵakulindilira ceruzgo?

Ŵapapi ŵithu ŵakwambilira ŵakakhalapo mu Paradiso. Baibolo likutiphalira kuti “Yehova Ciuta wakapanda munda mu Edeni, ku mafumiro gha dazi; mwenemumo ndimo wakaŵika munthu uyo wakamuwumba. Yehova Ciuta wakatora munthu uyo, wakamuŵika mu munda wa Edeni kuti walimenge na kuwusungilira.” (Genesis 2:8, 15) Apo vesi ili likang’anamurikanga kuluta mu Cigiriki, mazgu ghakuti “munda” ghakang’anamulika kuti pa·raʹdei·sos, ndipo ndiko kuli kufuma lizgu la Citumbuka lakuti “paradiso.”

Mbumba yikusazgirako malo ghakukhala para yamba kukura, ŵapapi ŵithu ŵakwambilira nawo ŵakeneranga kusazgirako paradiso panji kuti munda wa Edeni para ŵanthu ŵandana. Ciuta wakaŵaphalira kuti: “Muzuzge caru, mucithereske.”—Genesis 1:28.

Cilato ca Mlengi withu cikaŵa cakuti ŵanthu ŵakhale mu Paradiso pa caru capasi na kubaba ŵana. Ŵanthu ŵakeneranga kukhala mu Paradiso pa caru capasi kwamuyirayira. Caru cikeneranga kuŵa cikaya ca munthu kwamuyirayira. Lekani nchambura kuzizika kuti caru cithu cili kuzura na vinthu vinandi vyakukondweska. Tikalengeka kuti tikhale kwamuyirayira pa caru cakutowa ici.

Kasi cilato ca Ciuta cili kusintha? Cindasinthe. Ciuta wakutisimikizgira kuti: “Mazgu ghane agho ghakufuma mu mulomo wane; ntha ghawelerenge waka kwa Ine, kweni tighafiske ico nkhuca naco.” (Yesaya 55:11) Vilimika 3,000 vikati vyajumpha kufuma apo munthu wakalengekera, Baibolo likati “Uyo wakawumba caru na kucicita, kuti wakacilenga waka cara,” kweni “wakaciwumba kuti ciŵenge cakukhalamo.” (Yesaya 45:18) Khumbo la Ciuta lindasinthe. Caru cizamuŵaso paradiso.

Cakukondweska nchakuti mavesi ghanandi mu Baibolo para ghakuyowoya za Paradiso ghakulongosora umo umoyo uzamuŵira pa caru capasi. Mwaciyelezgero, ucimi wa Yesaya ukuti: “Ŵanthu ŵane tiŵazenge nyumba na kukhalamo; tiŵapande mpheska na kurya vipasi.” (Yesaya 65:21) Kasi nyumba zikuzengeka nkhu? Ni nkhu uko ŵakupanda mpheska? Ni nkhu uko ŵakurya vipambi? Mpha caru capasi. Lemba la Zintharika 2:21 likuti: “Ŵakunyoloka tiŵakharenge mu caru.”

Yesu nayo wakayowoyapo za Paradiso wa pa caru capasi. Mbunenesko kuti wakayowoyaposo za umoyo wakucanya, kweni mbacoko waka awo ŵamusangwa na umoyo uwu. (Luka 12:32) Ŵanthu aŵa para ŵafwa ŵakuwuskikira kucanya kuti ŵakawusire lumoza na Khristu. (Uvumbuzi 5:10; 14:1-3) Ŵanthu awo ŵamuwusa na Yesu ŵazamuwoneseska kuti mu Paradiso pa caru capasi vinthu vikwenda makora kuyana na malango gha Ciuta.

Yesu wakamanyanga kuti ici ndico Ciuta wakalengera caru capasi. Nakuti iyo wakaŵa kucanya pamoza na Awiske apo munda wa Edeni ukalengekeranga. Munthu waliyose uyo wakulongora cipulikano wali na mwaŵi wa kuzakakhala mu paradiso pa caru capasi. (Yohane 3:16) Ŵanthu ŵanthena, Yesu wakuŵalayizga kuti: ‘Muzamuŵa na ine mu Paradiso.’—Luka 23:43.

[Kulongosora Cithuzithuzi pa peji 15]