Cipulikano Cikanovwira Kuzizipizga Masuzgo

Nga ni umo yikayowoyekera na Soledad Castillo

Kanandi waka pa umoyo wane mphanyi nkhasuzgikapo na phukwa. Mfumu wane wakafwa apo nkhaŵa na vilimika 34. Pakati pajumpha vilimika vinkhondi na cimoza, adada ŵakafwa. Myezi yinkhondi na yitatu yikati yajumphapo kufuma apo adada ŵakafwira, mwana wane wakasangika na nthenda yambura kucizgika.

ZINA lane ndine Soledad, ndipo zina ili likung’anamura “Phukwa.” Nangauli zina lane likung’anamura phukwa, kweni nindaŵepo na phukwa. Para nasangana na masuzgo, nkhawonanga nga ni para Yehova Ciuta ‘wanikora ku woko’ na kunovwira mwakuti nileke kopa. (Yesaya 41:13) Lekani nilongosore umo nkhazizipizgira masuzgo agho nkhakumana nagho, ndiposo umo ghakanovwilira kusendelera pafupi na Yehova.

Umoyo Uwemi, Masuzgo Ghacoko

Nkhababikira ku Barcelona mu caru ca Spain, pa Meyi 3, 1961. Ŵapapi ŵane, a José na a Soledad ŵakababa ndekha. Apo nkhaŵa na vilimika vinkhondi na vinayi, amama ŵakasambira Mazgu gha Ciuta. Ŵakaŵa na mafumbo ghanandi ghakukhwaskana na Baibolo kweni cisopa ico ŵakaŵamo cikaŵawovwira yayi kusanga mazgoro ghakukhorweska. Zuŵa linyake, Ŵakaboni ŵa Yehova ŵaŵiri ŵakiza panyumba, ndipo ŵakazgora mafumbo ghose agho amama ŵakaŵa nagho kufuma mu Baibolo. Amama ŵakazomera kusambira Baibolo.

Pakati pajumpha nyengo yicoko waka, amama ŵakabapatizika na kuŵa yumoza wa Ŵakaboni ŵa Yehova, ndipo vilimika vicoko waka vikati vyajumphapo adada nawo ŵakaŵalondezga. Eliana, uyo wakasambiranga nawo Baibolo wakawona kuti nkhaŵa wakunweka na Mazgu gha Ciuta. Nangauli nkhaŵa mwana mucoko, Eliana wakati wanisambizgenge panekha. Nkhabapatizika nili na vilimika 13 cifukwa cakuti wakanovwira ndiposo amama ŵakanikhuŵilizga.

Apo nkhaŵa muwukirano, nkhatemwanga kulomba kwa Yehova, comenecomene para nkhukhumba kusankha cakucita. Masuzgo nkhaŵanga nagho, kweni ghakaŵanga ghanandi yayi. Nkhaŵa na ŵabwezi ŵanandi mu mpingo, ndiposo nkhaŵa paubwezi uwemi na ŵapapi ŵane. Mu 1982 tikatorana na Felipe, uyo nayo wakaŵa yumoza wa Ŵakaboni ŵa Yehova, ndipo wakaŵa na vilato vyakuyana na vyane.

Kulera Mwana Withu Kuti Watemwe Yehova

Pakati pajumpha vilimika vinkhondi kufuma apo tikatolerana, nkhababa mwana mwanalume wakutowa comene, ndipo tikamuthya Saúl. Ine na mfumu wane tikakondwa comene kuti tasanga mwana. Tikaŵa na cigomezgo kuti Saúl wakulenge na nkhongono, ndiposo kuti watemwenge Ciuta. Ine na mfumu wane tikacezganga na mwana withu Saúl, tikamusambizganga za Yehova, tikalyeranga pamoza, kutembeya, ndiposo kuseŵera nayo. Saúl wakatemwanga kuluta na Felipe kukapharazga Mazgu gha Ciuta, ndipo para ŵali ku upharazgi, Felipe wakamupanga mwaŵi Saúl kuti walizgenge belu para ŵafika pa nyumba za ŵanthu, ndiposo kugaŵa mathirakiti.

Cifukwa ca kumutemwa ndiposo kumusambizga, Saúl wakakuranga makora. Apo wakaŵa na vilimika vinkhondi na cimoza, wakapharazganga nase nyengo zose. Wakatemwanga comene kutegherezga para tikumuŵazgira nkhani za mu Baibolo, ndipo wakakondwanga comene para tikusambira Baibolo mu mbumba yithu. Wakati wamba sukulu wakasankhanga vyakucita mwakuyana na ivyo Baibolo likuyowoya.

