Kasi Chiuta Wachitengechi na Charu Ichi?

1. Chifukwa wuli Chiuta wakalenga charu chapasi?

Chiuta wakapeleka charu ku ŵanthu, ŵanalume na ŵanakazi wuwo. Ichi ntchikaya chithu. Ntheura Adamu na Eva ŵakalengeka kuti ŵababe ŵana mwakuti ŵalute kuchanya yayi. Kuchanya kukaŵa kale ŵangelo. (Yobu 38:4, 7) Chiuta wakatora munthu wakwamba na kumuŵika mu paradiso muwemi wakuchemeka munda wa Edeni. (Genizesi 2:15-17) Khumbo la Yehova likaŵa lakuti Adamu na ŵana ŵake ŵakhale mu charu kwamuyirayira.​—Ŵazgani Salimo 37:29; 115:16.

Pakwamba, munda wa Edeni pera ndiwo ukaŵa paradiso. Chilato chikaŵa chakuti mwanalume na muwoli wake ŵababe ŵana, kuzuzga charu chose chapasi, na kuchizgora paradiso. (Genizesi 1:28) Charu chiparanyikenge yayi. Ichi ntchikaya cha ŵanthu kwamuyirayira.​—Ŵazgani Salimo 104:5.

Wonelerani vidiyo yakuti Chifukwa Wuli Chiuta Wakalenga Charu?

2. Chifukwa wuli charu chapasi ni paradiso yayi?

Adamu na Eva ŵakamupulikira yayi Chiuta, lekani Yehova wakaŵafumiskamo mu munda. Paradiso wakamalira papo, ndipo ŵanthu ŵatondeka kumuwezgerapo. Baibolo likuti: “Charu chapasi chapelekeka kwa muheni.”—Job 9:24.​—Ŵazgani Genizesi 3:23, 24.

Kasi Chiuta wali kutondeka kufiska khumbo lake? Yayi. Iyo ngwankhongonozose. Wangatondeka yayi. (Yesaya 45:18) Wachitenge vyose ivyo wakanozgera ŵanthu pakwamba.​—Ŵazgani Salimo 37:11, 34.

3. Kasi Paradiso wazamuwelerapo wuli?

Para Yesu wamba kuwusa, wazamuwezgerapo Paradiso. Pa nkhondo yakuchemeka Haramagedoni, wazamudangilira ŵangelo kuparanya wose awo ŵakususka Chiuta. Kufuma apo, Yesu wazamukaka Satana vilimika 1,000. Ŵanthu ŵa Chiuta ŵazamupona pharanyiko ili chifukwa Yesu wazamuŵadangilira na kuŵavikilira. Ŵazamukondwa kwamuyirayira mu Paradiso pa charu chapasi.​—Ŵazgani Chivumbuzi 20:1-3; 21:3, 4.

4. Kasi masuzgo ghamalenge pawuli?

Kasi Chiuta wazamumazga pawuli masuzgo pa charu chapasi? Yesu wakayowoya “chimanyikwiro” chakulongora apo umaliro wizirenge. Usange ivyo vikuchitika mazuŵa ghano vingalutilira, pangaŵavya kawemi, lekani tikumanya kuti “umaliro wa charu” wasendelera.​—Ŵazgani Mateyu 24:3, 7-14, 21, 22.

Mu vilimika 1,000 ivyo Yesu wazamuwusa charu chapasi, wazamumazga masuzgo ghose. (Yesaya 9:6, 7; 11:9) Padera pa kuŵa Themba, Yesu wazamuŵa Musofi Mukuru, ndipo wazamugowokera zakwananga za wose awo ŵakutemwa Chiuta. Ntheura, mwa Yesu, Chiuta wazamumazga matenda, uchekuru, na nyifwa.​—Ŵazgani Yesaya 25:8; 33:24.

5. Kasi mbanjani ŵazamuŵa mu Paradiso?

Awo ŵakupulikira Chiuta ndiwo ŵazamuŵa mu Paradiso. (1 Yohane 2:17) Yesu wakatuma ŵasambiri ŵake kukapenja awo mbakuzika na kuŵasambizga umo ŵangachitira kuti ŵatemweke na Chiuta. Mazuŵa ghano, Yehova wakusambizga ŵanthu ŵanandi mwakuti ŵaŵe ŵakwenelera kuzakaŵa mu Paradiso pa charu chapasi. (Zefaniya 2:3) Ku Nyumba za Ufumu za Ŵakaboni ŵa Yehova, ŵanalume ŵakusambira umo ŵangachitira makora na ŵawoli kweniso ŵana ŵawo. Ŵanakazi ŵakusambira umo ŵangachitira na ŵafumu kweniso ŵana ŵawo. Ŵapapi na ŵana ŵakusopera pamoza, ndipo ŵakusambira umo ŵangasangira chandulo na uthenga uwemi.​—Ŵazgani Mika 4:1-4.