Nkhamanya Kuti Umoyo Ngwakuzirwa
Nga ni umo yikayowoyekera na Gaspar Martínez
Nkhaŵa mukavu comene apo nkhaŵa msepuka ndipo nkhakhalanga ku muzi. Kweni nkhati naluta ku tawuni nkhasanga usambazi. Kweni muwonenge kuti usambazi uwo nkhasanga ndiwo nkhalindizganga cara.
NKHABABIKA mu 1930 ndipo nkhalelekera mu cigaŵa ca ku muzi ku Rioja kumpoto kwa caru ca Spain. Apo nkhaŵa na vilimika 10, nkhaleka sukulu, kweni nkhaŵa kuti namanya kuŵazga na kulemba. Pamoza na ŵakuru ŵane, munung’una na ŵalongosi ŵane, tikatangwanikanga na nchito ya kuliska mberere ndiposo kulima.
Ukavu ukapangiskanga kuti tighanaghanenge kuti ndalama na vithu vyakuthupi ni vyakuzirwa comene. Tikaŵacitiranga sanji awo ŵakaŵa na vinandi kuluska ise. Ndipouli, bishopu wa chalichi la Katolika wakayowoya kuti ‘muzi withu ndiwo ukaŵa na ŵanthu ŵakutemwa vinthu vyauzimu mu cigaŵa cake.’ Wakamanyanga yayi kuti ŵanandi ŵangaleka kusopa mu chalichi ili.
Kupenja Cinthu Cinyake Ciwemiko
Nkhatora mwanakazi mu muzi withu mwenemura, zina lake Mercedes. Pakajumpha nyengo yitali yayi tikaŵa na mwana mwanalume. Mu 1957 tikasamira mu msumba wa Logroño uwo ukaŵa pafupi na kukaya kwithu. Pamasinda, ŵa mu nyumba yane wose nawo ŵakasama. Ndipo nkhawona kuti nkhaŵa na mwaŵi ucoko comene wa kusanga ndalama zakovwilira mbumba yane cifukwa nkhaŵavya maluso. Nkhamanyanga yayi uko ningasanga ulongozgi. Ntheura nkhalutanga ku layibulare kukapenjerezga ulongozgi mu mabuku ghakupambanapambana, nangauli nkhamanyanga yayi ico ningacita.
Zuŵa linyake, nkhapulika kuti pa wayilesi pali pulogiramu ya kusambizga munthu Baibolo uku wali pa nyumba. Nati namara kusambira, ŵa Evangelical Protestants ŵakanicema ku chalichi lawo. Nkhasopako masabata ghaŵiri, kweni nkhawona kuti ŵalaraŵalara ŵa chalichi ili ŵakutemwa kugazgana. Nkhawelerakoso yayi, nkhadumura mu mtima wane kuti ndimo visopa vyose viliri.
Mamba Ghakawa Kufuma M’maso Ghane
Mu 1964, muwukirano munyake zina lake Eugenio wakiza ku nyumba yithu. Wakaŵa yumoza wa Ŵakaboni ŵa Yehova, cisopa ico nkhaŵa kuti nindacipulikepo. Kweni nkhaŵa wakunweka comene kudumbiskana nayo vinthu vyakukhwaskana na Baibolo. Nkhaghanaghananga kuti nkhughamanya makora Malemba. Nkhamuzgoranga mwa kuyowoya mavesi ghacoko waka agho nkhasambira mu kosi ya Baibolo yira. Nangauli nkhayezganga kukhozgera visambizgo vinyake vya Ciprotesitanti, kweni nkhavikayikiranga.
Pamanyuma pa kudumbiskana kaŵiri kwa nyengo yitali, nkhazomera kuti Eugenio ndiyo wakaghamanyanga makora Mazgu gha Ciuta. Nkhadokera comene kuwona umo wakasangiranga malemba mwaluŵiro na kulongosora ng’anamuro lake na umo ghangatovwilira mu umoyo withu nangauli ine nkhasambira comeneko sukulu kuluska iyo. Eugenio wakanilongora mu Baibolo mavesi agho ghakuyowoya kuti tikukhala mu mazuŵa ghaumaliro ndipo Ufumu wa Ciuta uzamuzgora caru capasi kuŵa paradiso. Nkhakondwa comene.—Sal. 37:11, 29; Yes. 9:6, 7; Mat. 6:9, 10.