Kweni apo Saúl wakaŵa na vilimika vinkhondi na viŵiri, umoyo wa mbumba yithu ukasintha mwamabuci. Felipe wakamba kulwara nthenda ya mu maphapu. Wakasuzgika na nthenda iyi kwa myezi 11, wakatondekanga kugwira nchito, ndipo kanandi wakagonanga waka. Wakafwa apo wakaŵa na vilimika 36.

Para namukumbuka nkhulira. Apo wakatamburanga na ulwari nkhamuwonanga ndipo pakaŵavya cakuti nicite. Pa nyengo iyi, nkhayezgayezga kumukhozga, nangauli mu mtima wane cigomezgo cikamara. Para tatondeka kuluta ku maungano nkhamuŵazgiranga nkhani zakufuma mu Baibolo, ndipo zikatikhozganga comene. Wakati wafwa nkhawona kuti nataya munthu wakukhumbikwa comene.

Kweni Yehova wakanikhozga. Nyengo zose nkhamulombanga kuti wanipe mzimu wake. Nkhuwonga Yehova cifukwa cakuti tikakhalanga mwakukondwa na Felipe, ndiposo cifukwa ca cilindizga cakuti wazamuwuka. Nkhamulomba Ciuta kuti nileke kuluwa vinthu viwemi ivyo tikacitiranga lumoza na mfumu wane, ndiposo kuti wanipe vinjeru vyakusambizgira mwana withu mwakuti waŵe Mkhristu wanadi. Nangauli nkhaŵa na citima cikuru kweni nkhapembuzgika.

Ŵapapi ŵane ndiposo ŵabali ku mpingo ŵakanovwira comene. Ndipouli, nkhawona kuti nkheneranga kusambira Baibolo na Saúl kweniso kumovwira umo wangateŵetera Yehova. Uyo wakanilemba nchito pakwamba wakanipa nchito yiwemi ya mu ofesi, kweni nkhasankha yakutozga malo mwakuti niŵe na nyengo yinandi yakucezgera na Saúl para wawera ku sukulu.

Lemba limoza likanovwira kumanya kuzirwa kwa kusambizga Saúl nthowa za Yehova. Lemba ili likuti: “Lera mwana mu nthowa iyo wakwenera kwendamo, ndipo para wakura kuti wawukengemo cara.” (Zintharika 22:6) Lemba ili likanipa cigomezgo cakuti usange ningafwilirapo comene kusambizga Saúl vinthu vyauzimu, Yehova wanitumbikenge. Mbunenesko, nkhenera kujipata vinthu vinyake, kweni nkheneranga kuŵa na nyengo yinandi yakucezgera na mwana wane, ndipo ici cikaŵa cakuzirwa comene kwa ine kuluska cinthu cinyake cilicose.

Apo Saúl wakaŵa na vilimika 14, adada ŵakafwa. Citima cikamukora comene Saúl cifukwa nyifwa ya asekuru ŵake yikamukumbuska nyifwa ya adada ŵake. Adada nawo ŵakalongora ciyelezgero ciwemi comene pa kutemwa Yehova. Adada ŵakati ŵafwa Saúl wakawona kuti ndiyo wakaŵa mwanalume mu mbumba yithu, ndipo wakeneranga kupwelelera ine kweniso abuya ŵake.

Kulimbana na Khansa ya mu Ndopa

Pakati pajumpha myezi yinkhondi na yitatu adada ŵati ŵafwa, dokotara wakaniphalira kuti nilute na Saúl ku cipatala cifukwa cakuti wakapulikanga vyakulema comene. Ŵakati ŵamupima kanandi waka, ŵadokotara ŵakaniphalira kuti Saúl wakaŵa na khansa ya mu ndopa.a

Kwa vilimika viŵiri na hafu, Saúl wakalutanga ku cipatala kaŵirikaŵiri, ndipo wakatambulanga na khansa ndiposo na ulwilwi uwo ukiza cifukwa ca nthowa za kucizgira izo ŵadokotara ŵakagwiliskiranga nchito pakulimbana na nthenda iyi. Nthowa yakwamba yakucizgira yikatora myezi yinkhondi na umoza ndipo yikamovwira kuti waŵeko makora kwa myezi 18. Kweni khansa yikambaso ndipo Saúl wakapokeraso wovwiri wa nyengo yicoko uwo ukamunyotweska comene. Khansa yikamaraso kwa nyengo yicoko, ndipo Saúl wakasuzgika comene na nthowa yacitatu yakucizgira. Saúl wakajipatulira kwa Ciuta ndipo wakakhumbanga kubapatizika na kuŵa yumoza wa Ŵakaboni ŵa Yehova, kweni wakafwa wakati wakwaniska waka vilimika 17.

