Sambizgani Ŵana Ŵinu

Timote Wakaŵa Wakunozgeka Ndiposo Wakunweka Kuteŵetera Ciuta

“KASI wanozgeka?” Kasi uli kufumbikapo fumbo ili?— Munthu uyo wangakufumba fumbo ili wakukhumba kumanya usange ndiwe wakunozgeka. Mwaciyelezgero, wangang’anamura kuti: ‘Kasi uli nagho mabuku ghakuŵazga? Kasi waŵazga ivyo usambirenge?’ Nga ni umo tiwonerenge, Timote wakaŵa wakunozgeka.

Timote wakaŵaso wakunweka kuteŵetera Ciuta. Kasi tikumanya wuli?— Apo Timote wakacemeka kuti wateŵetere Ciuta, iyo wakalongora mtima wakuyana na muteŵeti munyake wa Ciuta, uyo wakayowoya kuti: “Ndine pano; nditumani.” (Yesaya 6:8) Cifukwa cakuti Timote wakaŵa wakunozgeka ndiposo wakunweka kuteŵetera Ciuta, wakasangwa comene na umoyo. Kasi ungatemwa kumanya makora nkhani ya Timote?—

Timote wakababikira ku Lustra, uko nkhutali comene na Yerusalemu. Agogo ŵake a Loisi na amama ŵake a Yunike ŵakasambiranga Malemba. Pa nyengo iyo Timote wakaŵa kabonda, amama ŵake na agogo ŵake ŵakamba kumusambizga Mazgu gha Ciuta.—2 Timote 1:5; 3:15.

Vikuwoneka kuti Timote wakaŵa wacali munyamata, apo Paulosi na Barnaba ŵakiza kakwamba kuzakapharazga ku Lustra. Pa nyengo iyi amama ŵa Timote na agogo ŵake ŵakwenera kuti ŵakaŵa Ŵakhristu. Kasi ungatemwa kuti upulike masuzgo agho Paulosi na Barnaba ŵakukumana nagho?— Ŵanthu awo ŵakatinkhanga Ŵakhristu ŵakamudinya Paulosi na malibwe, ŵakamuwiskira pasi na kumuguguzira kuwaro kwa msumba. Iwo ŵakaghanaghananga kuti wafwa.

Ŵanthu awo ŵakagomezganga ivyo Paulosi wakasambizganga ŵakiza apo wakagona, ndipo Paulosi wakawuka. Namacero ghake Paulosi na Barnaba ŵakafuma mu msumba wa Lustra. Kweni nyengo yicoko waka yikati yajumphapo, ŵakaweleraso ku Lustra. Ŵati ŵafika mu Lustra, Paulosi wakaphalira ŵasambiri kuti: “Na visuzgo vinandi kukwenelera ise kunjira mu Ufumu wa Ciuta.” (Milimo 14:8-22) Kasi ukumanya ivyo Paulosi wakang’anamuranga?— Iyo wakang’anamuranga kuti ŵanthu ŵanyake ŵazamusuzganga awo ŵakuteŵetera Ciuta. Nyengo yikati yalutapo, Paulosi wakalembera kalata Timote kuti: ‘Wose awo ŵakukhumba kuŵa na nkharo yakukondweska Ciuta ŵazikizgikenge.’—2 Timote 3:12; Yohane 15:20.

Paulosi na Barnaba ŵakati ŵafumako ku Lustra, ŵakawelera kukaya kwawo. Pakati pajumpha myezi yicoko waka, Paulosi wakasankha Sila kuti wayendenge nayo. Wose ŵakaluta ku vigaŵa ivyo Paulosi wakapharazgako pakwambilira. Cilato ca ulendo wawo cikaŵa ca kukhozga ŵasambiri ŵaphya. Ŵakati ŵafika ku Lustra, Timote wakakondwa comene kuwonanaso na Paulosi. Timote wakakondwaso comene apo wakapempheka kuti wendenge lumoza na Paulosi na Sila. Iyo wakazomera pakuti wakaŵa wakunozgeka ndiposo wakunweka kuluta.—Milimo 15:40–16:5.

Paulosi, Sila na Timote ŵakenda mtunda utali comene ndipo pamanyuma ŵakakwera boti. Ŵakati ŵafuma mu boti, ŵakaluta ku Tesalonika. Ŵanthu ŵanandi ŵakazgoka Ŵakhristu mu Tesalonika. Kweni ŵanyake ŵakakwiya comene ndipo ŵakambiska civulupi. Umoyo wa Paulosi, Sila na Timote ukaŵa pangozi, antheura iwo ŵakaluta ku Bereya.—Milimo 17:1-10.

Paulosi wakafipira mtima Ŵakhristu ŵaphya ŵa mu Tesalonika, antheura wakatuma Timote kuti waluteso. Kasi ukumanya cifukwa cake?— Pamanyuma pake Paulosi wakayowoya cifukwa ico wakatumira Timote. Paulosi wakaphalira Ŵakhristu ŵa ku Tesalonika mazgu agha: ‘Kuti wamukhozgani na kumusanguluskani kuti paŵavye munthu wagongoweskeke.’ Kasi ukumanya cifukwa ico Paulosi wakatumira Timote kuti wacite mulimo wakofya wanthena uwu, pakuti pa nyengo iyi wakaŵa wacali mucoko?— Timote wakamanyikwanga viŵi yayi ku ŵanthu ŵakususka, nakuti iyo wakaŵa wakunweka kuluta. Kuti wacite mulimo uwu, Timote wakakhumbikwiranga kuŵa na cikanga. Kasi vinthu vikamwendera wuli? Apo Timote wakawelera kwa Paulosi, wakamuphalira umo Ŵakhristu ŵa ku Tesalonika ŵakaŵira ŵakugomezgeka. Cifukwa ca lipoti liwemi ilo wakapulika, Paulosi wakalembera kalata Ŵakhristu ŵa ku Tesalonika kuti: ‘Tikasanguluskika mwa imwe.’—1 Ŵatesalonika 3:2-7.

Timote wakateŵetera lumoza na Paulosi kwa vilimika vinyake 10. Pamanyuma Paulosi wakajalirika mu jere ku Roma, ndipo Timote wakaluta kukakhala nayo nangauli wakaŵa kuti wafuma waka mu jere. Apo wakaŵa mu jere, Paulosi wakalembera kalata Ŵakhristu ŵa ku Filipi. Vikuwoneka kuti Timote ndiyo wakamulemberanga kalata iyi. Paulosi wakati: ‘Nkhugomezga kumutumirani Timote, cifukwa nilije munyake wakugomezgeka nga ni iyo ndipo wazamumuteŵeterani makoraghene.’—Ŵafilipi 2:19-22; Ŵahebere 13:23.

Mazgu agha ghakamukondweska comene Timote. Paulosi wakamutemwa comene Timote cifukwa cakuti wakaŵa wakunozgeka ndiposo wakunweka kuteŵetera Ciuta. Tili na cigomezgo kuti nawe ndimo ucitilenge.

Mafumbo:

○ Kasi Timote wakakulira nkhu, ndipo nchivici cikacitika apo Paulosi wakiza kakwamba kukwawo kwa Timote?

○ Nchivici ico Timote wakacita apo wakapempheka kuti wenderenge lumoza na Paulosi na Sila?

○ Kasi Timote wakalongora wuli cikanga, ndipo nchifukwa wuli Paulosi wakamutemwa comene?

[Cithuzithuzi pa peji 18]

Kasi nchivici cacitika?