Mafumbo Ghakufumira ku Ŵaŵazgi
Kasi munthu wangabapatizikaso pa vifukwa wuli?
Pa vifukwa vinyake, munthu uyo wali kubapatizika kale wangamba kughanaghana kuti wakabapatizikiramo bweka, ndipo wangakhumba kuti wabapatizikeso. Mwaciyelezgero, pa nyengo iyo wakabapatizikiranga, wangaŵa kuti wakacitanga nipera vinthu viheni kuubendi, vyeneivyo wakatenge wasezgekerengepo mu mpingo waŵenge kuti ngwakubapatizika. Kasi para wakacitanga vinthu vyanthena ndikuti wakajipatulira nadi kwa Ciuta? Munthu uyu walekenge vinthu viheni pambere wandajipatulire mphanyi Yehova wakazomerezga kujipatulira kwake. Ntheura, munthu uyo wakabapatizika uku wacali kucita viheni wangacita makora usange wangaghanaghana kuti wabapatizikeso.
Wuli usange munthu wakacitanga kwananga yayi pambere wandabapatizike, kweni wati wabapatizika wacita kwananga uko kukukhumbikwira komiti yaceruzgo? Tiyelezgere kuti munthu uyu wakuti wakabapatizikiramo bweka, panji kuti wakaŵa wambura kwenelera kubapatizika. Para ŵalara ŵakukumana nayo, ŵaleke kuyowoya kuti wakabapatizikiramo bweka nesi kumufumba usange nayo wakughanaghana nthena. Nakuti munthu uyu wakapulika nkhani ya mu Malemba yakuyowoya za kuzirwa kwa ubapatizo. Nayo wakazgora mafumbo ghakukhwaskana na kujipatulira ndiposo ubapatizo. Ndipo pamanyuma wakasintha vyakuvwara na kubapatizika. Ipo nchakupulikikwa kugomezga kuti wakamanyanga makora ico wakacitanga. Ntheura, ŵalara ŵaleke kumuwona nga ngwambura kubapatizika.
Usange munthu uyu wakukhumba kuti wabapatizikeso, ŵalara ŵangamuphalira kuti wakaŵazge Gongwe la Mulinda la Cingelezi la Malici 1, 1960, peji 159-160, na la Febuluwale 15, 1964, peji 123-126. Nkhani ya kubapatizikaso yalongosoreka makora mu magazini agha. Munthu wangasankha yekha kuti wabapatizikeso usange wakuwona kuti panyengo iyo wakabapatizikira wakaŵa kuti wandapulikiske ivyo Baibolo likusambizga.
Kasi Mkhristu wakwenera kughanaghanira fundo wuli pa nkhani ya kukhala lumoza na ŵanthu ŵanandi mu nyumba yimoza?
Waliyose wakukhumba pakukhala. Kweni mazuŵa ghano, ŵanthu ŵanandi ŵalije nyumba. Cifukwa ca ukavu, matenda panji vinthu vinyake, ŵangacicizgika kukhala mu nyumba yimoza lumoza na ŵabali ŵawo ŵanandi. Mu vyaru vinyake, ŵanthu ŵangacicizgika kukhala lumoza na ŵabali ŵawo ŵanandi mu cipinda cimoza.
Ni mulimo wa gulu la Yehova yayi kulongozga Ŵakhristu umo ŵangakhalira mu nyumba zawo. Ŵakhristu ŵakwenera kughanaghanira fundo za mu Malemba mwakuti ŵawone usange ŵakukhala mu nthowa iyo njakuzomerezgeka na Ciuta panji yayi. Tiyeni tiwone zinyake mwa fundo izi.
Cakwamba, tikwenera kughanaghanira umo umoyo withu wauzimu ungakhwaskikira cifukwa ca kukhalira lumoza na ŵanji. Kasi ŵanthu awo tikukhala nawo ŵali na nkharo wuli? Kasi ŵakusopa Yehova? Kasi ŵakulondezga ivyo Baibolo likusambizga? Mpositole Paulosi wakalemba kuti: “Mungapuluskikanga cara. Mendezgano ghaheni ghakunanga makhaliro ghawemi.”—1 Kor. 15:33.
Baibolo likulongosora kuti Yehova wakutinkha uzaghali na uleŵi. (Heb. 13:4) Ntheura, wakuzomerezga yayi kuti ŵanthu ŵambura kutorana ŵakhalenge lumoza nga ni mfumu na muwoli. Mkhristu wamahara wangatemwa yayi kukhala mu nyumba iyo mukucitika vinthu vyambura kwenelera.
Nakuti Baibolo likuciska wose awo ŵakukhumba kuŵa ŵabwezi ŵa Ciuta kuti ‘ŵacimbirenge uzaghali.’ (1 Kor. 6:18) Ntheura, Ŵakhristu ŵangacita makora kugega kukhala na ŵanthu awo ŵangaŵakopa kuti ŵacite nawo uzaghali panji uleŵi. Tiyelezgere kuti Ŵakhristu ŵanandi ŵakukhala mu nyumba yimoza. Kasi vingacitika kuti ŵanji ŵawire mu cipingo ca uzaghali? Wuli usange vyacitika waka kuti ŵanthu ŵaŵiri ŵambura kutorana, kwambura kupangana ŵasangika kuti ŵali ŵekha mu nyumba cifukwa cakuti ŵanyawo ŵawukapo kwakanyengo? Mwakuyana waka, vingaŵaso makora yayi kuti munyamata na msungwana awo ŵakukhumbana ŵakhalenge mu nyumba yimoza. Vinjeru vingatovwira kucita vinthu mwamahara.
Cingaŵaso cambura kwenelera kuti awo ŵali kupatana ŵalutilire kukhala mu nyumba yimoza. Pakuti ŵakumanyana makora cingaŵa cipusu kuti ŵacite vinthu vyambura kwenelera.—Zinth. 22:3.
Fundo yaumaliro, kweni yakuzirwa iyo tikwenera kughanaghanira ni umo ŵanthu ŵakuwonera ivyo tikucita. Nangauli Mkhristu wangawona nga palije suzgo na umo wakukhalira, kweni usange ŵanthu ŵakudandawura, cingaŵa makora kughanaghanirapo. Tikukhumba cara kuti ŵanthu ŵayuyurenge Yehova cifukwa ca nkharo yithu. Paulosi wakayowoya kuti: “Muleke kuŵa cakukhuŵazga ku Ŵayuda kweniso Ŵagiriki na ku mpingo wa Ciuta, umo nane nkhukondweskera ŵanthu wose mu vinthu vyose, kwambura kupenja candulo ca namwene kweni ca ŵanandi, mwakuti ŵaponoskeke.”—1 Kor. 10:32, 33.
Ku awo ŵakukhumba kulondezga fundo za Yehova, nyengo zinyake cingaŵa cakusuzga kusanga nyumba yakwenelera. Ndipouli, Ŵakhristu ŵakwenera ‘kulutilira kusanda ico nchakuzomerezgeka kwa Fumu.’ Ŵakwenera kuwoneseska kuti mu nyumba zawo muleke kucitika vinthu vyambura kwenelera. (Efe. 5:5, 10) Kuti ŵacite nthena, ŵakwenera kulomba kuti Ciuta waŵalongozge na kucita vyose ivyo ŵangafiska mwakuti ŵavikiliranenge mwakuthupi na mwauzimu kweniso kuti lumbiri lwa Yehova luleke kunangika.