Kanandi ŵadokotara ŵakatenge kuŵika ndopa kukucepeskako ulwilwi uwo ukuŵapo cifukwa ca nthowa yakucizgira nthenda iyi. Ndipouli kuŵika ndopa kukumazga nthenda iyi yayi. Apo ŵadokotara ŵakasanga kuti Saúl wali na khansa ya mu ndopa, iyo na ine tikenera kulongosora makora kuti wakwenera yayi kuŵikika ndopa cifukwa tikukhumba kupulikira dango la Yehova la ‘kuziŵizga ndopa.’ (Milimo 15:19, 20) Kanandi waka para ine nafumapo, Saúl wakaphaliranga ŵadokotara kuti nchakusankha cake kuti waleke kuŵikika ndopa. (Wonani bokosi pa peji 21.)

Paumaliro ŵadokotara ŵakawona kuti Saúl ni mulara, ndipo wakumanya makora nthenda iyo wali nayo. Ŵakazomera kucindika ivyo tikasankha ndipo ŵakagwiliskira nchito nthowa zinyake zakucizgira kwambura ndopa, nangauli tikacicizgikanga kuti tisinthe maghanoghano. Saúl wakaninothiskanga comene apo nkhamupulikanga wakulongosora cipulikano cake ku ŵadokotara pa nkhani ya ndopa. Iyo wakaŵa paubwezi weneco na Yehova.

Mu nyengo iyo tikamanyira nthenda ya Saúl, tikaŵa na ungano wa cigaŵa ku Barcelona. Ndipo pa ungano uwu tikapokera buku la Sendelerani kwa Yehova. Buku lakuzirwa ili likaŵa nga ni nyanguru yakutovwira kuti tiŵe ŵakukhora peneapo tikukumana na masuzgo. Nyengo iyo tikaŵa mu cipatala tikaŵazganga vigaŵa vinyake pamoza. Kanandi apo tikakumananga na masuzgo agho tikazizipizga, tikakumbukanga ivyo tikaŵazga. Mpha nyengo iyi apo tikawona kuti lemba la Yesaya 41:13 ilo liri pa mazgu agho ghali pa peji 3 likaŵa na ng’anamuro lapadera kwa ise. Likuti: “Ine Yehova Ciuta wako, ndakukora ku woko lako lamalyero; ndine nkhuti kwa iwe, ‘Ungopanga, ndine tindikovwire.’”

Cipulikano ca Saúl Cikakhwaska Ŵanji

Cigomezgo ca munthazi ico Saúl wakaŵa naco ndiposo kucita vinthu mwaulara vikakondweska comene ŵadokotara na ŵanesi ŵa pa cipatala ca Vall d’Hebrón. Wose awo ŵakamupweleleranga ŵakamutemwa comene. Mulara wa ŵadokotara awo ŵakusanda matenda gha khansa ya mu ndopa, wakawovwirapo ŵana ŵanyake ŵa Ŵakaboni ŵa Yehova awo ŵakalwaranga nthenda iyi. Iyo wakuŵacindika comene. Wakukumbuka ivyo Saúl wakasankha kuti wakoreske ivyo wakagomezganga, kweniso cikanga ico wakaŵa naco, ndiposo umo wakawoneranga umoyo. Ŵanesi ŵakamuphalira Saúl kuti wakaŵa mulwari muwemi comene mu cipinda ico ŵakamugoneka. Ŵakati iyo wakadandaulangapo yayi nanga ni apo wakaŵa pafupi kufwa ndipo wakawonanga vinthu mwakwenelera.

Dokotara munyake wakaniphalira kuti ŵana ŵanandi ŵamsinkhu wa Saúl, awo ŵakulwara matenda ghambura kucizgika ŵakugalukira ŵadokotara na ŵapapi ŵawo cifukwa ca kwenjerwa na kukhuŵazgika. Iyo wakawona kuti Saúl wakacita nthena yayi. Wakazizikika kuwona kuti Saúl wakaŵa wakuzika ndiposo wambura kwenjerwa comene. Uwu ukaŵa mwaŵi wa Saúl na ine kumuphalirako za cipulikano cithu.

