“Cifukwa ca Munyamata wa Vilimika Vinkhondi na Vinayi”

NYENGO yiliyose apo Ŵakaboni ŵa Yehova ŵakizanga pa nyumba yake, Wiesława uyo wakukhala kumwera kwa Poland, wakaŵawonganga na kuŵaphalira kuti ŵajumphilire. Zuŵa linyake, mwana wa vilimika vinkhondi na vinayi, Samuel, wakiza ku nyumba ya Wiesława pamoza na amama ŵake. Panyengo iyi Wiesława wakaghanaghana kuti wapulikizge uthenga wawo ndipo wakapokera magazini yakulongosora za paradiso pa caru capasi.

Cifukwa cakuti Cikumbusko ca nyifwa ya Yesu Khristu cikaŵa pafupi kucitika, Samuel wakakhumba kuti wakamuceme Wiesława kuti wize ku ungano wapadera uwu. Ntheura, mwakulongozgana na amama ŵake, munyamata uyu wakalutaso ku nyumba ya Wiesława ndipo pa ulendo uwu, wakamuyeghera kapepala kakumucemera ku Cikumbusko. Wati wawona kuti munyamata uyu wavwara makora, Wiesława wakaŵaphalira kuti ŵalindilire dankha pacoko waka ndipo wakaluta mu nyumba kukavwara vyakuvwara viwemi. Wakati wizaso, wakapulikizga uthenga wa Samuel, ndipo wakapokera kapepala kara. Wati wapokera wakafumba kuti: “Kasi nizakize nekha panji na afumu ŵane?” Ndipo wakasazgirapo kuti: “Nanga afumu ŵane ŵangaleka kwiza, ine nizamwiza. Nizamwiza cifukwa ca iwe Samuel.” Kuti wakondweske Samuel, iye wakiza nadi.

Panyengo iyo nkhani ya Cikumbusko yikayowoyekanga, Samuel wakakhala pafupi na Wiesława ndipo wakamulongoranga malemba agho ghakaŵazgikanga. Ici cikamutora mtima. Wakakondwa na Cikumbusko ndipo wakaŵa wakuwonga comene cifukwa cakuti visambizgo vyakusuzga kuvipulikiska vikalongosoreka mu mazgu ghapusu. Cinyakeso ico cikapangiska kuti watoreke mtima nchakuti ŵakamupokelera makora ndiposo uwemi uwo mpingo ukalongora. Kuyambira penepapo, Wiesława wakuzirwiska vinthu vyauzimu ndipo wakuwungana na Ŵakaboni ŵa Yehova nyengo zose. Sonosono apa wakayowoya kuti: “Nili na citima cifukwa pakwamba nkhakana kumutegherezgani apo mukiza ku nyumba yane. Ndipo nkhwenera kuzomerezga kuti nkhapulikizga uthenga winu cifukwa ca munyamata wa vilimika vinkhondi na vinayi, Samuel.”

Nga ni Samuel ku Poland, ŵana ŵanandi ŵa Ŵakaboni ŵa Yehova ŵakulumba Ciuta mwa kupharazga kweniso mwa kuŵa na nkharo yiwemi. Usange ndimwe muwukirano namwe mungawovwira ŵanthu awo ŵakukhumba kumanya unenesko kuti ŵambe kutemwa vinthu vyauzimu.