Umo Naŵira Wakukondwa Nangauli Ndine Cilima
Nga ni umo yikayowoyekera na Paulette Gaspar
Nangauli apo nkhababikanga nkhakwananga makilogiramu ghatatu, kweni dokotala wakamanya kuti cinthu cinyake cili makora yayi. Apo nkhababikanga viwangwa vyane vinyake vikasweka. Nkhababika na nthenda iyo yikukora viwangwa. (osteogenesis imperfecta) Mwaluŵiro ŵakaluta nane ku cipinda cakupangira opareshoni. Kweni ŵadokotala ŵakakayika comene kuti nilutilirenge kuŵa wamoyo. Ŵakalindizganga kuti nifwenge mu maora 24.
NKHABIBIKA pa Juni 14, 1972, mu msumba ukuru wa Canberra, ku Australia. Nangauli ŵadokotala ŵakaghanaghananga kuti nifwenge zuŵa lenelira, kweni nkhafwa yayi. Nkhakolekaso na vilaso. Cifukwa cakuti ŵakaghanaghananga kuti niponenge yayi, ŵadokotala ŵakanipa wovwiri uliwose yayi. Kweni apa napo nkhafwa yayi.
Pa nyengo iyi ŵapapi ŵane ŵakwenera kuti ŵakasuzgika comene maghanoghano. Cifukwa cakuti nkhawonekanga kuti niponenge yayi, ŵadokotala ŵakaphalira ŵapapi ŵane kuti ŵaleke kunighanaghanira comene. Nakuti, kwa myezi yitatu iyo nkhaŵira mu cipatala kufuma apo nkhababikira, ŵadokotala ŵakaphalira ŵapapi ŵane kuti ŵaleke kunikora. Ŵanikorenge mphanyi ŵakanipwetekanga. Kweni apo ŵadokotala ŵakawona kuti niponenge, ŵakaphalira ŵapapi ŵane kuti ŵakaniŵike uko kukukhala ŵana awo ni vilima.
Ŵapapi ŵane ŵakasankha kuluta nane ku nyumba. Pa nyengo iyi amama ŵakaŵa kuti ŵamba kusambira Baibolo na Ŵakaboni ŵa Yehova. Ivyo ŵakasambiranga vikaŵawovwira kumanya kuti ŵali na mulimo wakuti ŵanipwelelere. Kweni cikaŵa cakusuzga kuti amama ŵaŵe nane paubwezi comene cifukwa ŵakaghanaghaniranga waka vya umo ŵanganipwelelelera. Ŵakalutanga nane pafupipafupi ku cipatala. Viwangwa vyane vikaswekanga nanga ni para ŵakunigeziska. Nanga ni apo nkhuyethyemura, ciwangwa cikaswekanga.
Nkhamba Kusuzgika Maghanoghano
Apo nkhakulanga, nyengo zose nkhakhalanga waka pa njinga ya ŵanthu ŵakupendera. Nkhasambira na kwenda yayi. Nangauli pakaŵa masuzgo agha, ŵapapi ŵane ŵakanipweleleranga comene.
Kweniso, amama ŵakayezgayezga comene kunisambizga uthenga wakupembuzga wa mu Baibolo. Mwaciyelezgero, ŵakanisambizga kuti munthazi, Ciuta wazamuzgora caru kuŵa paradiso, umo ŵanthu wose ŵazamusangwa na umoyo uwemi wauzimu ndiposo wakuthupi. (Salmo 37:10, 11; Yesaya 33:24) Ndipouli, amama ŵakaniphaliranga mwambura kubisa kuti ciŵenge cakusuzga kuti nisangwenge na umoyo mpaka apo Ciuta wazamuzgolera caru kuŵa paradiso.
Pakwamba, nkhasambiranga sukulu ya vilima. Ŵasambizgi ŵane ŵakaniphalirapo yayi ico ningazakacita munthazi, ndipo nane nkhaghanaghananga yayi ico ningazakacita munthazi. Nakuti cikaŵa cakusuzga comene kuzizipizga masuzgo ku sukulu. Ŵana ŵa sukulu ŵanandi ŵakanicitiranga nkhaza. Pamanyuma nkhamba kusambira pa sukulu ya ŵana wose. Cikaŵa cakusuzga comene kuti nikhalenge makora na ŵanyane. Ndipouli, nkhasimikizga mtima kuti nimalizgenge sukulu.