Nkhazerezga yayi, ndipo nyengo yeneyiyo nkhazomera kuti wanisambizgenge Baibolo. Kweni vyose ivyo nkhasambira vikaŵa viphya kwa ine, ndipo vikanicontha comene mu mtima. Nkhaŵa na cigomezgo ciphya ico cikanikhozga comene. Nkhaleka kupenjerezga ivyo nkhapenjanga. Nkhawona kuti vyose ivyo nkhacitanga kuti niŵe na umoyo uwemi wakuthupi vikaŵa vyakuzirwa viŵi yayi. Usange munthazi matenda na nyifwa vizamuŵakoso yayi, mbwenu masuzgo ghanyake nagho kuzamuŵavya.—Yes. 33:24; 35:5, 6; Uvu. 21:4.
Nyengo yeneyiyo nkhamba kuphalira ŵabali ŵane ivyo nkhasambiranga, na mtima wose nkhaŵalongosoleranga kuti Ciuta walayizga kuzgora caru capasi kuŵa paradiso, umo ŵanthu ŵakugomezgeka ŵazamukhala kwamuyirayira.
Mbumba Yane Yikazomera Unenesko
Ŵabali ŵane pafupifupi 12, ŵanalume na ŵanakazi ŵakaghanaghana kuti pa Sabata muhanya tikumanenge mu nyumba na ŵadada ŵane ŵacoko kuti tidumbiskanenge vinthu ivyo Baibolo likulayizga. Sabata yiliyose tikadumbiskananga kwa maora ghaŵiri panji ghatatu. Eugenio wati wawona kuti ŵabali ŵane ŵanandi mbakunweka kusambira Baibolo, wakapanga ndondomeko yakuti wasambirenge na mbumba yiliyose payekha.
Nkhaŵa na ŵabali ŵane ku Durango, tawuni yicoko iyo yikaŵa pa mtunda wa makilomita 120 kufuma uko tikakhalanga. Mu tawuni iyi mukaŵavya Ŵakaboni. Ntheura, myezi yitatu yikati yajumpha, nkhalutako mwakuti nkhacezge nawo kwa mazuŵa ghaŵiri na kuŵalongosolera za cigomezgo cane ciphya. Mise yiliyose, ŵana, ŵanakazi ndiposo ŵanalume ŵakawungananga, tose pamoza tikaŵanga 10, ndipo tikadumbiskananga mpaka ku matandakuca. Wose ŵakaŵanga maso kupulikizga. Paumaliro nkhaŵalekera Mabaibolo ndiposo mabuku ghakulongosora Baibolo. Ndipo tikalutilira kudumbiskana.
Apo Ŵakaboni ŵakafika ku Durango, uko makani ghawemi ghakaŵa ghandapharazgikepo, ŵakasanga ŵanthu 18 awo ŵakalindiliranga kuti ŵasambizgike Baibolo. Ŵakaboni ŵakaŵa ŵakukondwa comene, ndipo ŵakanozga kuti mbumba yiliyose yisambizgikenge.
Mpaka panyengo iyi Mercedes wakakananga kusambira unenesko cifukwa ca kopa ŵanthu. Mulimo wa Ŵakaboni ŵa Yehova ukaŵa wakukanizgika ku Spain, ntheura wakaghanaghananga kuti ŵalara ŵa boma ŵalekeskenge ŵana ŵithu sukulu, ndipo ŵanthu ŵatitinkhenge. Kweni wati wawona kuti ŵa mu mbumba yithu wose ŵakusambira unenesko, nayo wakanwekera.
Vilimika viŵiri vikajumpha yayi, ŵabali ŵane ŵakukwana 40 ŵakabapatizika na kuŵa ŵamoza ŵa Ŵakaboni ŵa Yehova. Enya, ine na ŵa mu mbumba yane tikaŵa na cilato cimoza. Nkhawonanga kuti nafiska cinthu cinyake cakuzirwa comene. Yehova wakatitumbika comene mwauzimu.
Umoyo Ukaŵa Wakukondweska Comene Apo Nkhacekuranga
Mu vilimika 20 vyakulondezgapo nkhatangwanika comene kulera ŵana ŵane ŵasepuka ŵaŵiri ndiposo kovwira mpingo. Apo ine na Mercedes tikasamira ku Logroño, mu msumba uwu mukaŵa ŵanthu ŵakukwana 100,000, kweni Ŵakaboni ŵa Yehova ŵakaŵamo pafupifupi 20. Pakatora nyengo yitali yayi, nkhapika milimo yinandi mu mpingo.
