Ŵacoko Ŵamuwusa, Kweni Ŵanandi Ŵazamusanga Candulo
KWAMBIRA mu mazuŵa gha ŵapositole, Ciuta wakusankha ŵanthu ŵacoko pa Ŵakhristu ŵakugomezgeka, ndipo wakuŵazgora kuŵa ŵana ŵake. Ŵana ŵa Ciuta aŵa ŵakusintha comene mwakuti Mazgu gha Ciuta ghakuti iwo ŵakubabikaso. Cilato ca kubabika kuphya nchakuti ŵateŵeti ŵa Ciuta awo ŵababikaso ŵazakawuse kucanya. (2 Timote 2:12) Para ŵafwa ŵakuwuskikira ku umoyo wakucanya. (Ŵaroma 6:3-5) Kucanya ‘ŵamuwusa caru capasi nga ni mathemba,’ pamoza na Khristu.—Uvumbuzi 5:10; 11:15.
Ndipouli, Mazgu gha Ciuta ghakuyowoyaso kuti padera pa awo ŵababikaso, paliso ŵanyake awo ŵazamuponoskeka. Baibolo (mu Malemba gha Cihebere na gha Cigiriki), likuyowoya kuti Ciuta wakukhumba kuti waponoske magulu ghaŵiri gha ŵanthu. Gulu linyake ndicoko ndipo lili na cilindizga ca kukakhala kucanya, linyake ndikuru ndipo lili na cilindizga ca kuzakakhala pa caru capasi. Mwaciyelezgero, wonani ivyo mpositole Yohane wakalembera Ŵakhristu awo ŵali kubabikaso. Pakuyowoya za Yesu, wakati: “Ndiyo sembe yakuphepiskira zakwananga zithu, zithu [gulu licoko] pera cara, kweniso za caru cose [wumba ukuru].”—1 Yohane 2:2.
Mpositole Paulosi nayo wakalemba kuti: “Cilengiwa [wumba ukuru], na kunweka comene cikulindilira kuvumbulika kwa ŵana ŵa Ciuta [gulu licoko].” (Ŵaroma 8:19-21) Kasi mazgu gha mpositole Yohane na Paulosi ghakung’anamuraci? Ghakung’anamura kuti: Awo ŵababikaso ŵazamuwusa mu boma la kucanya. Na cilato wuli? Kuti ŵapeleke vitumbiko vyamuyirayira ku ŵanthu ŵanandi, awo ŵazamukhala pa caru capasi ndipo ŵazamuwusika na boma la Ciuta. Lekani Yesu wakasambizga ŵasambiri ŵake kuti ŵalombenge kuti: “Ufumu winu wize. Khumbo linu licitike, umo kuliri kucanya, ntheura pera pa caru capasi.”—Mateyu 6:10.
Malemba gha Cihebere nagho ghakuyowoya za magulu ghaŵiri gha ŵanthu agho ghazamuponoskeka. Mwaciyelezgero, wonani ivyo Yehova wakaphalira Abrahamu: “Mu mphapu yako [gulu licoko] mitundu yose ya caru [wumba ukuru] tiyitumbikike.” (Genesis 22:18) Enya, kwizira mu “mphapu” ya Abrahamu, mitundu yose yizamutumbikika.
Kasi “mphapu” ni njani? Ni Yesu Khristu pamoza na awo ŵababikaso, awo ŵazgoreka kuŵa ŵana ŵa Ciuta. Mpositole Paulosi wakalongosora kuti: “Usange muli ŵa Khristu, muli mphapu ya Abrahamu nadi.” (Ŵagalatiya 3:16, 29) Kasi ŵanthu ŵa mitundu yose ŵazamupokera vitumbiko wuli kwizira mu “mphapu” iyi? Ŵazamuŵaso paubwezi na Ciuta ndiposo ŵazamusangwa na umoyo wamuyirayira mu paradiso pa caru capasi. Wamasalmo Davide wakacima kuti: “Ŵakunyoroka ŵamkuhara caru na kukhala mwenemumo kwandanda.”—Salmo 37:29; Yesaya 45:18; Uvumbuzi 21:1-5.
Enya, pali ŵanthu ŵacoko awo ŵasoleka kuti ŵakawuse kucanya. Ndipouli ŵanthu ŵanandi pa caru capasi ŵazamusangwa na umoyo wamuyirayira ndiposo vitumbiko vinyake. Mphanyi imwe pamoza na ŵa mu mbumba yinu mwaŵa ŵamoza mwa ŵanthu awo ŵazamusangwa na vitumbiko vya Ufumu wa Ciuta.
[Cithuzithuzi pa peji 12]
Ŵanthu ŵanandi ŵazamutumbikika na umoyo wamuyirayira pa caru capasi. Kasi namwe muzamuŵa yumoza wawo?