Imwe Mukuti ni Nju Munthu Wakukondwa?

ŴANTHU ŵakatenge Jesse Livermore wakamanyanga makora vya kendeskero ka cuma ndipo wakaŵa wakukondwa. Wakamanyikwa kuti wakasankhanga makora nthowa zakwendeskera bizinesi. Ntheura wakasambazga comene. Wakavwaranga suti ziwemi comene zakusoneka pa mawoko, wakakhalanga mu nyumba ya vipinda 29 yakutowa comene, kweniso dirayivara wake wakamwendeskanga pa galimoto yapacanya nkhanira.

Davida nayo wakakhumbanga kuti waŵe musambazi nga ni munthu uyo wazunurika pacanya apa. Pakuŵa waciŵiri kwa pulezidenti kweniso bwana mulara wa kampani ya vyakujamburajambura, wakaŵa pafupi kuti waŵe pulezidenti wa cigaŵa cinyake ca kampani iyi. Wakakopeka na vyuma kweniso kupika nchindi. Ndipouli, David wakaghanaghana kuti waleke nchito yake. David wakati: “Nkhumanya makora kuti nizamuyisangaposo cara nchito yapacanya nga ni iyi.” Kasi mukughanaghana kuti David wakaŵavya vinjeru?

Ŵanandi ŵakugomezga kuti kukondwa nkhuŵa na vyuma, kumanyikwa panji kuzirwa. Ndipouli, awo mbasambazi ŵangaŵa kuti ŵacali kukweŵeka maghanoghano kweniso ŵangawona kuti umoyo ulije ng’anamuro ndiposo cilato. Ivyo vikacitikira Livermore mbukaboni wa fundo iyi. Nangauli wakaŵa musambazi, wakadandauranga nyengo zose pa umoyo wake, masuzgo ghakamaranga yayi ndipo wakaŵa wacitima. Wakasuzgikanga maghanoghano, nthengwa yake yikaŵa yakuwayawaya, kweniso wakapulikananga yayi na ŵana ŵake. Paumaliro, wati wawona kuti vinthu vyose vikaŵa viheni, Livermore wakaluta ku malo ghakumwera moŵa mu hotelo yapacanya comene ndipo wakaghanaghana comene za masuzgo ghake. Wakagura moŵa wake, wakatora notibuku na kulemba mazgu ghakulayira muwoli wake. Wati wamara kumwa moŵa, wakaluta ku cipinda cakusungirako katundu uko magesi ghakaŵaranga pacoko na kujikoma na futi.

Nangauli pangaŵa vifukwa vinandi ivyo vikapangiska kuti wajikome, kweni cakucitika ici cikulongora kuti mazgu gha mu Baibolo agha ngaunenesko: ‘Awo ŵakukhumba kusambazgika . . . ŵakujilasa na vitima vinandi.’—1 Timote 6:9, 10.

Kasi panyake awo ŵakuti munthu wakukondwa ni uyo wali na vyuma, wali na udindo ukuru, panji wakuzirwa, ŵakuwona uheni? Kasi imwe mukujiwona kuti muli ŵakukondwa? Usange ni nthena cifukwa wuli? Kasi mukumanyira vici? Mukuwonera vici kuti muti munthu uyu ngwakukondwa? Nkhani yakulondezgapo yikulongosora ulongozgi wakugomezgeka uwo wapangiska kuti ŵanthu ŵanandi comene ŵaŵe ŵakukondwa. Tiyeni tiwone umo namwe mungaŵira ŵakukondwa nadi.

[Mazgu ghamusi]