Apo nkhaŵa na vilimika 56, mwamabuci, kampani iyo nkhagwirangako nchito ŵakayijala, ndipo nkhaŵa pa ulova. Nyengo zose nkhakhumbisiskanga kuti nicite uteŵeti wanyengozose. Ntheura, pakuti panyengo iyi nkhagwiranga nchito yayi, nkhasanga mpata wa kwamba upayiniya. Ndalama za penishoni izo nkhapokeranga zikaŵa zicoko comene. Cikaŵa cakusuzga comene kusanga vyakukhumbikwa pa umoyo. Mercedes wakacitanga tumaganyu mwakuti wanovwire kusanga vyakukhumbikwa. Ntheura, tikasoŵerwanga kanthu yayi. Nicali kucita upayiniya, ndipo Mercedes nyengo zinandi wakucita upayiniya wakanyego, ndipo wakukondwa na mulimo wa kupharazga.
Nyengo yinyake Mercedes wakatemwanga kumupa Merche magazini ghithu. Merche wakasambirapo kale Baibolo apo wakaŵa mwana. Wakaghatemwanga comene magazini ghithu, ndipo Mercedes wakawona kuti mwanakazi uyu wakatemwanga nipera unenesko. Paumaliro, Merche wakazomera kusambira Baibolo ndipo wakamba kukura mwauzimu. Kweni mfumu wake, Vicente wakaŵa muloŵevu, ndipo wakakaŵanga yayi kuleka nchito para wayisanga. Ntheura wakatondekanga kupwelelera muwoli wake. Nthengwa yawo yikatenge yitimbanizgikenge cifukwa ca uloŵevu wake.
Muwoli wane wakaphalira Merche kuti waphalire Vicente kuti tidumbiskane. Tikati tadumbiskana kwa maulendo ghanandiko, nayo wakazomera kusambira Baibolo. Vicente wakamba kusintha. Wakakhalanga mazuŵa ghanandi kwambura kumwa phere. Wakakhalanga kwambura kumwa kwa sabata yimoza panji sabata zinandiko. Paumaliro wakalekerathu kumwa phere. Cisko cake cikamba kuwoneka makora ndipo mbumba yake yikambaso kukolerana. Sono, Vicente pamoza na muwoli wake ndiposo mwana wawo mwanakazi ŵakukhala ku cirwa ca Canary, ndipo ŵakovwira mpingo ucoko wa ku malo agha.
Kughanaghanira Umoyo Uwemi Uwo Nkhaŵa Nawo
Nangauli ŵabali ŵane ŵanyake awo ŵakasambira unenesko ŵali kufwa, kweni ŵacalipo ŵanji awo ŵakulutilira kukura mwauzimu, ndipo Ciuta watitumbika comene. (Zinth. 10:22) Nchakukondweska comene kuwona kuti ŵanthu awo ŵakasambira unenesko vilimika 40 ivyo vyajumpha ŵacali kuteŵetera Yehova mwakugomezgeka pamoza na ŵana ndiposo ŵazukuru ŵawo.
Panyengo yasono nili na ŵabali ŵane ŵakuthupi ŵanandi awo Mbakaboni, ndipo ŵanji mbalara ŵa mpingo, ŵateŵeti ŵakovwira ndiposo ŵapayiniya. Mwana wane mulara ndiposo muwoli wake ŵakuteŵetera pa ofesi ya Ŵakaboni ŵa Yehova ku Madrid, mu caru ca Spain. Ku Spain kukaŵa Ŵakaboni 3,000 apo nkhambanga unenesko. Kweni pasono kuli Ŵakaboni ŵakujumpha 100,000. Nkhusangwa comene na uteŵeti wanyengozose, ndipo nkhuwonga comene Ciuta cifukwa ca uteŵeti ndiposo umoyo uwemi. Nangauli nindasambire comene, ndine movwiri wa mulaŵiliri wa dera.
Mu vilimika vicoko waka ivyo vyajumpha, ŵanthu ŵanandi ŵakawukamo mu cikaya cithu. Pamasinda, ŵanthu ŵacoko awo ŵakakhalira, nawo ŵakaleka minda na nyumba cifukwa ca ukavu ndipo ŵakasamira ku vigaŵa vinyake kuti ŵakapenje nchito. Cakukondweska nchakuti taŵanandi ise tikafuma ku cigaŵa ici, tili kusanga usambazi wauzimu. Tili kusambira kuti umoyo uli na cilato, ndiposo kuti munthu wakuŵa wakukondwa para wakuteŵetera Yehova.
[Cithuzithuzi pa peji 32]
Pafupifupi wose ŵa mu mbumba ya Mbali Martínez awo ŵali mu unenesko