Nkhukumbukaso umo yumoza wa Ŵakaboni ŵa Yehova mu mpingo withu wakawovwilikira na Saúl. Iyo wakenjerwanga kwa vilimika vinkhondi na cimoza ndipo munkhwala ukamovwiranga yayi. Kanandi waka wakagonanga na Saúl ku cipatala. Wakaniphalira kuti wakakondwa comene na umo Saúl wakawoneranga nthenda iyo wakaŵa nayo. Wakawona kuti nangauli Saúl wakasuzgikanga, wakakhozganga awo ŵakizanga kuzakamuwona. Munthu uyu wakati: “Ciyelezgero ca Saúl canovwira kuŵa na cikanga pakulimbana na kwenjerwa.”

Pajumpha vilimika vitatu kufuma apo Saúl wakafwira. Nyifwa yake yicali kuniŵinya. Nili na nkhongono yayi kweni Ciuta wakunipa “kaluskiro ka nkhongono.” (2 Ŵakorinte 4:7) Nasambira kuti ŵanji ŵangawovwirika nangauli ningakumana na masuzgo ghakofya. Kuzizipizga nyifwa ya mfumu wane, adada, na mwana wane kwanovwira kuŵa wambura kujighanaghanira comene kweniso kupulikiska para ŵanji ŵakusuzgika. Kuluska vyose kwanovwira kusendelera comene kwa Yehova. Nkhucita wofi yayi na vyamunthazi cifukwa Adada ŵane ŵakucanya ŵacali kunovwira. Ŵacali kunikora pa kawoko.

[Mazgu ghamusi]

[Bokosi/Cithuzithuzi pa peji 21]

KASI MUKUMANYA?

Mukwenera kuti muli kupulikapo kuti Ŵakaboni ŵa Yehova ŵakukana kupokera ndopa. Kasi mukumanya cifukwa cake?

Ŵanandi ŵakupulikiska yayi ico ŵakukanira. Nyengo zinyake ŵanthu ŵakughanaghana kuti Ŵakaboni ŵa Yehova ŵakukana munkhwala wa mtundu uliwose, ndiposo kuti ŵakuzirwiska yayi umoyo. Kweni ndimo viliri yayi. Ŵakaboni ŵa Yehova ŵakukhumba munkhwala uwemi comene uwo ungaŵawovwira iwo ndiposo mbumba zawo. Kweni ŵakukana kupokera ndopa. Cifukwa wuli?

Ŵakupulikira dango ilo Ciuta wali kupeleka ku ŵanthu wose. Pamanyuma pa Ciwowota ca mu nyengo ya Nowa, Ciuta wakazomerezga Nowa na mbumba yake kuti ŵaryenge nyama. Kweni Ciuta wakaŵakanizga kurya ndopa. (Genesis 9:3, 4) Ŵanthu ŵa mitundu yose ŵali kufuma mu mphapu ya Nowa, ntheura wose ŵakwenera kupulikira dango ili. Dango ili licali kugwira nchito. Pamanyuma pa vilimika 800, Ciuta wakalongosoraso makora dango ili ku Ŵaisrayeli, wakati ndopa ni zakupatulika ndiposo zikwimira umoyo. (Leviticus 17:14) Pamanyuma pa vilimika vyakujumpha 1,500, ŵapositole ŵakaphalira Ŵakhristu wose kuti ‘ŵaziŵizge ndopa.’—Milimo 15:29.

Ŵakaboni ŵa Yehova, ŵakuwona kuti nchakupulikikwa yayi kuziŵizga ndopa usange ŵangazomera kuŵikika ndopa mu thupi lawo. Ntheura iwo ŵakukhumba wovwiri uwo ukusazgapo kupokera ndopa yayi. Cifukwa ca kupulikira dango la m’Malemba ili, ŵakupokera wovwiri wapadera. Nchambura kuzizika kuti ŵanthu ŵanandi awo Mbakaboni ŵa Yehova yayi nawo ŵakukhumba wovwiri uwo ukusazgapo kuleka kupokera ndopa.

[Cithuzithuzi pa peji 19]

Na mfumu wane Felipe na mwana withu Saúl

[Cithuzithuzi pa peji 19]

Ŵapapi ŵane a José na a Soledad

[Cithuzithuzi pa peji 20]

Saúl mwezi umoza pambere wandafwe