Comene apo nkhaŵa ku sukulu ya sekondare, nkhawonanga umo ŵanyane ku sukulu ŵaliri na umoyo wambura ng’anamuro. Kweniso nkhaghanaghananga ivyo amama ŵakanisambizga kufuma mu Baibolo. Nkhamanyanga kuti ivyo ŵakayowoyanga vikaŵa vyaunenesko. Kweni pa nyengo iyo, visambizgo vya mu Baibolo vikanifika pa mtima yayi. Kwa kanyengo, nkhasankha kuŵa na umoyo wakujikondweska, kwambura kughanaghanirako vya namacero.
Apo nkhaŵa na vilimika 18, nkhawukapo pa nyumba ya ŵapapi ŵane ndipo nkhakhalanga pamoza na ŵanyane awo nawo ŵakaŵa vilima. Nkhakondwa cifukwa cakuti nkhawukapo kweni nkhaŵa na wofi. Vikanikondweskanga kuŵa na wanangwa, kujiyimira panekha, ndiposo kucezga na ŵanyane. Ŵanyane ŵanandi ŵakatengwa. Nane nkhakhumbanga kutengwa ndiposo kutemweka. Cifukwa cakuti ndine cilima, kusanga mwanalume wakuti nitorane nayo kukaŵa kwakusuzga. Nkhaŵa na citima comene.
Ndipouli, nkhamupanga mulandu yayi Ciuta cifukwa ca umo nkhababikira. Nkhasambira vinandi vyakukhwaskana na Ciuta kuti iyo wangacita yayi cilicose ca ubendezi. (Job 34:10) Nkhazomerezga waka kuti mbwenu ndimo nane nili kubabikira. Ndipouli, nkhamba kusuzgika comene maghanoghano.
Pacokopacoko Suzgo la Maghanoghano Likamba Kumara
Nkhuwonga kuti amama ŵakamanya ivyo vikanicitikiranga, ndipo ŵakamanyiska mulara munyake wa mpingo uyo wakhalanga pafupi na uko nkhakhalanga. Mulara uyu wakaniyimbira telefoni na kunicema kuti nilute ku maungano ku Nyumba ya Ufumu ya Ŵakaboni ŵa Yehova. Kweniso, mudumbu munyake mu mpingo wakamba kusambira nane Baibolo sabata yiliyose.
Apo nkhakumbuskika unenesko wa mu Baibolo uwo amama ŵakanisambizga, umoyo wane ukamba kusintha. Nkhasangwanga kucezga na Ŵakhristu ŵanyane. Ndipouli, nkhakhumbanga yayi kuyowoya umo nkhujipulikira cifukwa nkhawopanga kujikumbuska masuzgo ghane. Nkhuwona kuti ici ndico cikanitondeskanga kuti nitemwenge comene Ciuta. Kweni nkhamanya kuti nchiwemi kuti nijipatulire kwa Yehova. Ntheura, mu Disembala 1991, nkhabapatizika kuti nilongore kuti najipeleka.
Nkhafumako ku nyumba uko nkhakhalanga na ŵanyane ndipo nkhasanga nyumba ya nekha. Kucita nthena kukaŵa na vyandulo ndiposo masuzgo. Mwaciyelezgero, nkhaŵa na phukwa comene. Nkhacitanga wofi kuti panji mu nyumba mwizenge ŵanalume ŵakofya. Nkhambaso kusuzgika comene maghanoghano. Nangauli pamaso nkhawonekanga wacikanga ndiposo wakukondwa, kweni vinthu vikaŵa makora yayi. Nkhakhumbanga comene kuŵa na mubwezi muwemi.
Nkhughanaghana kuti Yehova Ciuta wakanipa mubwezi muwemi. Ŵalara ŵa mpingo ŵakamuphalira Suzie uyo wakaŵa wakutengwa kuti wasambirenge nane Baibolo. Suzie wakaŵa waka msambizgi yayi. Wakazgoka mubwezi wane uyo nkhumutemwa comene.
Suzie wakanisambizga kuti nipharazgenge ku nyumba na nyumba ndiposo para mpata wasangika. Sono nkhayamba kuzirwiska comene mikhaliro ya Ciuta. Kweni nangauli nkhabapatizika, nkhamutemwanga comene yayi Ciuta. Pa nyengo yinyake nkhakhumbanga kuleka kumuteŵetera. Nkhamuphalira Suzie ivyo nkhaghanaghananga ndipo wakanovwira comene.
