Nkhamanya Kuzirwa kwa Umoyo

Pakaŵa pa Epulero 16, 2007. Apo nkhati nakhala pasi mu cipinda ca mcanya ca holo ya Norris pa sukulu ya Virginia Polytechnic Institute and State University, panji kuti Virginia Tech, nkhakumbuskikaso kuti zuŵa lililose tiwonenge kuti umoyo ngwakuzirwa.

Nkhaŵa mu ofesi yane, ndipo nkhanozgekeranga kuti nilute mu ofesi yinyake ya pasi kuti nkhatore makalata. Kukiza profesa, uyo wakanitora kuluta ku ofesi yake kuti nkhamunozgere kompyuta. Apo tikaŵa pafupi kunjira mu ofesi yake, tikapulika kulira kwa futi mu ofesi yinyake iyo yikaŵa pasi. Cifukwa ca kuleka kumanya ivyo vikacitikanga, tikanjira mwaluŵiro mu ofesi yake na kujalako, na kulindilira ivyo viticitikirenge. Nkhajifyatika pa kona, na kulomba Yehova Ciuta kuti wanilongozge.

Apo tikalindiliranga ivyo viticitikirenge, nkhakumbukira vinthu ivyo vikacitika vilimika 15 kumasinda apo nkhagwiranga nchito ya kunozga magalimoto. Mbale ya mafuta gha galimoto iyo yikaŵa mu mawoko gha munyane yikagolera. Cifukwa ca wofi, mwambura kumanya wakaniponyera kumaso uku moto ukugolera. Vijosi vikaninjira mu mphuno, ndipo nkhaphya kwambira kumutu mpaka mu ciwuno. Ŵakaninyamura pa ndege, na kuluta nane ku cipatala, ndipo ŵakanisunga mu wodi ya ŵalwari comene kwa myezi yitatu na hafu. Pakati pajumpha myezi yinkhondi, nkhamba kuŵako makora, ndipo nkhawelera ku nyumba. Nkhawonga kuti nkhawerako wamoyo. Ivyo vikacitika pa nyengo iyi vikanisambizga kuti zuŵa lililose niwonenge kuti umoyo ngwakuzirwa comene. Vikanikhuŵirizgaso kuti niteŵetere Yehova Ciuta, uyo wali kunipa umoyo.—Salmo 90:12; Yesaya 43:10.

Nkhaleka kugwira nchito ya kunozga magalimoto cifukwa nkhapwetekeka comene, ndipo nkhasambira vya makompyuta, na kunjira nchito ku Virginia Tech. Lekani pa nyengo iyo futi zikaliranga nkhaŵa mu holo ya Norris.

Apo futi zikalutilira kulira, tikamanyanga yayi kuti ŵanyithu awo ŵakaŵa mu cipinda ico cikaŵa pasi ŵakaŵa kuti ŵakomeka. Uyo wakalasanga wakakoma ŵanthu 32, pamasinda pake wakajikoma, ndipo futi zikaleka kulira. Pakati pajumpha maminiti 20 kufuma apo futi zikambira kulira, tikapulika congo ca ŵapolisi. Tikaŵacema ndipo ŵakatilongozgera ku malo ghacivikiliro.

Ivyo vikacitika zuŵa ili vikanisambizga kuti umoyo ngufupi comene ndipo nyengo yiliyose ungafwa. (Yakobe 4:14) Ipo nchakuzirwa comene kuti tigomezgenge Yehova Ciuta uyo ni Mupi wa umoyo, ndiposo kuti zuŵa lililose tiwonenge kuti umoyo nchawanangwa cakuzirwa comene cakufuma kwa iyo.—Salmo 23:4; 91:2.

[Credit Line on page 26]

AP Photo/The Roanoke Times, Alan Kim