Suzie wakanovwiraso kumanya kuti nkhaŵa wakukondwa yayi cifukwa cakuti nkhacezganga na ŵanthu awo ŵakatemwanga comene yayi Yehova. Ntheura nkhamba kutemwana na ŵanthu awo mbakukhora pakuteŵetera Ciuta, comenecomene awo mbalara kwa ine. Kweniso pakuti nkhaŵatemwanga comene yayi amama, nkhamba kukhozgaso ubwezi wane na iwo ndiposo na mudumbu wane. Nkhazizwa kuwona kuti nkhamba kuŵa wakukondwa comene kuluska kale. Ŵabali na ŵadumbu ŵane ŵauzimu ndiposo ŵamumbumba yane ŵakanovwira comene kuti niŵe wakukondwa ndiposo wankhongono. Kweni kuluska wose, Yehova ndiyo wakanovwira comene.—Salmo 28:7.
Mulimo Uphya
Pa ungano wa cigaŵa nkhategherezga nkhani iyo yikalongosora za cimwemwe ico cikuŵapo cifukwa ca kupharazga nyengo zose. Ungano ukati wamara nkhaghanaghana kuti: ‘Nane ningacita mulimo uwu.’ Ndipouli, nkhamanya kuti ciniŵirenge cakusuzga comene kucita mulimo uwu. Kweni nkhati nalomba na kughanaghanirapo, nkhasankha kulemba fomu mwakuti niŵe msambizgi wa Baibolo wa nyengo zose. Ndipo mu Epulero 1998 nkhamba kucita mulimo uwu.
Kasi ningapharazga wuli pakuti ndine cilima? Mwakawiro, nkhutemwa kucita vinthu panekha, nkhukhumba yayi kusuzga ŵanthu, kuŵagomezga kuti ŵanovwirenge para nkhukhumba kwenda panji kucita vinthu vinyake. Ntheura, Suzie na mfumu wake Michael, ŵakasanga nthowa yakumazgira suzgo ili: Ŵakati nigure muthuthuthu. Kweni kasi ningendeska wuli muthuthuthu? Nga ni umo mukuwonera pa cithuzithuzi, muthuthuthu wane uli kupangikira ine pera. Thupi lane ndicoko comene, likukwana makilogiramu 19 pera, ndipo nkhukwera pa muthuthuthu uwu uku nakhala pa njinga ya ŵanthu ŵakupendera.
Kweni cifukwa ca muthuthuthu uwu, nili na wanangwa ndiposo nkhupharazga na kusambizga ŵanthu Baibolo pa nyengo iyo njakwenelera kwa iwo ndiposo kwa ine. Kuyowoya unenesko, nkhutemwa comene kwenda pa muthuthuthu wane ndipo nkhukondwa para mphepo yikuniputira ku maso.
Nkhutemwa kucezga na ŵanthu mu misewu, comenecomene awo ŵali na nkharo yiwemi ndipo ŵakunicindika. Nkhukondwa kovwira ŵanthu kuti ŵasambire Baibolo. Nkhukumbuka nyengo yinyake apo nkhapharazganga ku nyumba na nyumba na munyane uyo wakaŵa mutali. Munyane wakamutawuzga mweneko nyumba, ndipo iyo wakanilaŵiskanga waka ine uku wakuzizwa ndipo wakafumba munyane kuti: “Kasi wakuyowoya?” Tose tikamba kuseka. Nkhati namara kumupharazgira mwanakazi uyu wakamanya kuti nkhumanya kuyowoya.
Sono nkhusangwa na umoyo ndipo nasambira kutemwa Yehova Ciuta. Nkhuwonga comene amama cifukwa ca kunisambizga unenesko wa mu Baibolo, ndipo nkhulaŵiska munthazi na cigomezgo apo Ciuta wazamuzgora “vinthu vyose kuŵa viphya,” kusazgapo na thupi lane licoko ili.—Uvumbuzi 21:4, 5.
[Mazgu Ghakukhozgera pa peji 14]
“Nkhazomerezga waka kuti mbwenu ndimo nane nili kubabikira. Ndipouli, nkhamba kusuzgika comene maghanoghano”